¿Maymantaj wañuspa ripunchej?

1-3. 1) Ujnin familianchej wañupojtin, ¿imatataj piensasunman? 2) ¿Imatataj ashkha iglesiaspi ninku uj runa wañupojtin?

¹ BIBLIAQA willawanchej tumpamantawan ‘manaña wañuy kananta’ (Apocalipsis 21:4). Yachakorqanchej jinataj, Jesús wañusqanrayku wiñaypaj kausakuyta atinchej. Jinapis runaqa wañushallanchejpuni (Eclesiastés 9:5). Chayrayku ichapis yachayta munasunman maymanchus wañuspa ripusqanchejta.

² Ujnin familianchej wañupojtenqa, ichapis piensasunman: “¿Maymantaj ripunri? ¿Qhawamushawanmanchu? ¿Yuyarikuwanmanchu? ¿Maykʼajllapis watejmanta tinkukapuymanchu?”, nispa.

³ Ashkha iglesiaspeqa tukuy imaymanata yachachinku. Wakenqa ninku, kʼacha runasqa cieloman ripusqankuta, sajra runastaj infiernoman risqankuta. Wakin iglesiaspitaj ninku, wañupojtinchejqa espiritunchej kausakushasqanta, wañusqa familianchejwantaj tinkukapusqanchejta.

4. ¿Imatataj casi tukuy iglesiaspi yachachinku?

⁴ Ashkha iglesiaspeqa tukuy imaymanata yachachinku. Jinapis casi tukuyninkupuni yachachinku, uj runa wañupojtenqa alman chayri espiritun llojsipusqanta.a

¿MAYMANTAJ WAÑUPUSPA RIPUNCHEJ?

5, 6. ¿Wañupuspaña imatapis ruwajchu kasqanchej?

⁵ Jehová Diosqa, sutʼita yachan wañupojtinchej mana maymanpis ripusqanchejta. Payqa willawanchej, wañupojtinchejqa tukuy ima tukukapusqanta. Wañupuspaqa  niña  imatapis  yuyarikunchejchu, niña pitapis munakunchejchu, niñataj chejnikunchejchu. Chantapis wañupuspaqa manaña rikunchejchu, manaña uyarinchejchu, niñataj imapipis yuyanchejchu.

⁶ Bibliaqa niwanchej: “Wañusqasrí mana imatapis  yachankuchu”, nispa. Wañusqaspataqa “tukukapullantaj munakuyninku, chejninakuyninku, envidiakuyninku ima. Jinamanta kay pachapeqa manaña imatapis ruwaysenqankuñachu” (Eclesiastés 9:5, 6 leey). Bibliaqa nillantaj, wañusqaspataqa “yuyayninkupi tukuy wakichikusqanku” chinkapusqanta (Salmo 146:4).

¿IMA NERQATAJ JESÚS WAÑUYMANTA?

7. ¿Imawantaj Jesús wañuyta kikinchasqa?

⁷ Jesusqa amigon Lázaro wañupojtin, yachachisqasninman nerqa: “Amigonchej  Lazaroqa puñushan”, nispa. Chaywanqa nisharqa wañupusqantapuni, manataj puñushallasqantachu (Juan 11:11-14). Jesusqa wañuyta, puñuywan kikincharqa. Payqa mana nerqachu, Lazaroqa cieloman ripusqanta chayri wañupoj familianwan tinkukapusqanta. Nillataj nerqachu infiernopi ñakʼarishasqanta. Astawanpis nerqa Lazaroqa puñushasqanta. Bibliamanta  waj  versiculospis, wañuytaqa sinchʼi puñuywan kikinchallantaj. Jesusqa  Jairoj  imillitanta  niraj  kausarichishaspa  nerqa: “Imillitaqa mana wañupunchu, puñushallan”, nispa (Lucas 8:52, 53).

8. ¿Wañunanchejpajchu Dios ruwawasqanchej?

⁸ Diosninchejqa Adantawan Evatawan wiñaypaj kausakunankupaj ruwarqa, manataj wañunankupajchu. Jehová Diosqa runasta ruwarqa wiñaypaj kausayta munanankupaj (Eclesiastés 3:11). Imaynatachus tatamamanchej mana wañunanchejta munankuchu, ajinallatataj Jehová Diosninchejpis, mana munanchu wañunanchejta, nitaj viejoyananchejtapis.

¿IMARAYKUTAJ WAÑUNCHEJ?

9. ¿Diospa kamachisqan mana kasukuyta atinapaj jinachu karqa?

