Jehovaj testigosninwan Bibliata estudiaspa cheqa kajta yachakorqanki. Chaytaj yanapasorqa Jehová Diospa amigon kanaykipaj, Diospa Gobiernonpi uj paraisopi kausakuyta suyakunaykipaj ima. Chantapis Diospa Palabranpi creeyniyki yapakorqa. Congregacionpi hermanoswan masichakuspataj, ashkha bendicionestaña japʼishanki. Kunantaj yachankiña imaynatachus Jehová Dios llajtanta kay tiempopi apaykachashasqanta (Zac. 8:23).

Bautizakunaykipaj wakichikushajtiykeqa, ancianos yanapasonqanku Bibliamanta yachakusqaykita yuyarikunaykipaj (Heb. 6:1-3). Jehovata rejsinaykipaj kallpachakullaypuni. Paytaj mayta bendecisonqa (Juan 17:3).

1. ¿Imaraykutaj bautizakuyta munanki?

2. ¿Pitaj Jehová?

   • “Jehová Dioslla cheqa Dios [...] cielopipis kay jallpʼapipis. Mana waj dios kanchu” (Deu. 4:39).

   • “Runasqa yachachunku sutiyki Jehová kasqanta. Runasqa yachachunku, tukuy jallpʼantinpi qanlla Aswan Patapi kaj Dios kasqaykita” (Sal. 83:18).

3. ¿Imaraykutaj Diospa sutinta oqharinapuni tiyan?

   • “Qankunaqa kay jinata Diosmanta mañakuychej: ‘Cielopi kashaj Tatayku, sutiyki jatunchasqa kachun’” (Mat. 6:9).

   • “Jehová Diospa sutinta tukuy oqharejkunaqa salvasqa kanqanku” (Rom. 10:13).

4. ¿Imastá Biblia nin Jehovamanta?

   • “Jallpʼaj kʼuchusninta Ruwaj Jehová Diosqa wiñaypaj wiñaynintinpaj Diosmin” (Isa. 40:28).

   • “Cielopi kashaj Tatayku” (Mat. 6:9).

   • “Diosqa munakuymin” (1 Juan 4:8).

5. ¿Imaynatá Jehová Diosta yupaychananchej tiyan?

   • “Jehová Diosniykitaqa munakunayki tiyan tukuy sonqoykiwan, tukuy kausayniykiwan, tukuy yuyayniykiwan, tukuy kallpaykiwantaj” (Mar. 12:30).

   • “Jehová Diosniykita yupaychanayki tiyan, pay sapallantataj sirvinayki tiyan” (Luc. 4:8).

6. ¿Imaraykutaj Jehovata kasukuyta munanki?

   • “Yachayniyoj kay wawáy, sonqoytataj kusichiy, ajinamanta kutichiyta atisaj pichus noqamanta manakajta parlashan chayman” (Pro. 27:11).

7. Orakushaspa, ¿pimantá mañakunki, chanta pejpa sutinpitaj?

   • “Cheqatapuni niykichej: Imallatapis Tataymanta sutiypi mañakojtiykichejqa, pay qosonqachej” (Juan 16:23).

8. Mañakushaspa, ¿imasmantataj Dioswan parlariwaj?

   • “Qankunaqa kay jinata Diosmanta mañakuychej: ‘Cielopi kashaj Tatayku, sutiyki jatunchasqa kachun. Gobiernoyki jamuchun. Munayniykitaj ruwasqa kachun, imaynachus cielopi, ajinallatataj kay jallpʼapipis. Kay pʼunchaypaj tʼantaykuta kunan qowayku. Juchasniykutapis perdonawayku, imaynatachus noqaykupis contraykupi juchallikojkunata perdonayku ajinata. Amataj juchaman urmajta saqewaykuchu, manachayqa Diablomanta librawayku’” (Mat. 6:9-13).

   • “Kaymin Diospi atienekusqanchejqa: Imatapis munayninman jina mañakojtinchejqa, pay uyariwanchej” (1 Juan 5:14).

9. ¿Imasta ruwajtinchejtaj Jehová mana uyariwasunmanchu?

   • “Paykunaqa qhaparikuspa Jehová Diosmanta yanapata mañakonqanku, paytaj mana uyarenqachu [...] sajra imasta ruwasqankurayku” (Miq. 3:4).

   • “Jehová Diosqa cheqan runasta qhawamushan, mayta mañakusqankutapis uyarimushan. Jinapis Jehová Diosqa sajra imasta ruwajkunaj contrankupi kashan” (1 Ped. 3:12).

10. ¿Pitaj Jesucristo?

