¿Jehovaj testigosninta rejsiwaykuchu? Wakenqa vecinosniyki kayku. Wakintaj llankʼaypi chayri colegiopi qanwan khuska kashayku. Ichá qanwan Bibliamanta parlarerqayku. Chanta, ¿imayna runastaj kayku? ¿Imaraykú runaswan creeyniykumanta parlariyku?

Qan jina runallataj kayku. Tukuy llajtasmanta kayku, imaymana kausayniyojtaj. Niraj Jehovaj testigonman tukushaspa, wakenqa waj religionpi karqayku, wakintaj mana Diospi creerqaykuchu. Chaywanpis sapa ujniyku Bibliaj yachachisqanta sumajta estudiarqayku (Hechos 17:11). Chay yachakusqaykuta tukuy sonqo japʼikuspataj, Jehová Diosta yupaychayta qallarerqayku.

Bibliawan yanapachikuyku. Tukuy runas jina, llakiykunasniyoj kayku, pantaykutaj. Chaywanpis Bibliaj yuyaychasqanman jina kausanaykupaj kallpachakusqaykurayku, aswan kusisqa kausakuyku (Salmo 128:1, 2). Chayraykutaj Bibliamanta yachakusqaykuta runasman willariyku.

Diospa yuyaychasqanta kasukuyku. Bibliaj yachachisqanqa kusisqa kanaykupaj yanapawayku. Chantapis runa masiykuta jatunpaj qhawanaykupaj, cheqan kajta ruwanaykupaj, kʼachas kanaykupaj ima yanapawayku. Bibliaj yuyaychasqanqa, allin runas kanaykupaj, wajkunaj allinninkuta maskʼanaykupaj ima yanapallawaykutaj. Chantapis llimphu kausayniyoj kanaykupaj, familiasniyku ujchasqa kananpaj ima yachachiwayku. Noqaykoqa yachayku Diosninchej “tukuy runasta uj rejllata qhawasqanta”. Chayrayku maymanta kaspapis uj familia jina kayku. Noqaykutaqa ni politicapis tʼaqawaykuchu. Arí, uj kʼata llajta kayku (Hechos 4:13; 10:34, 35).

• Jehovaj testigosnin, ¿imaspitaj tukuy runasman rijchʼakuyku?

• Bibliaj yuyaychasqasninwan, ¿imaynatataj yanapachikuyku?

Runasqa Jehovaj testigosnin kunallanraj rikhurisqaykuta ninku. Jinapis Jehová Diospa testigosnenqa 2.700 watas ñaupajtaña karqanku (Isaías 43:10-12). Niraj 1931 wata kashajtin, Bibliamanta Yachaqajkuna sutiwan rejsisqa karqayku. Chayrayku imaraykuchus Jehovaj testigosnin sutita ajllasqaykuta qhawarina.

Sutiykoqa pichus Diosniyku kasqanta rikuchin. Biblia qhelqakushajtin Diospa sutenqa 7.000 kuraj kutista Bibliapi rikhurerqa. Chaywanpis kunanqa ashkha Bibliaspi, Jehová suti rikhurinanmantaqa “Tata Dios” chayri “Señor” palabraslla rikhurin. Diosqa Moisesman Jehová sutiwan rejsichikorqa, nerqataj: “Kay suteyqa wiñaypaj”, nispa (Éxodo 3:15). Jinamanta mana llulla dioses kikinchu kasqanta rikucherqa. Noqaykoqa Diospa sutinwan rejsichikuyta jatunpaj qhawayku.

Sutiykoqa imatachus ruwasqaykuta rikuchin. Kasukoj runa Abelmantapacha, ashkha runas Jehová Diospi creerqanku. Watas pasasqanman jinataj Noé, Abrahán, Sara, Moisés, David, wajkuna ima, ‘chay chhika testigosman’ yapakorqanku (Hebreos 11:4–12:1). Imaynatachus uj testigo, juezpa ñaupaqenpi uj runa mana juchayoj kasqanta sutʼinchan, ajinallatataj noqaykupis Diosmanta cheqan kajta sutʼinchayku.

Jesús jina ruwayku. Bibliaqa Jesús “cheqa sonqo, cheqan kaj testigotaj” kasqanta nin (Apocalipsis 3:14). Arí, Jesusqa Tatanpa sutinta rejsichisqanta nerqa. Chantapis Diosmanta ‘cheqa kajta willananpaj’ jamusqanta nillarqataj (Juan 17:26; 18:37). Chayrayku cheqan cristianosqa, Diospa sutinta willananku tiyan, chay sutiwantaj rejsichikunanku tiyan. Chayta ruwanaykupajtaj kallpachakuyku.

• ¿Imaraykutaj Jehovaj testigosnin sutita ajllasqayku?

• ¿Maykʼajmantapachataj Jehovaj testigosnin kay jallpʼapi kasqanku?

• ¿Pitaj “cheqa sonqo, cheqan kaj testigotaj”?

