Ama manchachikunachu kay mundoj tukukuynin chayamunanta

Tumpamantawan Jehovaj paciencianqa tukukaponqa. Chaypachataj tukuy llulla religiones tukuchisqa kanqanku, Diospa llajtanpa contranpi uj qotu naciones oqharikonqa, Jehová Diostaj tukuy sajra runasta Armagedonpi tukuchenqa. Tukuyninchejtaj mayta suyakushanchej chay pʼunchay chayamunallantaña.

Jatun ñakʼariy chayamojtenqa imaspunichus kananta mana sutʼita yachanchejchu. Ima ratochus chayamunanta mana yachanchejchu, nillataj yachanchejchu ima achakiswanchus gobiernos religionespa contrankuta oqharikunankuta. ¿Mashkha unaytataj qotu naciones Jehovaj llajtanpa contranta oqharikonqanku? ¿Imasta ruwaspataj contranta oqharikonqanku? Chanta, ¿imaynasmantá Jehová sajra runasta Armagedonpi chinkachenqa? Chay imastaqa mana yachanchejchu.

Imaschus aswan qhepaman kananmantaqa mana manchachikunchejchu, imaraykuchus Bibliaqa mana manchachikunapaj imatachus yachanallanchejta willawanchej. Yachanchej ‘qhepa pʼunchaykunaj’ tukukuyninpiña kausashasqanchejta (2Ti 3:1). Yachallanchejtaj gobiernos religionespa contrankuta oqharikusqanku tiempoqa “pisiyachisqa” kananta, cheqa religión mana chinkachisqa kananpaj (Mt 24:22). Chantapis mana iskayrayanchejchu Jehová llajtanta librananmanta (2Pe 2:9). Yachallanchejtaj Jehovaqa Jesusta ajllasqanta sajra runasta chinkachinanpaj, may chhika runastataj Armagedón maqanakumanta librananta. Jesusqa cheqan, may atiyniyojtaj chayrayku chayta ruwanqa (Ap 19:11, 15, 16).

“Runasqa manchariywan wijchʼukonqanku” chay imas pasasqanta rikuspa (Lu 21:26). Noqanchejtajrí mana. Chayrayku imaynatachus Jehová ñaupa tiempopi llajtanta salvasqanta, imachus qhepaman kananta willawasqanchejta ima leespa, chaypitaj tʼukurispaqa, mana iskayrayaspa Lucas 21:28 nisqanman jina ruwasun, chaypi nin: “Cheqanta sayaykuychej, umaykichejta oqharispa. Kacharichisqa kanaykichejqa qayllamushanña”.