Cristiano tatamamaspaj yuyaychaykuna

Tata chayri mama kanki chayqa, munashankichá wawasniyki Jehová Diosta munakunankuta, kausayninkutataj payman jaywapunankuta. ¿Imaynatá wawasniykichejta yanapawajchej bautizakunankupaj? ¿Imaynatá reparawajchej bautizakunankupaj wakichisqañachus manachus kasqankuta?

Jesusqa discipulosninman kamacherqa: “Tukuy nacionesmanta runasta discipulosniyman tukuchimuychej. Paykunata bautizamuychej”, nispa (Mat. 28:19). Chayrayku pillapis bautizakunanpajqa, ñaupajta Cristoj discipulonmanraj tukunan tiyan. Cristoj discipulonqa mana paypi creellanchu, nitaj yachachisqanta allinta entiendellanchu, manachayqa kamachiykunasninta kasukun. Wawaspis chayta ruwayta atillankuman.

Tatamamas, wawasniykichejpaj sumaj ejemplos kaychej, yachachiychejtaj Jehová Diospa kamachiykunasninta (Deu. 6:6-9). Wawasniykichejman Wiñaypaj kusisqa kausakuy librowan yachachiychej. Ajinamanta imatachus Biblia yachachisqanta yachanankupaj, chayman jinataj kausakunankupaj. Chantapis yanapaychej imapichus creesqankuta sapallanku sutʼinchanankupaj (1 Ped. 3:15). Wawasniykichejta yachachejtiykichej, kallpachajtiykichej, familiapitaj Diosta yupaychajtiykichejqa, paykuna ñaupariyta munanqanku. Chantapis tantakuykunaman rejtinku, congregacionpi sumaj amigosta maskʼakojtinku, sapallankupitaj Bibliata estudiajtinku, paykuna bautizakuyta munanqanku, ñauparillanqankupunitaj. Chayrayku wawasniykichejta tʼukurichiychej imastawanchus Jehovapaj ruwayta atisqankupi.

Proverbios 20:11 nin: “Uj wawapis ruwasqasninpi rejsichikun, cheqantachus purishasqanta manachus, llimphu kausayniyojchus manachus kasqantapis”, nispa. ¿Imaynatá reparawaj wawayki bautizakunanpaj wakichisqañachus manachus kasqanta?

Bautizakuyta munaj wawaqa tatasninta kasukunan tiyan (Hech. 5:29; Col. 3:20). Bibliaqa nin Jesús 12 watasniyoj kashajtin tatasninta kasukullasqantapuni (Luc. 2:51). Mana suyananchejchu tiyan wawasninchej ni jaykʼaj pantanankuta. Jinapis bautizakuyta munajqa, Jesús jina ruwananpaj kallpachakun, tatasninta kasukusqanraykutaj rejsisqa.

Chantapis Bibliamanta astawan yachakuyta munasqanta rikuchinan tiyan (Luc. 2:46). Wawayki, ¿tukuy sonqochu tantakuykunaman rin, comentananpajpis wakichikunchu? (Sal. 122:1). Chantapis, ¿gustachikunchu Bibliata leespa, sapallanpitaj estudiaspa? (Mat. 4:4).

Bautizakuyta munaj wawaqa, Diospa Gobiernonta ñaupajman churan Ñaupajtaqa Diospa Gobiernonta, cheqan kaynintawan maskʼallaychejpuni, chay tukuy imastataj yapata jina qosonqachej (Mat. 6:33). Runasman willamuytapis jatunpaj qhawan. Chayrayku kallpachakun tukuy imaymanamanta willananpaj. Mana pʼenqakuspataj profesoresninman, compañerosninmanpis Jehovaj testigon kasqanta willan. Chantapis sumajta wakichikun Cristiano Kausayninchej tantakuypi asignacionesninta ruwananpaj.

Chantapis llimphu kausayniyoj kananpaj kallpachakun, manataj mana allinta purejkunawan tantakunchu (Pro. 13:20; 1 Cor. 15:33). Chaytaj rikukun ima musicastachus uyarisqanpi, ima peliculastachus qhawasqanpi, ima videojuegostachus pujllasqanpi, imaynatachus Internetta apaykachasqanpipis.

Ashkha wawasqa tatasninku yanapasqankurayku, cheqa kajta tukuy sonqo japʼikorqanku. Chay jinamanta bautizakunankupaj wakichisqaña karqanku. Tatamamas, kallpachakullaychejpuni wawasniykichejta bautismoman chayanankupaj yanapanaykichejpaj. Jehová Diostaj mayta bendecisonqachej.

Manaraj bautizasqa publicadorespaj yuyaychaykuna:

Manaraj bautizasqa kaspapis, congregacionpi publicador jina llankʼayqa uj jatun privilegio. Chay jinata ñauparisqaykimanta mayta kusikuyku. Qanqa Bibliata estudiaspa Diosta rejserqanki, imastachus noqanchejrayku ruwananpitaj (Juan 17:3; Heb. 11:6).

