‘Jehová Diosqa mana qonqakuwanchu’

Noqaqa 1983 watapi nacekorqani. Chunka wataykamaqa sanitolla karqani. Jinallapi tukuynin cuerpoy mayta nanayta qallariwarqa. Chaymanta iskay watanman jinataj, uj paqarin manaña cuerpoyta kuyurichiyta aterqanichu. Chakisneyqa wañusqa jina kasharqa. Chay diamantapacha manaña purikunichu. Onqoyniyrayku niña wiñarqanichu. Chayrayku wasamanta qhawarisqaqa, lloqallitu jinallapuni kani.

Killasta wasipi wisqʼasqalla karqani. Jinallapi iskay señoras visitawarqayku. Paykunaqa Jehovaj testigosnin kasqanku. Visitas jamojtenqa pakaykukoj kani. Jinapis chay kutipeqa, hermanaswan parlarerqani. Paykuna paraisomanta parlarishawajtinku, yuyarikorqani 5 watitayoj kashajtiy Jethro sutiyoj misionero visitawasqaykuta. Payqa Surinam suyumanta killapi uj kutita jamoj, tataymantaj Bibliamanta yachachej. Jethroqa may kʼacha karqa. Chayrayku payta amigoyta jina qhawakorqani. Chaypachaqa Jehovaj testigosnin llajtitaykupi reunionesta ruwaj kanku. Awelitosniytaj chayman wakin kutis pusawaj kanku. Chayrayku ujnin hermana, “¿Bibliamanta yachakuyta munawajchu?” nispa tapuriwajtin, “ya” nerqani. Chay hermanaqa Florence sutikorqa.

Payqa qosanwan khuska Bibliamanta yachachiwaj jamorqa. Qosanqa Justus sutikorqa. Noqaqa mana leeyta yacharqanichu. Paykunataj chayta reparaspa leeyta yachachiwarqanku. Pisi tiemponmantaj sapallaymantaña leesharqani. Jinallapi paykunata Surinam suyuman kachaporqanku. Chayrayku niña pipis Bibliamanta yachachiwaj karqachu. Jinapis Jehová Diosqa, mana qonqakuwarqachu.

Chaymanta pisi tiemponman, uj precursorñataj llajtitaykuman chamorqa. Payqa Floyd sutikorqa. Chʼujllamanta chʼujlla predicashaspataj, wasiyman chayamorqa. Chantá tapuriwarqa, “¿Bibliamanta yachakuyta munawajchu?”, nispa. Noqataj asirikorqani. Paytaj niwarqa: “¿Imamantá asikushanki?”, nispa. Noqataj nerqani: “¿Imatataq Diosninchik ruwananchikta munan? folletota estudiarqaniña. El conocimiento que lleva a vida eternaa librotapis estudiasharqaniña”, nispa. Chantá willarerqani, imaraykuchus niña estudiashasqayta. Ajinapi Floydwan Conocimiento librota estudiayta tukucharqani. Pisi tiemponmantaj, paytapis waj lugarman predicaj kachaporqanku. Jinamanta ujtawan mana maestroyoj rikhurerqani.

2004 watapi, iskay precursores especialesñataj llajtitayman chayamorqanku. Ujnenqa Granville sutikorqa, ujnintaj Joshua. Paykunaqa chʼujllamanta chʼujlla predicashaspa, taripawarqanku. Tapuriwarqankutaj: “¿Bibliamanta yachakuyta munawajchu?”, nispa. Noqataj asirikorqani. Chantá paykunaman nerqani, Conocimiento librota watejmanta estudiachinawankuta. Noqaqa yachayta munarqani, ñaupajta estudiachiwarqanku chay hermanos jinallatajchus manachus yachachinawankuta. Hermano Granvilleqa, niwarqa llajtitaypi tantakuykunata ruwashasqankuta. Noqaqa wasiymanta 10 watasta jinaña mana llojserqanichu. Jinapis tantakuyman riytapuni munarqani. Chayrayku Granvilleqa wasiyman jamuspa, silla de ruedaspi salonman chayachiwarqa.

