84 yachachiy
Juk ángel Mariaman rin
KAY kʼachita warmiqa María sutikun. Payqa israelita, Nazaretpi tiyakun. Diosqa sumaq sunquyuq warmi kasqanta yacharqa, chayrayku ángel Gabrielta Mariawan parlananpaq kacharqa. ¿imatachus Gabriel Mariaman nisqanta yachankichu?
‘Qamwan Diospa khuyakuynin kachun, Jehová qamwan kachkan’, nispa Gabriel parlapayarqa. María kay runata mana jaykʼaq rikurqachu. Chayrayku mana yachaspa imatachus niyta munasqanta llakikurqa. Chayllapi Gabrielqa sunqunta tiyaykuchirqa.
Nirqa: ‘María, ama manchachikuychu. Qamqa Jehovap khuyakuyninta tarinki. Kunanqa wisayuq rikhurinki, juk qhari wawata nacechikunki. Jesús sutiwantaq sutichanki’, nispa.
Chamanta Gabriel nillarqataq: ‘Payqa may sumaq runa kanqa, Patapi Kaq Diospa Churin sutichasqa kanqa. Jehová payta Davidtajina rey kananpaq churanqa. ¡Jesustaq wiñaypaq rey kanqa, reinonqa mana jaykʼaq tukukuyniyuq kanqa!’, nispa.
Mariataq nirqa: ‘¿Imaynataq chay kanqari? Mana, casarakuspa, nitaq qhariwanpis tiyakuspa, ¿imaynata wawayuq kaymanri?’, nispa.
Gabrieltaq nirqa: ‘Diospa atiynin qamman jamusunqa. Chayrayku chay wawaqa Diospa churin kanqa’, nispa. Chaymanta nillarqataq: ‘Yuyariy, aylluykimanta Elizabetta. Runaqa, ancha payaña wawayuq kananpaq, nirqanku. Chaywanpis, qhari wawan kapunqa. Arí, Diospaqqa mana imapis mana atikuq kanchu’, nispa nirqa.
Chayllapi María nirqa: ‘¡Ñuqaqa Jehovap kamachin kani! Niwasqaykimanjina ruwakuchun’, nispa. Chayta uyariytawan ángel ripurqa.
María usqhayllata Elizabetta waturikuq rirqa. Mariata uyariytawan Elizabetpa wisanpi wawitaqa kusiymanta phinkiykacharqa. Elizabetqa espirituwan juntʼaykukuspa Mariata nirqa: ‘Qamqa warmis ukhupi bedecisqa kanki’, nispa. Chanta María Elizabetwan kimsa killata qhipakuytawan Nazaretman kutipurqa.
Mariaqa tumpamantawan Josewan casarakunan karqa. Joseqa María wawayuq kananta yachaspa, manaña casarakuyta munarqachu. Chayrayku Diospa angelnin nirqa: ‘Ama Mariawan casarakuyta manchachikuychu. Dios payman chay wawata quchkan’, nispa. Chayrayku José Mariawan casarakurqa chantá Jesús nacekunanta suyarqanku.