Diospa llajtanpeqa yachachiwayku chay hermanosman mana pagaykuchu. Ñaupa tiempopi jinataj, sumaj wakichisqa hermanos churasqa kashanku ‘Diospa congregacionninta michinankupaj’ (Hechos 20:28). Paykunaqa creeypi sinchʼi sayasqa hermanos kanku, congregaciontataj qhawanku. Bibliataj paykunata kamachin: “Chay tropa ovejasta michiychej, sumaj qhawajkuna jina sirvispa. Amataj tanqasqa jinachu sirviychej, manaqa Dios munasqanman jina tukuy sonqowan. Amallataj imata japʼiyta munaspachu chayta ruwaychej, manaqa sirviytapuni munasqaykichejrayku”, nispa (1 Pedro 5:1-3). ¿Imastá ancianos ruwanku?

Ancianosqa cuidawayku, yanapawaykutaj. Bibliaman jina yuyaychawayku, Jehová Diospa qayllallanpipuni kanaykupajtaj yanapawayku. Diospa ovejitasninta qhawashasqankuta yachasqankurayku, mana patrones jinachu kanku. Astawanpis allinniykupaj, kusisqa kanaykupaj ima yanapawayku (2 Corintios 1:24). Paykunaqa ovejasta sumajta michejkuna jinapuni kanku. Chayrayku mayta kallpachakunku sapa uj hermanota allinta rejsinankupaj (Proverbios 27:23, 24).

Ancianosqa Jehová Diospa munayninta ruwanaykupaj yanapawayku. Sapa semana sumajta yachachinawaykupaj kallpachakunku. Chaytataj ruwanku creeyniykuta kallpachanawaykupaj (Hechos 15:32). Chantapis willaypi ñaupajpi kanku, noqaykuwan khuska willanku, imaymanamanta willaytataj yachachiwayku.

Ancianosqa sapa ujniykuta kallpachawayku. Jehová Diospa qayllallanpipuni kanaykupaj wasiykuman waturej jamuwayku, chayri tantakuykunapi noqaykuwan parlarinku. Paykunaqa Bibliawan sonqochawayku, yanapawaykutaj (Santiago 5:14, 15).

Ancianosqa congregacionpi ruwanasninkuta juntʼaspapis, mikhunankupaj, ropankupaj trabajanku, familiankutapis qhawanku. Chay jina sinchʼita llankʼaj hemanostaqa, jatunpaj qhawana tiyan (1 Tesalonicenses 5:12, 13).

• ¿Imatataj congregacionpi ancianos ruwanku?

• ¿Imastá ancianos ruwanku sapa ujniykumanta llakikusqankurayku?

Bibliaqa ‘ancianosmanta siervos ministerialesmantawan’ parlan. Paykunataj congregacionpi yanapakunku (Filipenses 1:1). Wakin congregacionespeqa ashkha ancianos, siervos ministeriales ima tiyan. ¿Imastataj siervos ministeriales ruwanku?

Siervos ministerialesqa ancianosta yanapanku. Paykunaqa creeypi sinchʼi sayasqa kanku, atienekunapaj jinataj. Chantapis mana qhellaschu kanku. Wakenqa jovenllaraj kanku, wakintaj kurajkuna. Paykunaqa congregacionpi ashkha imasta ruwanku. Ajinamantataj ancianosqa hermanosta yachachinankupaj, kallpachanankupaj ima, astawan tiempoyoj kanku.

Siervos ministerialesqa tantakuypi necesitakusqanta ruwanku. Wakin siervos ministerialesqa tantakuyman jamojkunata saludanankupaj punkupi suyanku, maypichus tiyakunankutataj rikuchinku. Wakintaj tantakuypi sonidota atiendenku, publicacionesta jaywanku, congregacionpa qolqenta jallchʼanku, hermanosman maypichus willamunankuta kamachinku. Wakintajrí Tantakuna Wasita allinchaypi chayri llimphuchaypi yanapanku. Wakintaj ancianos nisqankuman jina machitu hermanosta yanapanku. Ima ruwanallatapis tukuy sonqo juntʼanku, jinamantataj “allinpaj qhawasqa kanku” (1 Timoteo 3:13).