Aswan qhepata, hermano Granvilleqa Diosmanta Parlayta Yachanapaj tantakuyman anotachikunayta niwarqa. Pay niwarqa: “Onqosqeta kaspapis, parlayta atinkiraj. Qanpis uj pʼunchay chay patamanta discursamunki. Atinkipuni, qhawarillankipis”, nispa. Chay niwasqanqa mayta kallpachawarqa.

Chay qhepata, Granvillewan predicaj llojsiyta qallarerqani. Jinapis wakin lugaresqa, mana silla de ruedaswan purinapaj jinachu karqa. Chayrayku hermanota nerqani carretillapi tanqaykachanawanta. Ajinamanta sumajta predicarqayku. Chantá 2005 watamanta abrilpi bautizakorqani. Chaymantataj publicacionesmanta, sonidomantawan encargakunaypaj yachachiwarqanku.

2007 watapi jatun llakiy qhatiriwarqa. Tatayqa canoapi yakuman chinkaykuspa wañuporqa. Chayrayku tukuynin familiay may llakisqa kasharqayku. Hermano Granvilleqa, Diosmanta mañapuwaj kayku, Bibliawantaj sonqochawaj kayku. Chaymanta iskay watasninman, waj llakiyñataj qhatiriwarqayku. Hermano Granvilleñataj, botepi yakuman chinkaykuspa wañuporqa.

Jinamanta juchʼuy congregacionniykupi mana ancianoyoj rikhurerqayku. Uj siervo ministerialllataj kapuwarqayku. Granville wañupusqanmanta maytapuni sonqoy nanawarqa. Payqa may munasqa amigoy karqa. Jehová Diosman qayllaykunaypaj, waj imaspipis mayta yanapawarqa. Wañupusqanmanta qhepan reunionpi, Torremanta Qhawaj revistata plataformamanta leesharqani. Iskay parrafosta ñakʼayta leerqani. Chaymantaqa manaña waqayniyta aguantakuyta aterqanichu. Chayrayku plataformamanta uraykanporqani.

Pisi tiemponman, waj congregacionmanta hermanos yanapaj jamuwarqayku. Chaytaj mayta kallpachawarqa. Chantapis sucursalqa, uj precursor especialta kachamuwarqayku. Paytaj Kojo sutikorqa. Chaymanta mamaywan sullkʼa hermanoywan Bibliata estudiarqanku, bautizakorqankutaj. Chaytaj maytapuni kusichiwarqa. Chantá marzo de 2015 watapi, siervo ministerialta churawarqanku. Chaymanta pisi tiemponmantaj, ñaupaj discursoyta qorqani. Chay diaqa kusiymanta waqarikorqanipuni. Hermano Granvillej niwasqantataj yuyarikorqani. Pay niwarqa: “Qanpis uj pʼunchay chay patamanta discursamunki. Atinkipuni, qhawarillankipis”, nispa.

Broadcastingta^® qhawaspa, ashkha hermanospa kausayninkumanta yachakuni. Ashkhas noqa jinallataj onqosqas kanku. Jinapis tukuy atisqankuta Jehovapaj ruwanku, kusisqataj kashanku. Noqapis Jehová Diospaj tukuy atisqayta llankʼayta munarqani. Chayrayku precursor regularta orqhorqani. Septiembre de 2019 watapitaj, mana yuyashajtillay ancianota jina churawarqanku. Congregacionniykupeqa 40 publicadores jina kayku.

Mayta agradecekuni, Bibliamanta yachachiwarqanku chay hermanosman. Paykunaqa Diosta sirvinaypaj ashkhata yanapawarqanku. Astawanpuneqa Jehová Diosman agradecekuni. Imajtinchus payqa manapuni qonqakuwanchu.