    • “Simón Pedrotaj kuticherqa: ‘Qanqa Cristo kanki, kausaj Diospa Wawan’, nispa” (Mat. 16:16).

11. ¿Imapajtaj Jesús kay jallpʼaman jamorqa?

    • “Noqapis mana sirvichikojchu jamuni, manachayqa wajkunata sirvej, kausayniytapis qosaj ashkha runasta kacharichinaypaj” (Mat. 20:28).

    • “Jesustajrí nerqa: ‘Waj llajtaspipis Diospa Gobiernonmanta sumaj willaykunata willamunallaytaj tiyan, chaypajmin Diosqa kachamuwan’, nispa” (Luc. 4:43).

12. ¿Imata ruwaspataj agradecekuwaj Jesús qanrayku wañusqanmanta?

    • “Payqa tukuy runasrayku wañorqa. Ajinamanta kausajkunaqa, manaña paykunapajchu kausanankupaj. Astawanqa pichus paykunarayku wañorqa, kausarinporqataj chaypaj kausanankupaj” (2 Cor. 5:15).

13. ¿Jesús atiyniyojchu kamachinanpaj?

    • “Diosqa tukuy atiyta qowan cielopi, jinallataj kay jallpʼapipis” (Mat. 28:18).

    • “Diosqa payta churarqa, ñaupajpi karqa chaymanta aswan pataman. Chantapis Diosqa kʼacha kasqanrayku, tukuy sutismanta aswan patapi kaj sutita qorqa” (Fili. 2:9).

14. ¿Creenkichu Diospa Llajtanta Kamachejkuna “allin kamachi yuyayniyoj” kasqanta, paykunatataj Jesús churasqanta?

    • “¿Pitaj chay allin kamachi yuyayniyoj, pitachus patronnin churarqa kamachisninman tiemponpi mikhunata qonanpaj chay?” (Mat. 24:45).

15. ¿Espíritu santo uj runachu?

    • “Angeltaj kuticherqa: ‘Espíritu santo qanman jamonqa, Aswan Patapi kaj Diospa atiynin llanthuykusonqa. Ajinamanta chay nacej wawaqa Diospaj tʼaqasqa kanqa, Diospa Wawan nisqataj kanqa’” (Luc. 1:35).

    • “Sichus qankuna sajra runas kashaspa, allin imasta wawasniykichejman qoyta yachankichej chayqa, astawanrajchá cielopi kashaj Tataykichejqa espíritu santota qonqa mañakojkunaman” (Luc. 11:13).

16. ¿Imastataj Jehová espíritu santonwan ruwarqa?

    • “Cieloqa Jehová Diospa parlasqannejta ruwasqa karqa. Cielopi tukuy ima kajpis siminpa samaynillanwan [chayri espiritullanwan] ruwasqa karqa” (Sal. 33:6, sutʼinchaynin).

    • “Espíritu santo qankunaman jamojtin atiyta japʼinkichej, noqamantataj testigos jina willankichej [...] kay jallpʼaj tukuy kʼuchusnintinpi” (Hech. 1:8).

    • “Diosmanta Qhelqasqapi tukuy ima willakusqanqa mana runaj yuyayninmantachu jamusqanta. Diospa willasqanqa ni jaykʼaj runaj munayninmantachu jamorqa. Astawanqa runas espíritu santowan yuyaychasqa kaspa Diospa sutinpi parlarqanku” (2 Ped. 1:20, 21).

17. ¿Imataj Diospa Reinon?

    • “Cielopi kaj Diosqa uj gobiernota sayarichenqa, chay gobiernotaj ni jaykʼaj chinkachisqachu kanqa, nitaj waj nacionpa makinmanpis chayanqachu. Chay gobiernoqa, tukuy chay gobiernosta tʼunanqa, chinkachenqataj. Ajinamanta chay gobiernollaña wiñaypaj wiñaynintinpaj sayanqa” (Dan. 2:44).

18. ¿Ima bendicionestataj Diospa Gobiernon apamonqa?

    • “Payqa ñawisninkumanta tukuy waqayta pichanqa, manañataj wañuy kanqachu, nitaj llakiypis, nitaj waqaypis, nitaj nanaypis. Chay ñaupaj kaj imasqa chinkapunña” (Apo. 21:4).

19. ¿Imajtintaj nisunman chay bendiciones tumpamantawan chayamunanta?