Siervos ministerialesqa Diosta yupaychayta ñaupajman churanku. Paykunaqa sumajta ñaupajman rishasqankurayku siervos ministerales jina churasqa kanku. Tantakuypi ñaupajmanta parlarimuspa, creeyniykuta kallpachanku. Willaypi ñaupajpi kasqankutaj, kikinta ruwanaykupaj yanapawayku. Paykuna ancianosta sumajta yanapasqankurayku, congregacionpi aswan ujchasqa, kusisqataj kayku (Efesios 4:16). Tiempowantaj paykunapis ancianos kayta atillankumantaj.

• ¿Imayna runastaj siervos ministeriales kanku?

• ¿Imastataj siervos ministeriales congregacionpi ruwanku?

Griego Qhelqasqasqa Bernabemanta, apóstol Pablomantawan ashkhata parlan. Paykunaqa congregacionesta waturej kanku. Chaytataj ruwaj kanku hermanosninkoj allinninkuta munasqankurayku. Pabloqa hermanos imaynachus kashasqankuta yachananpaj ujtawan waturikullajtaj. Chaypajtaj may jina karusta rej (Hechos 15:36). Kay tiempomanta congregacionesta waturejkunapis, Pablo jinallataj kanku.

Kallpachaj jamunku. Congregacionesta waturej hermanosqa, watapi iskay kutita 20 congregacionesta jina waturinku. Sapa congregacionpitaj uj semanata qhepakunku. Chay hermanosmanta, warmisninkumanta ima, mayta yachakusunman. Paykunaqa tukuy hermanosta rejsinankupaj kallpachakunku. Chantapis hermanoswan willaj llojsinku, Bibliamanta yachakojkunatapis wakin hermanoswan waturinku. Paykunaqa ancianoswan khuska wakin hermanosta kallpachanankupaj waturej rinku. Tantakuypi, jatun tantakuykunapi imataj kallpachanawanchejpaj sumajta umallirichinku (Hechos 15:35).

Allinninchejta maskʼanku. Congregacionesta waturejkunaqa, sapa congregacionta Jehová Diosmanta mana karunchakunanpaj yanapanku. Chantapis ancianoswan, siervos ministerialeswan ima tantakuspa imaynatachus ruwayninkuta juntʼanankuta yuyaycharinku. Chantá congregación imaynatachus ñauparishasqanta qhawarinku. Precursorestapis aswan sumajta willanankupaj yanapanku. Chantapis yachakojkunata rejsispa, imaynatachus ñauparishasqankuta yachaspa ima mayta kusikunku. Chay hermanosqa tukuy sonqo llankʼanku, ‘allinninchejpajtaj yanapawanchej’ (2 Corintios 8:23). Arí, creeyninkumanta, Diosta yupaychasqankumanta ima yachakuna (Hebreos 13:7).

• ¿Imapajtaj congregacionesta waturejkuna waturiwayku?

• Congregacionniykiman waturej hermano jamojtin, ¿imatá ruwawaj?

Jehovaj testigosnenqa, terremotos kajtin chayri sinchʼi wayras, paras kajtin usqhayllata hermanosniykuta yanapayku. Ajinata yanapanakusqaykutaj, purajmanta munanakusqaykuta rikuchin (Juan 13:34, 35; 1 Juan 3:17, 18). Imaynasmantachus yanapanakusqaykuta qhawarina.

Qolqewan yanapayku. Antioquiamanta hermanosqa, Judeapi manchay yarqhay kajtin, hermanosta yanapanankupaj qolqeta apacherqanku (Hechos 11:27-30). Ajinallataj noqaykupis hermanosniyku jatun llakiypi rikukojtinku, paykunata yanapanaykupaj congregacionnejta qolqeta apachiyku (2 Corintios 8:13-15).

Necesitasqanku imaswan yanapayku. Jatun llakiy kajtin, ancianosqa congregacionninkumanta tukuy hermanosta maskʼanku, imaynachus kashasqankuta yachanankupaj. Chantapis uj qotu hermanos, llakiypi kaj hermanospaj mikhunata, yakuta, ropasta, maypichus qhepakunankuta ima usqhayllata wakichinku, doctoreswanpis yanapanku. Ashkha hermanostaj, llakiypi kajkunaj wasisninkuta, Tantakuna Wasista ima allinchaysikunankupaj rinku. Ujchasqas kasqaykurayku, khuska llankʼanaman yachasqas kasqaykurayku ima, usqhayllata hermanosniykuta yanapayta atiyku. ‘Creeypi hermanosniykuta’ ñaupajta yanapajtiykupis, waj religionniyoj runastapis atisqaykuman jina yanapallaykutaj (Gálatas 6:10).

