8 yachachiy
Jallpʼapi may jatuchaq runas
MAY jatun runa qayllaykusuptin, uman techoman chayaptin, ¿imatataq niwaq? ¡Kay runari! Maymanta jamunri, nispachá niwaq. Unayqa Jallpʼapi chayjina runakuna karqa. Biblia nisqanmanjina angelespa wawasnin karqanku. ¿Imaynataq chay karqari?
Yuyariy, saqra ángel Supayqa tukuyta ñakʼarichichkarqa. Angelkunatapis urmachiyta munarqa. Wakin angelkuna Supayta uyarispa, Janaqpachapi ruwayninkuta saqiyta qallarirqanku. Jallpʼaman jamuspataq runaman tukurqanku. ¿Imaraykutaq?
Biblia nisqanmanjina, angelkuna Jallpʼapi kʼachita warmista rikuytawan, paykunawan tiyakuyta munarqanku. Chayrayku, Jallpʼaman jamuspa paykunawan casarakurqanku. Diosqa janaqpachapi tiyakunankupaq angelkunata ruwarqa. Chayrayku Bibliaqa, angelkuna casarakusqankuta millay saqra kasqanta niwanchik.
Chay angelkuna wawayuq karqanku, chay wawastaq jukjina karqanku. Ichapis wawallaraq kachkaspa, wakin wawajinalla karqanku. Chaymanta, wiñasqankumanjina jukjinayarqanku, may jatuchaq kallpayuq runasman tukurqanku.
Chay jatuchaq runasqa may saqra karqanku. May atiyniyuq jatuchaq kasqankurayku runata ñakʼarichiq kanku. Tukuypis paykunajina saqra kanankuta munarqanku.
Enoc wañupurqaña, chaywanpis Jallpʼapi juk kʼacha runa kallarqataq, chay runaqa Noé sutikurqa. Pay Diospa munayninta ruwarqa.
Juk pʼunchayqa Diosninchik saqra runata wañuchisaq, nispa Noeta nirqa. Diosqa Noeta, ayllunta, animalkunata ima, salvayta munarqa. ¿Imaynatá chayta ruwanman karqari? Chayta qhawarina.