    • “Discipulosnenqa qayllaykuspa sapallanpi taporqanku: ‘Willawayku: ¿Maykʼajtaj chay imas kanqari? Chanta, ¿ima señaltaj kanqa kutimunayki tiempomanta, kay mundoj imasninpa tukukuyninmantawanri?’, nispa. Jesustaj kuticherqa: ‘[...] Uj nacionqa waj nacionwan maqanakonqa, uj gobiernopis waj gobiernowan maqanakonqa. Kaynejpi jaqaynejpitaj yarqhaykuna, terremotos ima kanqa. Diospa Gobiernonmanta sumaj willaykunapis jallpʼantinpi willakonqa tukuy naciones yachanankupaj, chaypachamá tukukoyqa jamonqa’” (Mat. 24:3, 4, 7, 14).

    • “Qhepa pʼunchaykunapeqa kausay may llakiy kanqa, maytataj sajrayanqa. Runasqa paykunallata munakonqanku, qolqeta munakonqanku, alaracos kanqanku, jatunchakonqanku, Diospa contranta, wajkunaj contrantapis sajrata rimanqanku, tatasninkuta mana kasukonqankuchu, malagradecidos kanqanku, wasanchajkuna kanqanku, runa masinkuta mana munakonqankuchu, mana uj yuyayllaman chayayta munanqankuchu, wajkunamanta llullakuspa parlanqanku, munayninkuwan atipachikonqanku, manchay phiñas kanqanku, allin kajta mana munakonqankuchu, amigosninkoj contranpi sayaykonqanku, kʼullus kanqanku, mayta runaykachanqanku, Diosta munakunankumantataj munaynillankuta ruwanqanku, Diosta tukuy sonqo yupaychajkunaman rijchʼakullanqanku, manataj chayman jinachu kausanqanku” (2 Tim. 3:1-5).

20. ¿Imaynatá rikuchiwaj Diospa Gobiernonta jatunpaj qhawasqaykita?

    • “Ñaupajtaqa Diospa Gobiernonta, cheqan kaynintawan maskʼallaychejpuni” (Mat. 6:33).

    • “Jesusqa discipulosninta nerqa: ‘Sichus pipis qhepayta jamuyta munan chayqa, pay kikinta chejnikuchun, ñakʼarina kʼaspin aparisqataj qhepayta jamullachunpuni’” (Mat. 16:24).

21. ¿Pitaj Satanás, chanta pikunataj demonios kanku?

    • “Qankunaj tataykichejqa Diablo [...]. Payqa qallariymantapacha runa wañuchi karqa” (Juan 8:44).

    • “Chay jatun sierpetaqa uraman wijchʼuykamorqanku, chay ñaupa katarita, pichus sutichasqa Diablo, Satanastaj chayta. Payqa jallpʼapi kaj tukuy runasta chʼaukiyashan. Paytaqa jallpʼaman wijchʼuykamorqanku, angelesnintapis paytawan khuska wijchʼuykamullarqankutaj” (Apo. 12:9).

22. ¿Satanás imamantataj Jehovata, kamachisninta ima tumpasqa?

    • “Warmitaj katariman kuticherqa: ‘Atiyku mikhuyta huertapi kaj tukuynin sachʼaspa poqoyninta. Huerta chaupipi kaj sachʼaj poqoynillanmanta Diosqa niwayku: “Ama chaymanta mikhunkichejchu, nitaj llojchirillankichejpischu. Mikhunkichejchus chayqa, wañunkichej”, nispa’. Kataritajrí warmita nerqa: ‘Chayqa mana jinachu, mana wañunkichejchu. Diosqa yachan chay sachʼaj poqoyninta mikhojtiykichej, chay pʼunchaypacha sumaj yachayniyojman tukunaykichejta. Yachallantaj pay jina kanaykichejta, imachus allin, imatajchus mana allin kasqantapis yachanaykichejta’, nispa” (Gén. 3:2-5).

    • “Satanastaj Jehová Diosman nerqa: ‘Runaqa wañuy patapi kashaspa, kausananraykoqa imatapis qonanpaj jinalla’” (Job 2:4).

23. ¿Imaynatá rikuchisunman Satanás llulla kasqanta?

    • “Tukuy sonqotaj [Diosta] sirviy” (1 Cró. 28:9).

    • “Noqaqa paypa lastronta allinta qhatini, ñannintapis cheqanta rishani ni mayman wistʼuykuspa. Kamachisqasnintapis kasukuni, nisqasnintapis sumajta japʼikuni, kasukunitaj, niwasqanmantapis astawanraj” (Job 23:11, 12).

24. ¿Imaraykutaj wañunchej?

    • “Uj runanejta jucha kay mundoman yaykumorqa, juchanejtataj wañuy yaykumorqa. Ajinamanta wañoyqa tukuy runasman chayarqa, tukuyninku juchallikusqankurayku” (Rom. 5:12).