⁹ Edén huertapi Jehová Diosqa Adanman nerqa: “Huertapi tukuynin kaj sachʼasmanta mikhullanki. Allin kajta mana allin kajta yachanamanta sachʼaj poqoynillanta amapuni mikhunkichu. Chay sachʼaj poqoynintachus mikhunki chayqa, wañunki”, nispa (Génesis 2:9, 16, 17). Chay kamacheyqa kasukunapaj jinalla karqa. Jehová Diosqa Adanmanwan Evamanwan niyta aterqa, imachus allin, imatajchus mana allin kasqanta. Sichus Adanwan Evawan Diosta Kamachejninkuta jina qhawankuman karqa chayqa, kamachisqanta kasukunkuman karqa. Tukuy imata japʼisqankumantapis agradecekunkuman karqa.

10, 11. 1) ¿Imatataj Supay creeykuchisqa Evaman? 2) ¿Adanwan Evawan yachasqankuchu uj sachʼaj poqoyninta mana mikhunanku kasqanta?

¹⁰ Adanwan Evawanqa Jehová Diosta mana kasukorqankuchu. Supayqa Evata taporqa: “¿Huertapi kaj tukuynin sachʼaspa poqoyninta ama mikhunkichejchu, nispachu Diosqa nisunkichej?”, nispa. Evataj kuticherqa: “Atiyku mikhuyta tukuynin sachʼaspa poqoyninta. Huerta chawpipi kaj sachʼallamanta Diosqa niwayku amapuni mikhunaykuta, ni llojchirinallaykutapis. Chaymantachus mikhunkichej chayqa, wañunkichej, niwayku”, nispa  (Génesis 3:1-3).

¹¹ Supaytajrí Evata nerqa: “Chayqa mana jinachu; mana wañunkichejchu. Dios allinta yachan, chay sachʼaj poqoyninta mikhuspa, sumaj yachayniyojman tukunaykichejta. Ajinamanta chaywan qankunaqa Dios jina kankichej, yachankichejtaj imachus allin kajta, mana allin kajtapis”, nispa (Génesis 3:4-6). Supayqa Evata creechiyta munarqa, allin kajtapis, mana allin kajtapis sapallanmanta ruwayta atisqanta. Chantapis llullakuspa nerqa, Diosta mana kasukuspaqa mana wañunanta. Chayrayku Evaqa sachʼaj poqoyninta mikhuykorqa, qosanmanpis jaywallarqataj. Adanwan Evawanqa sutʼita yacharqanku, chay sachʼaj poqoyninta mana mikhunankuchu kasqanta. Chay kamacheyqa juntʼayta atinapaj jinalla karqa. Paykunatajrí kʼacha Tatanchejtaqa yachashaspa mana kasorqankuchu.

12. ¿Allintachu Adanwan Evawan ruwasqanku Diosta mana kasuspa?

¹² Adanwan Evawanqa mana ruwanatapuni Diospa ñaupaqenpi ruwarqanku. Sichus wawanchejta ni imata faltachispa munasqata uywakushajtinchej, wawanchej contranchejpi churakunman chayqa, sonqonchej imatachus nanawasunmanpis.

13. Adán wañupojtin, ¿paymanta imapis llojsipusqachu?

¹³ Adanwan Evawanqa Diosta  mana  kasusqankurayku manaña wiñaypaj kausakuyta aterqankuchu. Jehová Diosqa Adanta nerqa: “Jallpʼa kanki, jallpʼallamantaj kutinki”, nispa (Génesis 3:19 leey). Adanqa juchallikusqanrayku wañorqa. Wañuspataj jallpʼaman tukuporqa, imaynachus karqa niraj ruwasqa kashaspa, ajinaman. Payqa chinkasqata chinkaporqa, nitaj paymanta ima almapis, ni espiritupis llojsiporqachu (Génesis 2:7).

14. ¿Imaraykutaj wañoj kasqanchej?

¹⁴ Adanwan Evawan Diosta kasukunkuman karqa chayqa, kausakushankumanraj karqa. Paykunaqa mana kasukusqankurayku juchasapasman tukorqanku, wañorqankutaj. Juchaqa uj millay onqoy jina, chaytataj Adanwan Evawan herenciata jina saqewarqanchej. Runasqa nacekusqanchejmantapacha juchayoj kanchej, chayrayku wañunchej (Romanos 5:12). Jehová Diostajrí  mana  wañunanchejpajchu  ruwawarqanchej. Payqa mana munanchu ni pi wañunanta. Bibliaqa nin, wañoyqa ‘enemigonchej’  kasqanta  (1 Corintios 15:26).