Bibliawan sonqochayku. Jatun llakiypi kajkunaqa sonqochasqa kayta necesitanku. “Tukuy imapi sonqochaj Diostaj” paykunata kallpachayta atin (2 Corintios 1:3, 4). Chayrayku llakiypi kajkunaman, Bibliapi rikuchiyku Diospa Gobiernon tukuy llakiykunata chinkachinanta (Apocalipsis 21:4).

• Jatun llakiy kajtin, ¿imaraykú hermanosniykuta usqhayllata yanapayku?

• Jatun llakiypi kajkunata, ¿imaynatá sonqochayku?

Jesusqa wañupunan qayllata Pedrowan, Santiagowan, Juanwan, Andreswan ima parlarerqa. Paykunamantaj willarerqa kutimunan tiempomanta ima señalchus kananta. Chayta willarishaspataj nerqa: “¿Pitaj chay allin kamachi yuyayniyoj, pitachus patronnin churarqa kamachisninman tiemponpi mikhunata qonanpaj, chay?”, nispa (Mateo 24:3, 45; Marcos 13:3, 4). Jesusqa chaywan nisharqa, wakin runasta ajllananta. Paykunataj Diospa kamachisninman yachachiykunata mikhunata jina mana pisichispa kay tiempopi qonanku karqa. ¿Pikunataj chay runas kanku?

Diospa atiyninwan ajllasqa kajkunamanta wakin runas. Chay ‘allin kamacheqa’, Diospa Llajtanta Kamachejkuna kanku. Paykunaqa Diospa kamachisninman, yachachiykunata mikhunata jina tiemponpi qonku. Arí, chay “allin kamachi” maychus “tiemponpi mikhunata” qonawanchejta necesitanchej (Lucas 12:42).

‘Diospa wasinta’ qhawanku (1 Timoteo 3:15). Jesusqa kay jallpʼapi Diospa llajtanta paykunaj makinpi churarqa. Paykunaqa Diospa Llajtanpa tukuy kapuyninta qhawananku tiyan, Diospa Gobiernonmanta willayta ñaupajman apananku tiyan, yachachinawanchejtaj tiyan. ‘Allin kamachi, yuyayniyojqa’, mikhunata necesitasqanchejman jina maychus tiemponpi qonawanchejpaj publicacionesta orqhon. Chantapis tantakuykunata, jatun tantakuykunata ima wakichipuwanchej.

Chay kamachitaqa, “allin kamachi” nikun Bibliamantapuni yachachisqanrayku, kamachisqa kasqanman jina sumaj willaykunata willasqanrayku ima. Chantapis yuyayniyoj kasqanta nikun, Cristoj tukuy kapuyninta kay jallpʼapi allin yuyaywan qhawasqanrayku (Hechos 10:42). Ajinata ruwasqanraykutaj Jehová Diosqa paykunata bendecishan. Chaytaj rikukun Diospa llajtan mayta wiñashasqanpi, yachachiykunasnin mikhuna jina ashkha kasqanpi ima (Isaías 60:22; 65:13).

• ¿Pitataj Jesús churarqa yachachisqasninman tiemponpi yachachiykunata mikhunata jina qonanpaj?

• ¿Imaraykutaj chay kamachita “allin kamachi yuyayniyoj” nikun?

Ñaupa tiempopi, Jerusalenmanta “apostoleswan ancianoswan ima”, uj junta directiva jina karqanku. Paykunaqa tukuy congregacionespa sutinpi imatapis ajllaj kanku (Hechos 15:2). Uj yuyayllaman chayanankupajtaj, Diospa Palabranta estudiaj kanku, Diospa atiyninwantaj yanapachikoj kanku (Hechos 15:25). Kay tiempopipis kikillantataj ruwakun. Chay junta directivataqa, Diospa Llajtanta Kamachejkuna sutiwan rejsikun.