25. ¿Wañupuspa imatapis ruwasunmanchu?

    • “Kausaj runasqa yachanku wañunankuta, wañusqastaj ni imata yachankuchu” (Ecl. 9:5).

26. ¿Wañusqas kausarimonqankuchu?

    • “Suyakuni, cheqan runasta, mana cheqan runastapis Dios kausarichimunanta” (Hech. 24:15).

27. ¿Mashkha runastaj cieloman renqanku Jesuswan khuska gobernamunankupaj?

    • “Rikorqani Sion orqo patapi Corderota sayashajta, paywantaj 144.000 kasharqanku. Frentesninkupeqa qhelqasqa kashan paypa sutin, Tatanpa sutinpis” (Apo. 14:1).

Bibliata estudiashaspaqa, yachakorqanki imatachus Jehová ruwanaykita munasqanta, imaynatachus munayninman jina kausakunayki kasqantapis. Yachakusqaykiman jinataj, kausayniykita, caracterniykitapis cambiarqanki. Chay jinamanta requisitosta juntʼarqanki sumaj willaykunata willanaykipaj.

Qhepan tapuykunasqa yanapasonqa imatachus Jehová qanmanta suyasqanta yuyarikunaykipaj. Reparachisonqataj imastawanchus ruwayta atisqaykita Diospa kamachin kanaykipaj. Chantapis kay tapuykunasqa sutʼita reparachisonqa imaraykuchus llimphu sonqowan tukuy imata ruwanayki kasqanta Diosta jatunchanaykipaj (2 Cor. 1:12; 1 Tim. 1:19; 1 Ped. 3:16, 21).

Kunanqa maytachá munashanki Diospa Gobiernonpi kayta, Diospa llajtanpi kaytapis. Qhepan tapuykunas, chay uranpi rikhurej versiculospis, yanapasonqa entiendenaykipaj imatachus Biblia nisqanta Diosta kasukunamanta, congregacionmanta, familiamanta, politicamantapis. Chaytaj yanapasonqa imastachus Jehová llajtanta yachachinanpaj, kallpachananpaj ruwasqanta jatunpaj qhawanaykipaj. Ajinamanta mana reunionesmanta faltakuyta munankichu, astawanqa chaypi comentayta munanki.

Chantapis qhepan tapuykunasqa, reparachisonqa imaraykuchus sapa killa predicanapuni kasqanta, imaraykuchus Jehová imastachus runasrayku ruwashasqanmantapis yachachimuna kasqanta (Mat. 24:14; 28:19, 20). Chantapis sutʼita reparanki Diosman kausayninchejta jaywapuy, bautizakuy ima mana pujllakuy jinachu kasqanta. Jehová Diosqa may jatun khuyakuyniyoj, maytataj kusikun payta tukuy sonqo sirviyta munasqaykimanta.

1. ¿Imatá Biblia kamachin casarasqa kajkunaman? Biblia nisqanman jina, ¿ima kajtillantaj divorciakuyta atinkuman?

   • “¿Manachu leerqankichej Diosqa runata qallariypi qharitawan warmitawan ruwasqanta? Nerqataj: ‘Chayrayku qhareqa tatanta, mamantawan saqespa warminman ujchaykukonqa, iskayninkutaj ujllaña kanqanku’, nispa. Ajinapeqa manaña iskaychu kanku, manachayqa ujllaña. Chayrayku Diospa ujchasqantaqa ama pipis tʼaqachunchu”. “Pillapis warminmanta divorciakuspa wajwan casaraykun chayqa, qhenchachakun. Warmin khuchichakuy juchaman urmajtillan divorciakuyta atin” (Mat. 19:4-6, 9).

2. ¿Imaraykutaj qhariwarmis leyesman jina civilmanta casarananku tiyan? ¿Leyman jinachu civilmanta casarasqa kashanki?

   • “Hermanosta yuyarichillaypuni kamachejkunata kasukunankuta, jinallataj autoridadestapis” (Tito 3:1).

   • “Qhariwarmi kausaytaqa tukuypis jatunpaj qhawachunku. Casarasqaspa puñunankupis llimphu kachun. Imaraykuchus Diosqa khuchichakoj runasta, qhenchachakojkunatapis juzganqa” (Heb. 13:4).

3. ¿Imaynatá familiaykipi yanapakuwaj sumajta kausakunaykichejpaj?

   • “Wawáy, japʼikuy tataykej yuyaychasusqanta, amataj pisipaj qhawaychu mamaykej yachachisusqantaqa” (Pro. 1:8).

