Chejninakuy wiñaypaj chinkanqa

Kay revistapeqa Bibliaj yuyaychaykunasninta yachakorqanchej. May chhika runastaj chay yuyaychaykunawan yanapachikorqanku manaña sajra ñawiwan wajkunata qhawanankupaj. Chaywanpis noqanchejllamantaqa manapuni atisunmanchu chejninakuyta chinkachiytaqa. ¿Imataj chaypaj yanapawasunman?

Uj cheqan gobierno

Gobiernosqa unaymantapacha manapuni chejninakuyta chinkachiyta atinkuchu. Jinapis, ¿nipunichu atenqanku?

Uj gobierno chejninakuyta chinkachinanpajqa, kaykunata ruwanan tiyan:

1. 1. Runasta cambiachinan tiyan manaña wajkunata chejnikunankupaj.

2. 2. Runasta yanapanan tiyan manaña wajkunata chejnikunankupaj.

3. 3. Tukuyta uj rejllata qhawaj autoridadesta churanan tiyan.

4. 4. Jallpʼantinmanta tukuy runasta ujchanan tiyan.

Bibliaqa niwanchej, Dios uj gobiernota sayarichisqanta chay imasta ruwananpaj. Chaytaj Diospa Gobiernon (Lucas 4:43).

Imastachus Diospa Gobiernon ruwananta qhawarina.

1. Sumajta kausakunata yachachiwasun

“Kay pachapi kaj runas yachanqanku imachus cheqan kasqanta” (ISAÍAS 26:9).

“Chay cheqan kajta ruwaypa poqoynenqa allin kawsay kanqa, apamullanqataj ni imamanta manchachikuyta, kusiy kawsayta ima wiñaypaj” (ISAÍAS 32:17).

¿Ima niyta munan? Diospa Gobiernonqa runasman yachachenqa allin kajtapuni. Imachus allin imatajchus mana allin kasqanta entiendespaqa, manaña wajkunata ñaupajta jinachu qhawanchej. Tukuy runas reparanqanku, imaymana rijchʼaj runasta munakunaqa allinpuni kasqanta.

2. Sajra kausayta chinkachenqa

Diosqa “ñawisninkumanta tukuy waqayta pichanqa, manañataj wañuy kanqachu, nitaj llakiypis, nitaj qhapariypis, nitaj nanaypis. Chay ñaupaj kaj imasqa chinkapunña” (APOCALIPSIS 21:4).

¿Ima niyta munan? Diospa Gobiernonqa chinkachenqa sajra kausayta, niñataj pipis sufrenqachu. Kay tiempopi qhasimanta sufrej runasqa manaña pitapis chejnikonqankuchu.

3. Sumaj Gobierno kanqa

“Payqa mana rikusqanman jinallachu juzganqa, nitaj uyarisqanman jinallachu justiciata ruwanqa. Manachayqa, cheqan kayman jina wajchasta juzganqa; kay pachapi llampʼu sonqoyojkunapaj justiciata ruwanqa” (ISAÍAS 11:3, 4).

¿Ima niyta munan? Diospa Gobiernonpi Jesucristo Rey kanqa, paytaj Jallpʼata cielomantapacha kamachimonqa maychus kajman jina, nitaj pimanpis kutikonqachu. Jesusqa tukuy nacionesta uj rejllata qhawan, cheqan kamachiykunasninta juntʼanankupajtaj runasta yanapanqa.

4. Ujchanqa

Diospa Gobiernonqa tukuy runasta yanapanqa “uj sonqolla, kikin munakuyniyoj, sumaj ujchasqas, uj yuyayllataj” kanankupaj (FILIPENSES 2:2).

¿Ima niyta munan? Diospa Gobiernonpi kausakojkunaqa sumaj ujchasqapuni kanqanku. Paykunaqa sumaj ujchasqaspuni kanqanku purajmanta munanakusqankurayku.