Diosqa paykunanejta munayninta ruwan. Diospa Llajtanta Kamachejkunaqa Bibliata sumajta estudianku. Paykunaqa Diospa llajtanta ñaupajman apanankupaj sumaj wakichisqa kanku, imaynatachus Jehová Diosta yupaychaytataj yachachiwanchej. Paykunaqa jallpʼantinpi hermanos imastachus necesitasqankuta qhawarinankupaj sapa semana tantakunku. Apostolespa tiemponkupi jinataj, imatachus ruwananchejta niwanchej cartanejta, congregacionesta waturejkunanejta, waj hermanosnejta ima. Ajinamanta Diospa llajtan ujchasqa kananpaj, uj yuyayllataj imatapis ruwananpaj yanapanku (Hechos 16:4, 5). Chantapis Bibliamanta yachachiykunata wakichinku, Diospa Gobiernonmanta willayta ñaupajman apanku, ñaupajman apaj hermanosta churakusqanta ima qhawarinku.

Diospa atiyninwan yanapachikunku. Diospa Llajtanta Kamachejkunaqa, Tukuyta Kamachej Jehová Diospa yanapayninta, Jesuspa yanapayninta ima maskʼanku. Jesustaj congregacionpa Uman (1 Corintios 11:3; Efesios 5:23). Paykunaqa mana yuyakunkuchu Diospa llajtanpi kajkunaj patronesninku kasqankuta. Astawanpis, ajllasqa hermanosninku jinallataj ‘Corderoj qhepanta rishanku mayllamanpis rejtin’ (Apocalipsis 14:4). Diospa Llajtanta Kamachejkunaqa Jehová Diosmanta paykunapaj mañapusqanchejmanta mayta agradecekunku.

• Ñaupa tiempomanta cristianosta, ¿pikunataj kamachej kanku?

• Diospa Llajtanta Kamachejkuna, ¿imaynatá Jehová Diospa yanapayninta maskʼanku?

Hebreo parlaypi Betel palabraqa, “Diospa wasin” niyta munan (Génesis 28:17, 19). Chay sutiwantaj Jehovaj testigosninpa oficinasninkuta jallpʼantinpi rejsikun. Chay oficinasmantaqa Diospa Gobiernonmanta willakunanpaj yanapakun. Diospa Llajtanta Kamachejkunaqa, Nueva York lugarmantapacha mundontinmanta oficinasniykuta chayri sucursalesniykuta qhawarinku. Chaytaj Estados Unidospi kashan. Tukuy chay oficinaspi llankʼajkunatataj, familia Betel nikun. Uj familia jinapunitaj kanku, imaraykuchus khuska tiyakunku, khuska llankʼanku, khuska mikhunku, khuska Bibliata estudianku (Salmo 133:1).

Betelpeqa tukuy atisqankuta kusiywan llankʼanku. Betelpi llankʼajkunaqa qharis, warmis ima kanku. Paykunataj creeypi sinchʼi sayasqa kanku. Paykunaqa Diospa munaynin ruwakunanpaj, Diospa Gobiernonmanta willakunanpaj ima, tukuy tiemponkuta churanku (Mateo 6:33). Betelitasqa mana uj sueldota japʼinkuchu. Jinapis paykunapaj tiyan mikhuna, cuartos ima. Chantapis necesitasqanku imaspaj pisi qolqeta japʼinku. Betelitasqa oficinaspi llankʼanku, mikhunata waykʼunku chayri sirvinku, publicacionesta imprimispa llankʼanku, cuartosta llimphuchanku, ropasta tʼajsanku, wakin imasta allinchanku, chantá waj imastawan ruwanku.

Betelitasqa Diospa Gobiernonmanta willakunanpaj mayta llankʼanku. Betel wasisqa kashan, Bibliaj yachachiykunasnin tukuy runasman chayananpaj. Chayrayku kay folletotaqa Diospa Llajtanta Kamachejkuna qhelqacherqanku. Chantá jallpʼantinpi waj parlaykunaman tijrachej oficinasman computadoranejta apachikorqa. Chaymantataj ashkha suyuspi imprimikorqa. Chantá chayta 120.000 kuraj congregacionesman apachikorqa. Betelitastaj tukuy chaykuna ruwakunanpaj yanapakorqanku. Jinapis paykunaqa sumaj willaykuna usqhayllata willakunanpaj astawan yanapakushanku (Marcos 13:10).

• ¿Pikunataj Betelpi llankʼanku? ¿Ima yanapastataj japʼinku?