   • “Qosaqa warminpa uman, imaynatachus Cristopis congregacionpa uman ajina. [...] Qosas, warmiykichejta munakullaychejpuni, imaynatachus Cristopis congregacionta munakorqa ajinata” (Efe. 5:23, 25).

   • “Tatas, ama wawasniykichejta phiñachiychejchu. Astawanpis paykunata uywaychej, Jehová Dios nisqanman jina cheqanchaspa, yachachispataj” (Efe. 6:4).

   • “Wawas, tataykichejta, mamaykichejtawan tukuy imapi kasuychej. Imaraykuchus chayqa, Señorta mayta kusichin.” (Col. 3:20).

   • “Qankunapis casarasqa warmis, qosaykichejta kasukuychej” (1 Ped. 3:1).

4. ¿Imaraykutaj kausayta jatunpaj qhawananchej tiyan?

   • “Diosqa tukuy runasman kausayta qon, samayta, tukuy imastawan. [...] Paynejta kausanchej, kuyunchej, kanchejtaj” (Hech. 17:25, 28).

5. ¿Imajtintaj mana pitapis wañuchinachu? ¿Imajtintaj manaraj nacekoj wawitata mana wañuchinachu?

   • “Sichus iskay runas maqanakushaspa uj onqoj warmita japʼirparichinkuman, [...] sitajchus chay warmi chayri wawitan wañunman chayqa, chay wañuchej runaqa kausayninwan paganqa” (Éxo. 21:22, 23).

   • “Ñawisniykeqa rikuwarqankuña mamaypa wijsanpi rikhurishajtiy. Libroykipi qhelqasqaña kasharqa cuerpoypa tukuy imasnin, willasharqaña maykʼajchus ruwasqa kanankuta, niraj ni mayqenninku ruwasqa kashajtinpis” (Sal. 139:16).

   • “Jehová Diosqa chejnikun [...] mana juchayoj runata wañuchej makista” (Pro. 6:16, 17).

6. ¿Imatá Dios niwanchej yawarmanta?

   • “Qhesachallaychejpuni [...] yawarta, sipisqa animalesta” (Hech. 15:29).

7. ¿Imaraykutaj tukuy hermanosninchejta munakunanchej tiyan?

   • “Uj mosoj kamachiyta qoykichej: Purajmanta munanakuychej. Imaynatachus noqa munakorqaykichej ajinallatataj qankunapis purajmanta munanakuychej. Qankunachus purajmanta munanakunkichej chayqa, tukuy yachanqanku discipulosniy kasqaykichejta” (Juan 13:34, 35).

8. 1) Contagioso onqoyniyoj kaspa, ¿imaraykutaj saludashaspa mana pitapis muchʼaykunachu, nitaj abrazaykunachu kanman? 2) ¿Onqoyninchejrayku pillapis mana wasinman wajyariwajtinchej phiñakunachu kanman? 3) Pillapis sinchʼi onqoyta contagiachikunanpaj jina karqa chay, ¿imaraykutaj allin kanman yawarmanta analisista ruwachikunan manaraj noviashajtin? 4) Contagianapaj jina onqoyniyoj kaspa, ¿imaraykutaj chayta willananchej tiyan coordinador nisqa ancianoman manaraj bautizakushaspa?

   • “Ama pimanpis manu kaychejchu, astawanqa purajmanta munanakuyllamanta manu kaychej. [...] ‘Runa masiykita munakunayki tiyan qan kikiykita jina’. Munakuyniyoj runaqa mana ima sajratapis runa masinta ruwanchu” (Rom. 13:8-10).

   • “Ama allinnillaykichejtaqa maskʼaychejchu. Manachayqa wajkunaj allinninkutapis maskʼaychej” (Fili. 2:4).

9. ¿Imaraykutaj Jehová munan wajkunata perdonananchejta?

   • “Wajkuna contraykichejpi imata ruwajtinkupis, ujkuna ujkunawan aguantanakullaychejpuni, tukuy sonqotaj perdonanakuychej. Imaynatachus Jehová Dios qankunata tukuy sonqo perdonasorqachej, ajinallatataj qankunapis perdonanakuychej” (Col. 3:13).

10. ¿Imatá ruwanayki kanman uj hermano chʼaukiyasojtin chayri qhasimanta tumpasojtin?

    • “Sichus hermanoyki contraykita juchallikun chayqa, rispa pantasqanta sapallanpi sutʼinchamuy. Uyarisonqa chayqa, hermanoykita cheqan ñanman kutirichinki. Mana uyarisojtenqa, ujta chayri iskayta pusakuy. Ajinamanta iskay chayri kinsa testigospa nisqankuwan tukuy ima sutʼinchakunanpaj. Paykunata mana uyarejtenqa congregacionman willay. Congregaciontapis manallataj uyarejtenqa, nacionesmanta runata jinallaña qhaway, impuesterota jinataj” (Mat. 18:15-17).

