Munayninwan atipachikojta, ¿Jehová allinpajchu qhawan?

Paul nin: “Primoy discutiwajtin, kunkanmanta qʼallpispa wañurpachiyta munarqani”, nispa.

Marco nin: “Wasiypeqa imallamantapis phiñarpakoj kani. Rabiaypeqa mesasta, sillasta, pujllanasta, imatachá tarisqayta choqaj kani”, nispa.

Ichapis mana paykuna jinapunichu kanchej. Jinapis tukuyninchej, rabianchejwan wakin kutis atipachikunchej. Ajina kanchej Adanmanta juchata japʼisqanchejrayku (Rom. 5:12). Wakenqa Paulwan Marcowan jina, mana atillanchejchu rabianchejta ñitʼiykukuyta. Wakintajrí mana allin yuyaykunawan maqanakushanchej. Wakintaj mancharisqalla kausanchej. Wakintajrí khuchichakuy juchapi mana urmanapaj kallpachakunanchej tiyan. Wakintaj mana machanapaj chayri mana drogakunapaj kallpachakuna tiyan.

Ashkha runas munayninkuwan chayri sajra yuyayninkuwan atipachikunku. Manachayrí imatapis ruwarparillanku. Chay jina runasqa llakiykunallapi rikhurinku. ¿Imataj yanapawasunman mana paykuna jina llakiypi kanapaj? Munayninchejwan mana atipachikunachu tiyan. Chayrayku kay kinsa tapuykunaman kutichisun: 1) ¿Imaynataj munayninwan mana atipachikoj runa? 2) ¿Imaraykutaj mana allinchu munayninchejwan atipachikunanchej? 3) ¿Imatá ruwasunman munayninchejwan mana atipachikunapaj? (Gál. 5:22, 23). Chantapis munayninchej atipayta munawajtinchej, imatachus ruwananchejta yachakusun.

¿IMAYNATAJ MUNAYNINWAN MANA ATIPACHIKOJ RUNA?

Munayninwan mana atipachikojqa, mana tukuy ima munasqantachu ruwan. Astawanpis Jehová Diosta kusichiyta munasqanrayku, mana imatapis parlallanchu, nitaj imatapis ruwallanchu.

Jesusqa munayninwan ni jaykʼaj atipachikorqachu. Biblia nin: “Paypaj sajrata parlashajtinku, mana kikillanwantaj kutichikorqachu. Ñakʼarishaspapis, mana nerqachu chaymanta pagachikunanta. Astawanpis Pichus cheqa kajman jina juzgan, chaypa makinman churakorqa”, nispa (1 Ped. 2:23). Jesús kʼaspipi warkhusqa kashajtin, payta chejnikojkunaqa asipayarqanku. Jesustajrí mana kutichikorqachu (Mat. 27:39-44). Aswan ñaupajta fariseosqa, Jesusta parlasqanpi pantachiyta munaspa tapuykacharqanku. Paytajrí mana phiñakorqachu (Mat. 22:15-22). Uj pachataj, wakin phiñasqa judiosqa, Jesusta rumiswan chʼanqaykuyta munarqanku. “Paytajrí paykunamanta pakaykukorqa, templomantataj llojsiporqa”. Jesusqa mana kutichikorqachu (Juan 8:57-59).

Noqanchejqa mana Jesús jinapuni kaspapis, payman rijchʼakusunman. Apóstol Pedro nerqa: “Cristopis qankunarayku ñakʼarerqa, pay jinallataj ruwanaykichejpaj. Ajinamanta purisqanta sumajta qhatinaykichejpaj”, nispa (1 Ped. 2:21). Juchasapa runas kaspapis, Jesús jina ruwasunman, kallpachakusunmantaj munayninchejta dominanapaj. ¿Imaraykutaj chayta ruwanapuni tiyan?

MUNAYNINCHEJWAN ATIPACHIKOJTINCHEJ

Jehová Dios allinpaj qhawanawanchejpajqa, mana munayninchejwan atipachikunachu tiyan. Imatapis parlarpallasunman chayri ruwarpallasunman chayqa, Jehovaqa payta unaytaña sirvejtinchejpis, niña allinpajchu qhawawasun.

Moisesmanta parlarina. Payqa “aswan llampʼu sonqoyoj karqa, kay pachapi tukuy runasmanta nisqaqa” (Núm. 12:3). Moisesqa israelitaspa quejakusqankuta, unayta pacienciawan aguantarqa. Jinapis uj pacha rabiawan atipachikorqa. Chaypacha israelitasqa yaku mana kasqanmanta Moisespaj rimarqanku. Moisestajrí israelitasta rabiawan nerqa: “Uyariychej kunanqa, rimajkuna: Kay chhankamantachu ujyanaykichejpaj yakuta orqhomusqayku?”, nispa (Núm. 20:2-11).

Moisesqa phiñakuyninta mana ñitʼiykukorqachu. Nitaj Jehovatapis yakuta orqhosqanmanta jatuncharqachu (Sal. 106:32, 33). Chayrayku Jehová Diosqa, mana Moisesta saqerqachu Sumaj Jallpʼaman yaykunanta (Núm. 20:12). Moisesqa phiñakuyninwan atipachikusqanmanta, wañupunankamachá pesachikorqa (Deu. 3:23-27).