Bibliaqa nerqaña Jesucristo wañupusqantawan, cristianos ukhullamantataj llulla imasta yachachejkuna rikhurinankuta. Paykunaqa “cheqa kajta qʼewispa” yachachinanku karqa (Hechos 20:29, 30). Chaytaj juntʼakorqapuni. Llulla yachachejkunaqa, Jesuspa yachachiyninta llulla dioskunata yupaychaywan chajrorqanku. Jinamantataj llulla cristianos rikhurerqanku (2 Timoteo 4:3, 4). Chanta, ¿imaraykutaj Bibliamanta cheqatapuni entiendesqaykuta niyku?

Jehová Dios cheqa kajta sutʼincharqa. Diosqa tukukuy pʼunchaykunapi ‘cheqa yachay ashkhayananta’ nerqa (Daniel 12:4, NM). Kay 1870 watapi, uj grupito cheqa yachachiyta maskʼarqanku. Ajinapitaj repararqanku iglesias mana Bibliamantachu yachachisqankuta. Chayrayku Bibliaj yachachiykunasninta estudiarqanku, Jehová Diostaj cheqa kajta entiendenankupaj yanaparqa.

Llampʼu sonqo runas, Bibliata sumajta estudiarqanku. Paykunaqa Bibliaj yachachiykunasninta ujmanta uj ukhuncharqanku. Bibliamanta uj cheqata mana entiendespa, chaymanta parlaj versiculosta maskʼaj kanku. Chay yachachiy, Bibliaj waj yachachiykunasninwan mana churanakusqanta reparaspataj, chayta qhelqaykoj kanku. Biblia sapallanmanta sutʼinchakunanta saqerqanku. Chayrayku Diospa sutinmanta, Gobiernonmanta, imatachus runaspaj munasqanmanta, wañusqasmanta, kausarimuymanta ima cheqa kajta yacharqanku. Chay yachakusqankoqa, pantasqa creenciasmanta, mana allin ruwaykunamantawan kacharicherqa (Juan 8:31, 32). Kunankamapis ajinallatapuni ruwayku.

Kay 1879 watapi, Bibliamanta Yachaqajkunaqa imatachus yachakusqankuta jallpʼantinpi willananku kasqanta entienderqanku. Chayrayku chay watapacha Torremanta Qhawaj. Jehová Diospa Gobiernonmanta willashan nisqa revistata orqhorqanku, chaytaj orqhokushallanpuni. Kunanqa 240 suyuspi Diosmanta willakushan, 750 kuraj parlaykunapitaj. Arí, tukuynejpipuni willakushan.

• Jesús wañupusqantawan, ¿imataj rikhurinan karqa?

• ¿Imatataj ruwasqanku Bibliamanta Yachaqajkuna?

Jehovaj testigosnenqa imaymana Bibliasta unayta apaykacharqayku, runasman jaywanaykupajpis imprimicherqayku. Jinapis Diosqa munan tukuy runas ‘cheqa kajta allinta rejsinankuta’. Chayrayku repararqayku tukuy entiendenankupaj jina uj Biblia necesitakusqanta (1 Timoteo 2:3, 4). 1950 watapitaj Diospa Palabran Bibliamanta wakin librosninta, inglespi orqhoyta qallarerqayku. Kay Bibliaqa parlakusqanchejman jina ruwasqa kashan, entiendeyta atinapaj jinataj. Chantapis 160 kuraj parlaykunapiña kashan.

Entiendeyta atinapaj jina Biblia necesitakorqa. Watas pasasqanman jinaqa mana kikillantapunichu parlanchej. Chayrayku wakin palabrasta manaña entiendenchejchu. Ashkha Bibliastaj mana kunan parlasqanchejman jinachu ruwasqa kashan. Chantapis unayniyoj qhelqasqasta tarerqanku. Chaykunataj hebreo, arameo, griego qallusta, aswan sumajta entiendenapaj yanapawanchej.

Maychus kajman jina tijrachisqa Biblia necesitakorqa. Bibliata waj parlaykunaman tijrachejkunaqa, maychus kasqanman jina tijrachinanku karqa. Chaywanpis ashkha Bibliaspi “Jehová” suti mana rikhurinchu.

Diosta jatunchananpaj Biblia necesitakorqa (2 Samuel 23:2). Traducción del Nuevo Mundo nisqa Bibliapi “Jehová” suteqa, 7.000 kutismanta astawan rikhurin, maykunapichus qallariypi rikhurerqa, chaykunapi (Apocalipsis 4:11). Kay ura kantupi kaj fotopi chayta qhawariwaj. Traducción del Nuevo Mundo nisqa Biblia orqhokunanpajqa, watasta sumajta estudiarqanku. Chayrayku kay Bibliaqa, Diospa munayninmanta sutʼita willan. Chayta leeytaj miskʼirichikunapaj jina. Kay Biblia parlayniykipi mana kajtinpis, Bibliata sapa día leenaykipaj kallpachakuy (Josué 1:8; Salmo 1:2, 3).

• ¿Imaraykutaj waj Bibliata orqhoyku?

• ¿Imata ruwanapajtaj sapa día kallpachakuna tiyan?