11. ¿Imaynatá Jehová Dios qhawan kay juchasta?

    • ▪ Khuchichakuy juchata

    • ▪ Santosta chayri waj imasta yupaychayta

    • ▪ Qharipura chayri warmipura puñuykuyta

    • ▪ Suwakuyta

    • ▪ Apostayta chayri qolqerayku pujllayta

    • ▪ Machaykuyta

    • “Ama chʼaukiyakuychejchu. Imaraykuchus khuchichakojkuna, santosta yupaychajkuna, qhenchachakojkuna, qhari kashaspa warmiman tukojkuna, qharipura puñuykojkuna, suwakojkuna, munapayajkuna, machajkuna, wajkunapaj sajrata parlajkuna, sutʼi suwaspis manapuni Diospa Gobiernonta herenciata jina japʼenqankuchu” (1 Cor. 6:9, 10).

12. Wajwan puñuykunaykipaj chayri waj khuchi imasta ruwanaykipaj tanqasojtinku, ¿imatá ruwawaj?

    • “Khuchichakuy juchamanta ayqeychej” (1 Cor. 6:18).

13. Doctor mana nishallawajtinchej, ¿imaraykutaj viciota japʼichikoj jampista chayri drogasta mana tomanachu kanman? Chanta, ¿imaraykutaj mana cocata akullinachu, nitaj cigarrotapis pitanachu kanman?

    • “Mañakuykichej: Cuerpoykichejta Diosman jaywanaykichejta kausashaj jaywanata jina, paypa qhawayninpi llimphuta, payta kusichinanpaj jinataj. Ajinamanta Diosta sirvinkichej tukuy yuyayniykichejwan. Amaña kay tiempo runas kausasqankuman jinaqa kausaychejchu. Astawanpis yuyayniykichejta mosojyachispa mosoj runaman tukuychej. Ajinamanta qankunallataj sutʼita reparankichej Diospa munaynenqa kʼacha, cheqan, payta kusichinanpaj jinataj kasqanta” (Rom. 12:1, 2).

14. ¿Imatá Dios niwanchej layqeriosmanta?

    • “Ama ni mayqenniykichejpis [...] adivinos kankichejchu, ama magiata ruwankichejchu, ama suerteta qhawankichejchu, nitaj layqaspis kankichejchu. Amallataj wajkunata layqachinkichejchu, ama aysirista tapukunkichejchu, nitaj adivinostapis, nillataj aysirispis kankichejchu” (Deu. 18:10, 11).

15. Uj cristiano jatun juchapi urmaspa, ¿imatá chay ratopacha ruwanan tiyan Jehovawan allinyakunanpaj?

    • “Juchayta willakorqayki. Pantasqaytaqa mana pakarqaykichu. Noqa nerqani: ‘Jehová Diosman pantasqasniyta willakusaj’, nispa” (Sal. 32:5).

    • “Qankuna ukhupi, ¿pillapis onqosqachu kashan? Congregacionmanta ancianosta wajyakuchun. Paykunataj Diosmanta mañapuchunku, Jehová Diospa sutinpi aceitewan jawiykuspa. Creespa mañakoyqa chay onqosqata sanoyachenqa, Jehová Diostaj payta sayarichenqa. Sichus juchallikorqa chaypis, perdonasqa kanqa” (Sant. 5:14, 15).

16. ¿Imatá ruwanayki kanman uj cristiano jatun juchapi urmasqanta yachaspa?

    • “Sichus pipis rikunman mayqen runallatapis juchata ruwashajta chayri chay juchamanta yachanman chayqa, chay patapitaj uyarinman testigosta wajyashasqankuta chay jucha sutʼinchakunanpaj, nitaj declaraj rinmanchu chayqa, chay runaqa juchayoj rikhurenqa, chay juchanmantataj cuentata qonqa” (Lev. 5:1).

17. Congregacionpi uj hermano “manaña Jehovaj testigonchu” nispa willakojtin, ¿payta hermanonchejta jinallapunichu qhawananchej tiyan?

    • “Qhelqamushaykichej amaña purinaykichejta, pichus hermano kani nishaspa khuchichakojwan, munapayajwan, santosta yupaychajwan, wajkunapaj sajrata parlajwan, machajwan chayri sutʼi suwawan. Chay jina runawanqa ama mikhullaychejpischu” (1 Cor. 5:11).

