98 yachachiy

Olivos urqupi

JESÚS Olivos urqupi kachkarqa. Paywantaq tawa apostolkuna kachkarqanku. Chay apostolkunaqa, Andrés wawqin Pedro, chantapis Santiago wawqin Juan ima karqanku. Chay qhipankupi wasitaq, Jerusalenpi Diospa wasin karqa.

Kunanqa iskay pʼunchayña Jesús juk burritupi Jerusalenman yaykusqanmanta. Martes karqa. Jesustaq tutamanta templopi kachkarqa. Chay kutiqa sacerdotes Jesusta templopi wañuchiyta munarqanku. Chaywanpis mana wañuchirqankuchu runa Jesusta munakusqankurayku.

‘¡Kataris, phiña katarispa miraynin!’, nispa Jesús kuraq sacerdotesta nirqa. Chantapis, paykuna saqra ruwaykunata ruwasqankurayku Dios jasutʼinanta nirqa. Chaymanta Jesús Olivos urquman wicharirqa, chaypitaq kay tawa apostolkuna tapuyta qallarirqanku. ¿Yachankichu tapusqankuta?

Apostolkunaqa imachus qhipaman kananmanta tapurqanku. Paykunaqa Jesús tukuy saqra kaqta chinkachinanta yacharqanku. Chayrayku, maykʼaqchus chay kananta yachayta munarqanku. ¿Maykʼaqtaq Jesús juktawan jamunqa reyjina kamachinanpaq?

Jesús yacharqa discipulosnin manaña kutimuyninta rikunankuta. Imaraykuchus Jesús cielopiña kanan karqa, discipulosnintaq mana rikuyta atinkumanchu karqa. Chayrayku, Jesusqa pay cielopi kamachiptin imachus Jallpʼapi kananmanta willarqa. ¿Imataq rikukunan karqari?

Jesusqa jatuchaq maqanakuykuna, unquykuna, yarqhaykuna ima kananta nirqa. Chantapis suwas, runa wañuchiq, jallpʼa ikhakuykuna ima, uyarikunanta nirqa. Astawanpis, Diospa Reinonmanta tukuy Jallpʼapi willakunanta nirqa. Jesús nisqanta, ¿kunan rikukunchu? ¡Ari! Chayrayku, Jesús cielopi kamachichkasqantaña nisunman. Tumpamantawan Jallpʼamanta saqrata chinkachinqa.

Mateo 21:46; 23:1-39; 24:1-14; Marcos 13:3-10.