69 yachachiy
Imillita machu runata yanapan
¿IMATACHUS kay imillita nichkasqanta yachankichu? Chay warmiman Jehovap profetanmanta parlachkan. Imaynatachus Jehová Eliseota tukuy imata ruwananpaq yanapasqanta willachkan. Kay warmiqa mana israelitachu, mana Jehovamanta yachanchu. Imaynatachus kay imillita kay warmip wasiman chayasqanta qhawarina.
Kay warmiqa Siria llaqtamanta. Qusantaq Naamán sutikun, Sirio soldadosta kamachin. Sirios kay israelitata japʼinku, chayrayku imillitaqa kay warmip kamachin.
Naamán lepra unquywan unquykun. Kay unquyqa aychanchikta tʼakachinman. Chayrayku imillita nirqa: ‘Sichus wiraquchiy Israelman rispa, Jehovap profetanta maskʼamunman chayqa, lepramanta thañikunman’, nispa. Warmiqa chayta qusanman willarqa.
Naamán thañikuyta munasqanrayku Israelman rin. Chayman chayaytawan, Eliseop wasinman rin. Eliseotaq, kamachinta kacharqa Jordan mayupi 7 kutita pʼulltikunanta Naamanman ninanpaq. Naamanqa phiñakuspa nirqa: ‘¡Llaqtaymanta mayusninqa aswan sumaq kanku, mayqin Israelmanta mayusninmantaqa!’, nispa ripurqa.
Juk kamachintaq nirqa: ‘Tatay, sichus Eliseo juk jatun imata ruwanaykita mañasunkiman karqa, manachu ruwawaq. Kunanqa, ¿manachu mayllakullawaq, pay nisusqanmanjina?’, nispa. Naamán kamachinta uyarispa, 7 kutita Jordan mayupi pʼultikamurqa. ¡Kayta ruwasqantawan aychanqa wawap aychanmanjina tukurqa!
Naamán kusikurqa. Eliseopman kutirispa nirqa: ‘Kunanqa yachani, tukuy Pachantinpi mana wak Dios kasqanta, manaqa Israel suyullapi. Chayrayku, kay tʼinkata japʼikunawaykita mañarikuyki’, nispa. Chaywanpis, Eliseo nirqa: ‘Mana, mana imatapis japʼikuykimanchu’, nispa. Eliseopaqqa Jehová Naamanta thañichirqa. Chayrayku imallatapis japʼikuyqa mana allinchu kaman karqa. Eliseop kamachinqa Giezi chay regalota munapayarqa.
Naamán ripuchkaptin, Giezi usqhayta payta taripamuspa, nirqa: ‘Eliseoman visitas chayamunku, chayrayku regaloykimanta juk chhikanta munasqanta nisunaypaq kachamuwan’, nispa. Kayqa llulla karqa. Naamán chayta mana yachaspa, Gieziman mañasqanta jaywarqa.
Giezi kutimuptintaq, Eliseoqa imatachus ruwasqanta yacharqa. Jehová Eliseoman willarqa. Chayrayku nirqa: ‘Kay mana allinta ruwasqaykirayku, kunanqa Naamanpa lepran chimpaykusunqa’, nispa. ¡Chayllapi, Giezi leprayuq rikhurin!
¿Imatataq kaymanta yachakunchik? Qallarinapaqqa, kay imillitajina Jehovamanta parlaspa, wakkunata yanapananchik tiyan. Chantapis, Naamanjina mana uqharikuspa, Dios sutichaqkunata kasukunanchik tiyan. Manataq Giezijina llullakunanchikchu tiyan. Bibliaqa mayta yachachiwanchik, ¿ichari?