Manaraj Jehovaj testigosninwan estudiashaspaqa, ichapis uj iglesiaman rej kanki chayri mana. Chantapis ichá imastachus Biblia juchachan chay imasta ruwaj kanki. Kunantaj Bibliaj nisqasninpi creesqaykirayku ñaupa kausayniykimanta maytachá pesachikunki. Diosman kutirikuspataj chay ñaupa kausayniykita saqepunki, Diospa munaynillantataj ruwayta munashanki (Hech. 3:19).

Ichá “nacekusqaykimantapacha Diospa qhelqasqa Palabranta” rejserqanki. Jina kajtenqa, nichá Bibliaj juchachasqan imasta ruwarqankichu chayri mana jatun juchapi urmarqankichu (2 Tim. 3:15). Chantapis yachakorqanki sinchʼita sayayta compañerosniyki sajra ruwayman tanqasojtinku. Yachakullarqankitaj mana ima juchapi urmayta. Imaspichus creesqaykita wajkunaman willaspataj, Diospi creesqaykita rikucherqanki. Qanta wakichisorqanku sumaj cristiano kanaykipaj. Chayrayku kunanqa mana bautizasqa kaspapis, Jehová Diosta publicador jina sirvishanki.

Kunallanraj Diosmanta yachakorqanki chayqa, chayri wawamantapacha yachakorqanki chaypis, ichá kunan piensashanki Diosman kausayniykita qopuypi, bautizakuyta ima. Diosman kausayniykita qopunaykipajqa, uj mañakuypi ninayki tiyan payllapajña kausanaykita (Mat. 16:24). Diosman kausayniykita qopusqaykita rikuchinaykipajtaj, yakupi bautizakunki (Mat. 28:19, 20). Diosman kausayniykita qopuspa, bautizakuspataj Jehovaj testigonman tukunki. Chayqa may sumaj.

Bibliata estudiashaspa yachakorqanki jina, ichá bautizakusqaykitawan ashkha llakiykunapi rikukunki. Yuyarikuy, Jesús bautizakusqantawan, “Diospa espiritonqa Jesusta chʼinnejman pusarqa, chaypitaj Diabloqa juchaman urmachiyta munarqa” (Mat. 4:1). Chayrayku qanpis ichá bautizakusqaykitawan ashkha llakiykunapi rikukunki (Juan 15:20). Ichapis familiayki churanakusonqa (Mat. 10:36). Ichá trabajomanta chayri escuelamanta compañerosniyki chayri ñaupa amigosniyki kʼumuykachachisonqanku. Jesuspa nisqanta ama qonqaychu. Payqa Marcos 10:29, 30 versiculospi nerqa: “Cheqatapuni niykichej: Pichus noqarayku jinallataj sumaj willaykunarayku wasinta, hermanosninta, hermanasninta, mamanta, tatanta, wawasninta, jallpʼasnintapis saqen chayqa, kay tiempopi pachaj jinastawanraj japʼenqa: wasista, hermanosta, hermanasta, mamasta, wawasta, jallpʼastawan qhatiykachasqa kaspapis. Jamoj tiempopitaj wiñay kausayta japʼenqa”, nispa. Chayrayku kallpachakullaypuni Diospa qayllallanpipuni kanaykipaj, cheqan kamachiykunasninman jinataj kausakunaykipaj.

Bautizakuyta munaspaqa, congregacionniykimanta coordinador nisqa ancianoman chayta willay. Chantá ancianosqa qhepan paginaspi rikhurej tapuykunasta ruwasonqanku, bautizakunaykipaj wakichisqañachus manachus kasqaykita yachanankupaj. Chayrayku walej kanman kunanmantapacha sapallaykipi chay tapuykunata ukhuncharinayki.

Tapuykunasman kutichinaykipaj wakichikushaspaqa, tukuynin textosta leerinaykipaj, chaypitaj tʼukurinaykipaj tiempochakuy. Anotakuyta munaspaqa, kay folletopi chayri uj cuadernopi anotakuwaj. Ancianos tapushasojtinkoqa, anotakusqaykita qhawaykuyta atinki, folletotapis kicharisqata japʼiyta atinki. Wakin tapuykunata mana entiendespaqa, mana manchikuspa estudiachishasunki chay hermanota chayri mayqen ancianollatapis tapurikuy.

Ancianos tapuykunata ruwashasojtinkoqa, pisi parlayllapi kutichiy, mana leespallataj. Wakin tapuykunaman kutichishaspataj, walej kanman uj chayri iskay versiculosta oqharispa kutichinayki.

Sichus ancianos reparanqanku Bibliaj yachachiykunasninta manaraj allintachu entiendesqaykita chayqa, astawan yachakunaykipaj yanapasunankuta nenqanku. Ajinamanta sutʼita entiendespa sonqomantapacha kutichinaykipaj, aswan qhepamantaj bautizakunaykipaj.

[Ancianospaj: Kay 55 al 60 paginaspi ancianospaj instrucciones kashan, imaynatachus bautizakuyta munajkunata tapunaykichejpaj].