3. ¿Imaraykutaj kʼacha runas ñakʼarinku?
¿Imaraykutaj chayta yachananchej tiyan?
Kʼacha runas ñakʼarisqankoqa mana allinchu. Chayrayku wakin runasqa yuyanku kʼacha runa kanapaj kallpachakoyqa qhasilla kasqanta.
Kaypi piensariy
Wakin runasqa creenku runas wañupuspa watejmanta nacekusqankuta. Chantapis nillankutaj allinta ruwaj runasqa watejmanta nacekuspa kusisqa kausakunankuta, mana allinta ruwaj runastaj watejmanta nacekuspa ñakʼarinankuta. Chay creenciaman jinaqa kʼacha runapis ñakʼarillanmantaj “ñaupa kausayninpi” mana allin imasta ruwasqanrayku.
Chaywanpis imatachus ñaupa kausayninchejpi ruwasqanchejmanta ni yuyarikunchejchu chayqa, qhasilla ñakʼarisqanchejqa.
Ñaupa kausayninchejpi imatachus ruwasqanchejmanta ñakʼarisun chayqa, mana onqonapaj, nitaj accidentakunapaj kallpachakusqanchejqa qhasilla.
ASTAWAN YACHANAYKIPAJ
¿Imaraykutaj Dios llakiykuna kananta saqen? nisqa videota Internetpi jw.org nisqapi qhaway.
Bibliaj nisqan
Ñakʼarisqanchejqa mana Diospa castigonchu
Runasqa mana yachanchejchu maypichus, ima ratochus uj accidente kananta.
‘Mana usqhayta correjkunaqa atipanku, maqanakupitaj mana kallpayojkuna atipallankutaj. Yachayniyojkunaqa mana mikhunayoj rikhurinku, nitaj allin yachachisqaspis jatumpaj qhawasqachu kanku. Manachayqa tiempo chayamojtin, wakimpaj allin imas tiyan, wakimpajtaj mana’ (ECLESIASTÉS 9:11).
Runasqa juchasapas kasqanchejrayku ñakʼarinchej
Runasqa “jucha” palabrata oqharinku pantaykusqankumanta parlanankupaj. Chaywanpis Bibliaqa chay palabrata oqharin tukuy runas juchasapas kasqanchejmanta parlananpaj, kʼacha runas chayri sajra runas kajtinchejpis.
“Nacekusqaymantapacha sajra kani. Mamaypa wijsanmantapacha juchasapa kani” (SALMO 51:5).
Juchaqa runasta mayta ñakʼarichin
Juchaqa Diosmanta karunchawanchej. Chantá jucharaykullataj runa masinchejwanpis mana allinta kausakuyta atinchejchu. Chayrayku tukuy runas mayta ñakʼarinchej.
“Cheqan kajta ruwayta munashajtiy, sajra kajlla noqapi kashan” (ROMANOS 7:21).
“Diospa tukuy ima ruwasqanqa phutiyta waqashan” (ROMANOS 8:22).