• ¿Imapajtaj betelitas astawan yanapakushanku?

Betelitasqa suyunkupi chayri waj suyuspi Diospa Gobiernonmanta willay ñaupajman rinanpaj imaymanamanta yanapakunku. Wakenqa publicacionesta waj parlaykunaman tijrachinku, wakintaj impriminku, librospi jina ujchanku, publicacionesta jallchʼanku chayri grabacionesta, videosta ima wakichinku. Chantapis waj imastawan ruwanku.

Sucursalta Kamachejkunaj ruwasqanku. Diospa Llajtanta Kamachejkunaqa sapa sucursalpi kinsa ancianosta chayri astawan churanku chay sucursalta kamachinankupaj. Paykunaqa suyunkupi imaynatachus Diospa Gobiernonmanta willakushasqanta, ima chʼampaykunachus suyunkupi rikhurisqanta ima, Diospa Llajtanta Kamachejkunaman willanku. Ajinamanta Diospa Llajtanta Kamachejkunaqa, ima yachaqanastachus publicacionespaj, tantakuykunapaj, jatun tantakuykunapaj ima wakichinankuta yachanku. Chantapis Diospa Llajtanta Kamachejkunaqa, wakin hermanosta kachanku sucursalesta waturinankupaj. Chay hermanostaj, sucursalpi kamachejkunata llankʼayninkuta maychus kajta juntʼanankupaj yanapanku (Proverbios 11:14). Chantapis chay hermanosqa sapa sucursalta waturispa, chay sucursalpa japʼiyninpi kaj hermanosta kallpachanankupaj uj sumaj tantakuypi umallirichinku.

Congregacionesta yanapanku. Jehovaj testigosninpa sucursalesninkupeqa, uj mosoj congregación kanantachus manachus ninku. Chantapis sucursalmantapacha precursoresta, misionerosta, congregacionesta waturejkunata ima, llankʼayninkuta juntʼanankupaj wakichinku. Chantapis sucursalpi wakichinku jatun tantakuykunata, qhawarinkutaj maypichus Tantakuna Wasis ruwakunanta. Chantapis chayllamantataj congregacionesman publicacionesta apachikun. Chaypi tukuy ima ruwakusqanqa, Diospa Gobiernonmanta willakunanpaj yanapan (1 Corintios 14:33, 40).

• Sucursalpi Kamachejkuna, ¿imaynatá Diospa Llajtanta Kamachejkunata yanapanku?

• ¿Imastataj sucursalesniykupi ruwakun?

Sumaj willaykuna “tukuy nacionesman, tukuy ayllusman, tukuy laya parlayniyojkunaman, tukuy laya runasmanpis” chayananpaj, publicacionesta 900 kuraj parlaykunapi orqhoyku (Apocalipsis 14:6). Chay ruwakunanpajtaj, ashkha suyusmanta qhelqajkuna, tijrachejkuna ima yanapawayku. Paykunataj Jehovaj testigosnin kanku.

Publicacionesniykoqa inglespi ruwakun. Qhelqajkunapaj Comisionpi llankʼajkunaqa Diospa Llajtanta Kamachejkunaj nisqankuman jina ruwanku. Chay comisionqa centralniykupi kashan. Chay lugarmantataj chaypi qhelqajkunata, waj suyuspi qhelqajkunatawan kamachikun. Publicacionesniykuta qhelqajkuna ashkha lugaresmanta kasqankurayku, tukuy laya runaspaj jina qhelqakuyta atin. Chayrayku tukuy laya runas publicacionesniykuta leespa miskʼirichikunku.

Tijrachejkunaman apachikun. Uj publicacionta qhelqayta tukuytawan, jallpʼantinpi waj qallusman tijrachejkunaman computadoranejta apachikun. Paykunataj chayta parlayninkuman tijrachinku, parlayninkupi mana pantayniyoj kananpajtaj qhawarinku. Tijrachejkunaqa “sumaj kʼacha palabrasta” parlayninkupi maskʼanku publicaciones inglespi jina kananpaj (Eclesiastés 12:10).

