54 yachachiy

Juk may kallpayuq runa

¿YACHANKICHU pichus astawan kallpayuq runa kawsasqanta? Juez Sansón karqa. Sansonpa kallpanqa Jehovamanta jamun. Manaraq Sansón nacekuchkaptin, Jehová mamanta nirqa: ‘Juk qhari wawayki kapusunqa. Paymin israelitasta filisteosmanta kacharichiypi ñawparinqa’, nispa.

Filisteosqa Canaanpi tiyakurqanku, saqrataq karqanku. Paykuna achkha soldadosniyuq kanku, israelitastataq ñakʼarichinku. Juk kuti Sansón filisteosman richkaptin, juk jatun león qhaparispa lluqsimurqa. Sansonqa chay leonta makisninwan wañuchirqa. Chantapis, may chhika filisteosta wañuchillarqataq.

Chaymanta, Sansonqa Dalila sutiyuq warmita munakuyta qallarirqa. Filisteosmanta kuraqkunaqa sapa juk Dalilaman 1.100 phatata quyta munarqanku, sichus pay willan imaraykuchus Sansón chayjina kallpayuq kasqanta. Dalilaqa qullqita munarqa. Mana Sansonta, nitaq Diospa llaqtantapis munakuqchu. Chayrayku payqa sapa kuti Sansonta tapuykachaq, maymantachus kallpan jamusqanta yachananpaq.

Chaymanta Sansonqa maymantachus kallpan jamusqanta willarqa: ‘Mana jaykʼaq pipis chukchayta ruthuwanchu. Nacekusqaymantapacha, Diospaq tʼaqasqa kani nazareojina. Sichus chukchayta ruthuwankuman chayqa, kallpay chinkanman’, nispa.

Dalila chayta uyariytawan, Sansonta muqu patanpi uqllaykuspa puñuchirqa. Chanta juk runata yaykuchimuspa chukchanta ruthuchirqa. Jinamanta Sansonpa kallpan chinkapun. Filisteos yaykuytawan japʼispa, iskaynin ñawisninta urqhurpanku, watasqa runamantaq tukuchinku.

Juk pʼunchay filisteosqa Dagón diosninkuta yupaychanapaq juk jatun raymita ruwarqanku, chaymantaq Sansonta asipayanankupaq urqhurqanku. Chaypaqqa Sansonpa chukchan wiñarqaña. Sansonqa makinmanta pusaykachaq wawata nirqa: ‘Kay wasi sayachiq kʼullusninman qayllaykuchiway’, nispa. Chanta Sansón Jehovamanta kallpata mañakuytawan, wasi sayanasmanta japʼikurqa. Qhaparispataq nirqa: ‘Filisteoswan khuska wañusaq’, nispa. Chaypiqa, 3.000 filisteos raymichakuchkarqanku, Sansón wasi sayachiq kʼullusta tanqaspa, chay wasita urmachirqa, tukuy chay saqra runatataq wañuchirqa.

Jueces, 13 tʼaqamanta 16 tʼaqakama.