PANTASQA YACHACHIYKUNATA NIÑA CREENCHEJCHU

15. Wañusqasmanta imatachus Biblia nisqanta yachakuspa, ¿imatataj manaña creenachu kasqa?

¹⁵ Wañusqasmanta imatachus Biblia nisqanqa, yanapawanchej pantasqa yachachiykunata mana creenapaj. Bibliaqa willawanchej, wañusqasqa nanayta mana sientesqankuta, nitaj phutikusqankuta. Wañusqaswanqa mana parlayta atisunmanchu, nitaj paykunapis noqanchejwan parlayta atinkumanchu. Wañusqastaqa mana yanapayta atisunmanchu, nillataj paykunapis yanapawasunmanchu. Wañusqa kajkunaqa mana ima sajratapis ruwawasunmanchu, chayrayku wañusqastaqa mana ni imarayku manchachikunanchejchu tiyan. Ashkha iglesiaspi yachachinku wañusqasqa cieloman chayri infiernoman risqankuta. Nillankutaj wañusqasta yanapanapajqa responsosta churachina kasqanta, misachina kasqanta ima. Wañusqasmanta imatachus Biblia nisqanta yachakuspaqa niña chay llulla yachachiykunata creenchejchu.

16. ¿Imastataj ashkha iglesias pantasqata yachachinku?

¹⁶ Ashkha iglesiaspeqa yachachinku, wañupojkunaj almanku chayri espiritunku waj lugarman ripusqanta. Supaytaj ajina pantasqata yachachisqankuwan, creechiyta munawanchej alma chayri espíritu purisqanta. ¿Ajinallatatajchu iglesiaykipipis yachachinku, chayri Bibliaj nisqantachu yachachinku? Supayqa ajina pantasqa yachachiykunawan Jehová Diosmanta  karunchayta  munawanchej.

17. Sajra runas infiernopi laurashasqankuta yachachispa, ¿imaynatataj Diosta qhawachinku?

¹⁷ Ashkha iglesiaspi yachachisqankoqa, ancha pantasqapuni. Wakin iglesiaspeqa yachachinku sajra runas infiernopi laurashasqankuta. Chay yachachisqankoqa Jehová Diosta sajrapaj qhawachin. Payqa ni jaykʼaj saqenmanchu runas nina lauraypi ñakʼarinankutaqa (1 Juan 4:8 leey). Uj runa wawitanta castigananpaj makisninta ninawan ruphaykuchejtin, ¿ima ñawiwantaj chay runata qhawasunman? May sajra runa kasqantachá nisunman. Nichá rejsillaytapis munasunmanchu. Ajinallatataj Supaypis  Jehová  Diostaqa  sajrapaj  qhawananchejta munan.

18. ¿Imaraykutaj wañusqasta mana manchachikunachu kasqa?

¹⁸ Wakin iglesiaspeqa yachachinku uj runa wañupojtin alman llojsipusqanta. Chantapis ninku almamanta yuyarikunapuni kasqanta, astawanpis manchachikuna kasqanta. Nillankutaj almasqa yanapayta atiwasqanchejta chayri castigayta atiwasqanchejta. Chaytataj ashkha runas creenku. Chayraykutaj Jehová Diosta yupaychanankumantaqa, wañusqasta manchikunku. Pipis wañupojtenqa velasta kʼanchachipunku, misachinku, waj imastawan ruwanku. Bibliatajrí niwanchej wañusqasqa ni imata yachasqankuta, nitaj imatapis ruwayta atisqankuta. Chayrayku wañusqastaqa mana manchikunachu tiyan. Jehová Diosmin Ruwawajninchejqa. Pay kʼatalla Diosqa, payllatataj yupaychana tiyan (Apocalipsis 4:11).

19. ¿Ima yachachiykunatataj manaña creenchejchu?

¹⁹ Wañupojkunamanta imatachus Biblia nisqanta yachaspaqa, niña creenchejchu iglesiaspi pantasqata yachachisqankutaqa. Chantapis mana iskayrayanchejchu Jehová Diosqa qhepaman tʼukuna imasta ruwananmanta.

20. ¿Imatá qhepan capitulopi yachakusunchej?

²⁰ Ñaupa tiempomanta Diospa kamachin Jobqa nerqa: “Sichus uj runa wañun chayqa, ujtawan kawsanmanchu?”, nispa (Job 14:14). Ichá yachayta munanchej, wañuspaqa rijchʼarimunanchejtachus manachus. Jehová Diosninchejqa, Palabranpi willawanchej wañupojkunata kausarichimunanta. Qhepan capitulopi chaymanta astawan yachakusunchej.