    • “Sichus pipis qankunaman jamuspa mana Cristoj yachachisqanman jinachu yachachin chayqa, ama chay runata wasiykichejpi japʼikuychejchu, nitaj napaykullaychejpischu” (2 Juan 10).

18. ¿Imaraykutaj Jehovata munakojkunalla sumaj amigosninchej kananku tiyan?

    • “Allin yachayniyoj runaswan purejqa allin yachayniyojllataj kanqa. Mana yuyayniyojkunawan purejtaj mana allinman chayanqa” (Pro. 13:20).

    • “Ama chʼaukiyachikuychejchu. Mana allin runaswan pureyqa, allin ruwayman yachasqa kasqanchejta chinkachin” (1 Cor. 15:33).

19. ¿Imaraykutaj Jehovaj testigosnin mana politicaman satʼikunchejchu?

    • “Paykunaqa mana kay mundomanta runas jinachu kanku, imaynatachus noqapis mana kay mundomanta runas jinachu kani ajinata” (Juan 17:16).

20. ¿Imaraykutaj autoridadesta kasukunanchej tiyan?

    • “Tukuy runas autoridadesta kasuchunku. Manachus Dios autoridades kanankuta saqenman chayqa, mana autoridades kanmanchu. Tukuy autoridadesqa Diospa churasqan kanku” (Rom. 13:1).

21. Autoridadespa kamachiykunasnin Diospa kamachiykunasninwan churanakojtin, ¿mayqentá kasukunanchej tiyan? 

    • “Noqaykoqa Diostapuni kamachejniykuta jina kasunayku tiyan runasta kasunaykumantaqa” (Hech. 5:29).

22. ¿Ima versiculostaj yanapawasunman mana kay mundoman chhapusqa trabajota japʼikunapaj?

    • “Nacionesqa manaña espadawan maqanakonqankuchu, manañataj guerrapi maqanakunankupaj yachakonqankuchu” (Miq. 4:3).

    • “Llojsipuychej chay [Jatun Babilonia] llajtamanta noqajta kajkuna, sichus mana munankichejchu chay llajtawan khuska juchallikuyta chayqa, sitajchus mana munankichejchu paypa castigosninwan castigasqa kayta chayqa” (Apo. 18:4).

23. ¿Imaswantaj kusirikusunman, imaswantaj mana?

    • “Jehová Diosqa [...] chejnikun maqanakusta gustachikojkunata” (Sal. 11:5).

    • “Sajra kajtaqa chejnisqata chejnikuychej, allin kajmantaj kʼaskaykuychej” (Rom. 12:9).

    • “Kay imaspi yuyallaychejpuni: tukuy ima cheqa kajpi, tukuy ima jatunpaj qhawasqa kajpi, tukuy ima cheqan kajpi, tukuy ima llimphu kajpi, tukuy ima kʼacha kajpi, tukuy ima sumajpaj qhawasqa kajpi, tukuy ima allin kajpi, jinallataj jatunchanapaj jina kaj imaspipis” (Fili. 4:8).

24. ¿Imaraykutaj Jehovaj testigosnin mana waj religionesman chhapukunchejchu?

    • “Nillataj atinkichejchu, ‘Jehová Diospa mesanmanta’ mikhushaspa, demoniospa mesanmantapis mikhuyta” (1 Cor. 10:21).

    • “Jehová Diosqa nillarqataj: ‘[...] Tʼaqakuychej[...]. Amaña chʼichipaj qhawasqa imasta llankhaychejchu’, ‘noqataj japʼikapusqaykichej’” (2 Cor. 6:17).

25. ¿Bibliamanta ima yuyaychaykunataj yanapasunkiman uj fiestaman rinaykitachus manachus ajllanaykipaj?

    • “Paykunaqa chay nacioneswan chajrukorqanku, paykuna jinataj purerqanku. Chay nacionespa diosesninkuta yupaychaspa karqanku. Chaytaj paykunapaj trampanku karqa” (Sal. 106:35, 36).

    • “Wañusqastaj ni imata yachankuchu” (Ecl. 9:5).

    • “Paykunaqa mana kay mundomanta runas jinachu kanku, imaynatachus noqapis mana kay mundomanta runas jinachu kani ajinata” (Juan 17:16).

    • “Qankunaqa unaytaña nacionespa munayninta ruwarqankichej. Chaypachaqa purej kankichej: mana pʼenqakuspa juchata ruwaypi, sajra imasta munapayaypi, machaykunapi, millay fiestaspi, machana fiestaspi, santosta millayta yupaychaypipis” (1 Ped. 4:3).