Computadorasqa usqhayta llankʼanapaj yanapakun. Uj computadoraqa mana runa jina qhelqayta chayri tijrachiyta atinmanchu. Chaywanpis chaypi kaj diccionarios, waj yanapas ima, usqhayta tijrachinapaj yanapakun. Jehovaj testigosnenqa computadorapi MEPS nisqata rikhuricherqayku. Chaytaj yanapawayku publicacionesta fotosniyojta, ashkha parlaykunapitaj orqhonaykupaj. MEPS nisqawanqa publicacionesniykuta impriminapaj kʼachituta wakichiyku.

Publicaciones ashkha parlaykunaman tijrachikunanpaj mayta llankʼayku. Wakin parlaykunata pisi runaslla parlajtinkupis, Jehová Diosninchejqa “munan tukuy laya runas salvasqa kanankuta, cheqa kajtataj allinta rejsinankuta” (1 Timoteo 2:3, 4).

• ¿Imaynatataj publicacionesniyku qhelqakun?

• ¿Imaraykutaj ashkha parlaykunaman publicacionesta tijrachiyku?

Sapa wata may chhika Bibliasta, publicacionesta ima orqhoyku, mana vendespallataj runasman jaywayku. Chantapis Tantakuna Wasista, sucursalesta ruwayku, allinchayku ima. Betelitasman, misionerosmanpis necesitasqankupaj qolqeta qoyku. Mayllapipis uj jatun llakiy rikhurejtintaj, yanapasta apachiyku. Ima qolqewanchus chayta ruwasqaykuta yachakuna.

Mana mañaykuchu diezmota, nitaj ofrendatapis. Jallpʼantinpi willakunanpaj ashkha qolqe necesitakun, jinapis ni pimanta qolqeta mañaykuchu. Agosto de 1879 watapi, Torremanta Qhawaj revistayku sutʼincharqa Jehová Diospa yanapayninwan kasqaykupi atienekusqaykuta. Nerqataj: “Diospa llajtanqa ni jaykʼaj runamanta qolqeta mañakuspa purenqachu”, nispa. Jinapunitaj kashan (Mateo 10:8).

Runa munasqanman jina qolqeta churan. Ashkha runas Bibliamanta yachachisqaykuta jatunpaj qhawanku. Chayrayku qolqesitunkuwan yanapakunku. Noqaykupis Diospa munaynin jallpʼantinpi ruwakunanpaj, kallpaykuta, tiempoykuta, kapuyniykuta ima churayku (1 Crónicas 29:9). Tantakuna Wasisniykupi, jatun tantakuykunasniykupipis qolqeta churanapaj cajitas tiyan, munajkunataj chayman churayta atinku. Chantapis qolqesitunkuwan yanapakuyta munajkunaqa jw.org nisqanejta qoyta atillankutaj. Astawanqa wajcha runas qolqeta churanku. Paykunaqa wajcha viudaman rijchʼakunku. Chay viudaqa templopi qolqe churana cajasman iskay qolqesitusta churaykorqa. Jesustaj chayta sumajpaj qhawarqa (Lucas 21:1-4). Arí, sapa ujpis “sonqonpi yuyasqanman jina” qolqenmanta tʼaqaspa sapa kuti churayta atinman (1 Corintios 16:2; 2 Corintios 9:7).

Jehová Diosqa Gobiernonmanta jallpʼantinpi willakunanpaj, munaynin juntʼakunanpaj ima, ‘tukuy kapuyninkuwan’ payta jatunchayta munajkunaj sonqonkuta kuyuchillanqapuni (Proverbios 3:9).

• Diospa llajtan, ¿waj religiones jinallatajchu?

• Runa munasqanman jina churasqan qolqewan, ¿imastataj ruwakun?

Tantakuna Wasisniykupeqa Diospa Gobiernonmanta Bibliapi yachakuyku. Jesuspis Diospa Gobiernonmanta willarqa (Lucas 8:1).

Diosta yupaychanapaj wasis. Jehovaj testigosnenqa, chay wasispi Diospa Gobiernonmanta willanaykupaj wakichikuyku (Mateo 24:14). Tantakuna Wasisqa mana uj rejllachu kanku. Chaywanpis tukuyninku maychus kajman jina ruwasqa kashanku. Wakin Tantakuna Wasispitaj mana uj congregacionllachu tantakun. Kay qhepa wataspeqa Diospa llajtan mayta wiñasqanrayku, may chhika Tantakuna Wasista ruwayku, sapa día phishqata jina. Imaynatachus chayta ruwasqaykuta yachakuna (Mateo 19:26).