¿Imatá chaymanta yachakusunman? Jehová Diosta unaytaña sirvishanchej chaypis, phiñachiwanchej chaykunata, chayri pantajkunata cheqanchana kajtenqa, amapuni sonqonkuta nanachinapaj jina imatapis ninachu (Efe. 4:32; Col. 3:12). Astawan edadniyoj kasqanchejman jina, paciencianchejpis wakin kutis pisiyallantaj. Jinapis Moisesmanta yuyarikuna. Sichus phiñakuyninchejwan atipachikusunman chayqa, Jehová Diosta unayta sirvisqanchejqa qhasillapaj kanman. Chayrayku phiñakuyninchejwan mana atipachikunapaj, imatachus ruwananchejta qhawarina.

MUNAYNINCHEJTA ATIPANAPAJ

Diospa atiyninta mañakuna. Munayninchejwan mana atipachikoj kayqa, Diospa atiyninpa poqoyninmanta ujnin. Paytaj atiyninta mañakojkunaman qonpuni (Luc. 11:13). Chayrayku munayninchejwan mana atipachikunapaj, atiyninwan yanapawasunman (Fili. 4:13). Chantapis Jehová Diosqa, mana chayllapajchu atiyninwan yanapawasunman. Payqa yanapallawasunmantaj munakuyniyoj kanapaj. Chaytaj munayninchejwan mana atipachikunapaj yanapawasun (1 Cor. 13:5).

Imachus juchaman urmachiwasunman chayta qhesachana. Internetpi imallapis sajra ruwaykunaman tanqawanchej chayqa, ama chaykunata qhawanachu. Amallataj sajra imaswan kusirikunachu (Efe. 5:3, 4). Imallapis juchaman urmachiyta munawanchej chayqa, chayta qhesachana (Pro. 22:3; 1 Cor. 6:12). Ichá uj runaqa, khuchichakuy juchapi facilta urmayta atisqanta yachan. Ajina kajtin, allin kanman chay runaqa munayninta rijchʼarichej peliculasta mana qhawanan, nillataj chaymanta parlaj librosta leenan.

Ichapis mana chaykunata ruwayta atillanchejchu. Jinapis chay imasta ruwanapaj kallpachakusun chayqa, Jehová Diosqa atiyninta qowasun. Chay atiytaj munayninchejwan mana atipachikunapaj yanapawasun (2 Ped. 1:5-8). Jehová Diosqa mana allin yuyaykunata umanchejmanta orqhonapaj yanapawasun. Payqa yanapallawasuntaj, mana imatapis parlarparinallapaj, nitaj imatapis ruwarparinallapaj. Paulpis Marcopis Jehová Diospa atiyninwan yanapachikorqanku. Kunantaj paykunaqa niña phiñakuyninkuwan atipachikunkuchu. Uj hermanomanta parlarina. Payqa autota apaykachashaspa rato phiñarpakoj, waj chofereswanpis discutej. ¿Imatataj ruwan manaña ajina kananpaj? Pay nin: “Sapa día Diosmanta mañakuni. Chantapis phiñakuyniywan mana atipachikunaypaj, ima publicacioneschus yanapawanman chaykunata estudiani. Yanapanawanpaj jina textostapis umaypi japʼini. Watastaña cambianaypaj kallpachakushani. Sapa paqarintaj sonqoypi nikuni, phiñakuyniyta chay día ñitʼiykukunay kasqanta. Chantapis mana apurayllata maymanpis rinaypaj, wasiymanta tiempowan llojsini”, nispa.

PANTASPAQA PERDONTA MAÑAKUNA

Wakin kutisqa munayninchejwan atipachikunchejpuni. Jina kajtin, ichá Jehová Dioswan parlariyta pʼenqakunchej. Jinapis paywan astawan parlarinanchej tiyan. Munayninchejwan atipachikuspaqa, Jehová Diosmanta chay rato perdonta mañakuna. Chantapis yanapayninta mañakuna, kallpachakunataj manaña kikin juchapi urmanapaj (Sal. 51:9-11). Jehová Diosqa mañakuyninchejta uyarenqapuni, khuyakuwasuntaj (Sal. 102:17). Apóstol Juan Diosmanta nerqa: “Wawan Jesuspa yawarnintaj tukuy juchamanta llimphuchawanchej”, nispa (1 Juan 1:7; 2:1; Sal. 86:5). Jehová Diosqa niwanchej, runa masinchejta kutin kutita perdonanata. Chayta niwasqanchejrayku, paypis juchanchejta perdonallawasuntaj (Mat. 18:21, 22; Col. 3:13).

Moisesqa chʼin pampapi kashaspa, uj kutipi phiñakuyninwan atipachikorqa. Jehová Diostaj chay ruwasqanta mana allinpajchu qhawarqa. Jinapis Moisesta perdonarqa. Palabranpitaj niwanchej, Moisesqa sinchʼi creeyniyoj kasqanta, paymantataj yachakunanchejta (Deu. 34:10; Heb. 11:24-28). Jehová Diosqa mana Moisesta Sumaj Jallpʼaman yaykucherqachu. Jinapis paraisopi kausarichimonqa, chaypitaj Moisesqa wiñay kausayta japʼiyta atenqa. Noqanchejpis munayninchejwan mana atipachikunapaj kallpachakusun chayqa, wiñay kausayta japʼisun (1 Cor. 9:25).