26. Imatachus Biblia cumpleañosmanta nisqanta yachaspa, ¿cumpleañosta ruwanachu kanman?

    • “Chaymanta kinsa pʼunchayninman, faraonpa dian karqa. Faraontaj tukuy kamachisninpaj jatun mikhuyta waykʼucherqa. Chay runaspa rikunantataj coperospa kamachejninkuta orqhochimorqa, jinallataj tʼantata ruwajkunaj kamachejninkutapis. Coperospa kamachejninkutaqa watejmanta churarqa copero kananpaj. [...] Tʼantata ruwaj runatataj rakhu kʼaspiman warkhuchimorqa” (Gén. 40:20-22).

    • “Herodesta diachashajtinkutaj, Herodiaspa warmi wawan tusorqa. Chaytaj Herodesta mayta kusicherqa. Chayrayku juraspa chay sipasman nerqa imatachus mañakusqanta qonantapuni. Sipastaj maman matʼiykusqanrayku mañakorqa: ‘Juan Bautistaj umanta charolapi qoway’, nispa. Chayrayku [Herodesqa] carcelpi Juanpa umanta qholuchimorqa” (Mat. 14:6-8, 10).

27. ¿Imaraykutaj ancianosta kasukuyta munanki?

    • “Qankunata ñaupajman pusasunkichej chaykunata kasukuychej, kamachiyninkupitaj kaychej. Paykunaqa allinniykichejpaj qhawashallasunkichejpuni. Chay ruwayninkumantaqa Diosman cuentata qonanku kanqa. Ajinamanta paykunaqa ruwanankuta kusiywan ruwanqanku, manataj llakisqaschu. Imaraykuchus chayqa mana qankunapaj allinchu kanman” (Heb. 13:17).

28. ¿Imaraykutaj tiempochakunaykipuni tiyan sapallaykipi, chayri familiaykiwan Bibliata leenaykipaj, estudianaykipaj ima?

    • “Jehová Diospa leyninta mayta munakun. Tuta pʼunchay Diospa leyninta leerispa tʼukurin. Chay runaqa kanqa correshaj yaku kantupi plantasqa sachʼa jina, tiemponpi poqoj sachʼa jina, laqhesnin mana qawipoj sachʼa jina. Tukuy ima ruwasqanpitaj allin renqa” (Sal. 1:2, 3).

29. ¿Imaraykutaj tantakuykunaman riy, chaypitaj comentay gustasunki?

    • “Diosníy, sutiykita hermanosniyman willasaj, congregación chaupipi jatunchasqayki” (Sal. 22:22).

    • “Ujkuna ujkunawan purajmanta qhawarinakunachej, ajinamanta astawan munakuy kananpaj, allin ruwaykunatataj ruwananchejpaj. Amataj tantakuykunaman riyta saqenachu, imaynatachus wakinkuna yachaykukunku ajinataqa. Astawanpis purajmanta kallpachanakuna, astawanraj Diospa pʼunchaynin qayllaykamushasqanta reparaspa” (Heb. 10:24, 25).

30. ¿Ima sumaj llankʼaytataj Jesús qowanchej?

    • “Chayrayku riychej, tukuy nacionesmanta runasta discipulosniyman tukuchimuychej. Paykunata bautizamuychej [...] kasukuyta yachachimuychej imastachus noqa kamacherqaykichej chay tukuy imasta” (Mat. 28:19, 20).

31. ¿Imayna sonqowantaj Jehová munan kapuyninchejwan yanapakunanchejta?

    • “Jehová Diosta jatunchay valorniyoj imasniykiwan” (Pro. 3:9).

    • “Sapa uj sonqonpi yuyasqanman jina ruwachun, mana llakikuspa, nitaj obligasqa jinachu. Imaraykuchus Diosqa kusiywan qojta munakun” (2 Cor. 9:7).

32. ¿Ima llakiykunapitaj cristianos rikukunanchej kashan?

    • “Kusisqa kanku cheqan kajrayku qhatiykachasqa kajkunaqa, cielopi kaj Gobierno paykunajta kasqanrayku. Kusisqa kankichej runas noqarayku rimasojtiykichej, qhatiykachasojtiykichej, llullakuspa imaymana sajrata qankunamanta parlajtinkupis. Kusikuychej jatun kusiywan, cielopi tʼinkaykichejqa jatun. Runasqa ajinallatataj qhatiykacharqanku ñaupa profetastapis” (Mat. 5:10-12).

33. ¿Imaraykutaj ni imawan kikinchakunchu Jehovaj testigon kay, bautizakuy ima?

    • “Palabrasniykeqa sonqoypi kusiyman tukorqa, manchay jatun kusiyman tukorqa. [...] Jehová Diosníy, noqamin sutiykita apani” (Jer. 15:16).