Tantakuna Wasista ruwakun runas qolqeta munasqankuman jina qosqankuwan. Chay qolqetaqa sucursalman apachikun. Sucursaltaj chay qolqeta qon Tantakuna Wasita ruwayta chayri allinchayta necesitaj congregacionman.

Imaymana hermanos mana qolqeta mañaspalla ruwaysikunku. Ashkha suyuspi Grupos de Construcción tiyan. Chay grupomanta kajkuna waj voluntarios ima, suyunku ukhupi karu lugaresman rinku Tantakuna Wasista ruwanankupaj. Wakin suyuspitaj sumaj wakichisqa hermanos qhawarinku Tantakuna Wasis ruwakusqanta, allinchakusqanta ima. Construccionpi yanapakojkunamanta wakenqa construccionmanta sumajta yachanku. Jinapis congregacionmanta hermanos astawan yanapakunku, imaraykuchus paykuna chaypi tantakonqanku. Arí, Jehová Diospa atiyninpa yanapanwan, llajtanpa yanapanwan ima, ashkha Tantakuna Wasis ruwakushan (Salmo 127:1; Colosenses 3:23).

• ¿Imajtintaj Tantakuna Wasista ruwayku?

• ¿Imaynatataj Tantakuna Wasis jallpʼantinpi ruwakun?

Tantakuna Wasipeqa, Diospa sutin “Jehová” churasqa kashan. Chayrayku llimphuta, allinchasqatataj japʼina tiyan. Chay ruwaypi yanapakoyqa may sumaj. Chaypi yanapakuspataj Jehová Diosta yupaychashanchej.

Tantakuy tukukusqantawan llimphuchaypi yanaparikuna. Sapa tantakuy tukukusqantawan congregacionmanta hermanos Tantakuna Wasita llimphuchanku. Aswan sumajta llimphuchanapajtaj, sapa kuti uj pʼunchayta tʼaqakun. Chay diataj uj anciano chayri uj siervo ministerial uj listaman jina, imaynatachus llimphuchanata kamachin. Necesitakusqanman jinataj, pichakun, trapeakun, sillasta llimphuchakun, bañosta, ventanasta, espejosta ima lliphirishajta saqekun, qʼopata wijchʼukun, Tantakuna Wasej jawanta llimphuchakun, allinchakun ima. Watapi uj kutillatapis tukuy imitata llimphuchanapaj uj pʼunchayta tʼaqakullantaj. Wawas Tantakuna Wasita jatunpaj qhawanankupajtaj paykunawanpis yanapachikullasunmantaj (Eclesiastés 5:1).

Allinchanapaj yanapakuna. Sapa wata Tantakuna Wasej ukhunta, jawanta ima qhawarikun imaynachus kashasqanta yachanapaj. Chayman jinataj imatachus allinchanata allinchakun, ajinamanta aswan qhepaman mana ashkha qolqeta gastanapaj (2 Crónicas 24:13; 34:10). Tantakuna Wasi llimphu, sumaj allinchasqa kajtenqa, Diosta yupaychanapaj jinapuni. Jehová Diosta munakusqanchejraykutaj Tantakuna Wasi allin kananpaj yanapakunchej, jatunpajtaj chay wasita qhawanchej (Salmo 122:1). Chantapis wajkuna reparanqanku Jehová Diosta yupaychajkuna kasqanchejta (2 Corintios 6:3).

• ¿Imaraykú Tantakuna Wasita llimphituta japʼina tiyan?

• Tantakuna Wasita llimphuta japʼinapaj, ¿imastá ruwakun?

Bibliaqa wakin runasmanta, wakin lugaresmantawan parlan, ¿chaymanta astawan yachakuyta munawajchu? ¿Imaynatachus uj chʼampayta allinchayta yachayta munawajchu? Jina kajtenqa Tantakuna Wasej bibliotecanpi kaj publicacionesta leeriy.

Bibliotecapeqa sumajta estudianapaj publicaciones tiyan. Jehovaj testigosnin parlayniykipi orqhosqanku publicacionesmanta, ichá mana tukuychu kapusunki. Tantakuna Wasej bibliotecanpitajrí, kunallanraj llojsimoj publicaciones tiyan. Chantapis ichá imaymana Biblias, diccionarios, waj yanapas ima tiyan. Chayrayku niraj tantakuy qallarishajtin, chayri tukukusqantawan mana manchachikuspa chayman chimpaykuy. Uj computadora kan chaytaj, ichá chaypi tiyan Watchtower Library nisqa programa. Chaypeqa ashkha publicacionesniyku tiyan. Maskʼanaykipajtaj palabrasta chayri Bibliaj versiculosninta churanayki tiyan.

Cristiano Kausayninchej tantakuypi asignacionesniyoj kajkunapaj sumaj yanapa. Tantakuna Wasipi kaj bibliotecapi asignacionniykita wakichikuyta atiwaj. Cristiano Kausayninchej nisqa tantakuymanta encargakoj hermanotaj, bibliotecapi tukuy publicaciones kananpaj, sumaj kʼuchunchasqa kananpaj ima kamachisqa kashan. Imallamantapis astawan yachayta munanki chayqa, chay hermano chayri yachachejniyki yanapasunkiman. Chaywanpis Tantakuna Wasej bibliotecanmanta ni mayqen librotapis apakuyta atiwajchu, nitaj rayaytapis atiwajchu.

Bibliaqa niwanchej Diosmanta astawan yachakunapaj, yachachiyninta “qolqe pʼampasqata jina” maskʼanata (Proverbios 2:1-5). Tantakuna Wasipi bibliotecataj, chaypaj yanapawasun.

• Tantakuna Wasipi kaj bibliotecapi, ¿imastataj tariwaj?

• ¿Pitaj bibliotecapi maskʼayta yachachisunkiman?

Jesucristo yachachisqasninman nerqa: “Kʼanchayniykichejpis runaspa ñaupaqenpi kʼanchachun, paykuna sumaj ruwasqasniykichejta rikuspa, cielopi kashaj Tataykichejta jatunchanankupaj”, nispa (Mateo 5:16). Chaypajtaj runas tʼukuna imasta ruwasqankuwan yanapachikuyku, ujqa Internet nisqa. Internetpi jw.org nisqapi creeyniykumanta, ruwayniykumanta ima willakun. ¿Imastataj chaypi tariwaj?

Internetpi tapuyniykipaj Bibliaj kutichiykunasninta tariwaj. Arí, wakin tapuykunaj kutichiykunasninta tariwaj. ¿Llakiykuna chinkanqachu?, ¿Wañusqas kausarimuyta atinkumanchu? nisqa tratadosqa Internetpi 900 kuraj parlaykunapi tiyan. Chantapis Diospa Palabran Bibliaqa 160 kuraj parlaykunapi tiyan. Bibliamanta estudianapaj yanapaspis kallantaj. Chaykunamanta ujnenqa ¿Imastá Biblia yachachiwanchej? nisqa libro. Internetpi tarillawajtaj kunallanraj llojsimoj Torremanta Qhawaj, ¡Rijchʼariy! revistasta. Wakin publicacionesta kikin Internetpi leeyta, uyariyta ima atikun. Chantapis atikullantaj MP3, PDF, EPUB nisqapi uraqachiyta. Munaspaqa parlayniykipi wakin paginasta imprimikuwaj, Bibliamanta yachakuyta munajman rikuchinaykipaj. Chantapis tarillawajtaj makiswan parlajkunapaj videosta, dramapi jina Bibliata leerisqasta, dramas nisqata, takiykunata ima.

Ruwasqasniykumanta willaykuna. Internetpi jw.org nisqapeqa mosoj willaykunata, videosta ima tarinki. Chaykunataj willashanku ruwasqaykumanta, imapichus hermanosniyku rikukushasqankumanta, runasta yanapasqaykumanta ima. Kay jw.org nisqapeqa willakullantaj jatun tantakuykunasniykumanta, imaynatachus sucursalesniykuman wajyanamanta ima.

Internetpa yanapanwan Diospa Gobiernonmanta sumaj willaykuna tukuy kʼuchusman chayashan, chiri lugar Antártida nisqamanpis. Chayrayku “Jehová Diosmanta mañapullawaykupuni, paypa palabran tukuynejman usqhayta chayanallanpajpuni” (2 Tesalonicenses 3:1).

• ¿Imaynatataj jw.org nisqa yanapawayku?

• ¿Imastataj jw.org nisqapi maskʼayta munawaj?