Ashkha runasqa manaña iglesiankuman rinkuchu. Imaraykuchus iglesiankupeqa tapuyninkuman mana kutichinkuchu, nitaj sonqochayta tarinkuchu. Chanta, ¿imaraykutaj tantakuyniykuman jamurinayki allin kanman?

Tantakuyniykupeqa munakuyniyoj runasta rejsinki. Ñaupa tiempomanta cristianosqa congregacionespi tʼaqasqa karqanku. Sapa congregacionpitaj Diosta yupaychanankupaj, Bibliata estudianankupaj, purajmanta kallpachanakunankupaj tantakoj kanku (Hebreos 10:24, 25). Tukuy sonqo munanakoj kanku, sumaj amigostaj kaj kanku (2 Tesalonicenses 1:3; 3 Juan 14). Noqaykupis ajinata ruwasqaykurayku kusiyta tariyku.

Tantakuyniykupeqa Biblia nisqanman jina kausakuyta yachakunki. Ñaupa tiempopi jina qharis, warmis, wawas ima khuska tantakuyku. Sumaj wakichisqa hermanostaj, Bibliaj nisqanman jina kausakunaykupaj yanapawayku (Deuteronomio 31:12; Nehemías 8:8). Chantapis tantakuypeqa, tukuy runas tapuykunaman kutichispa, takispa ima suyakuyninkumanta mana iskayrayasqankuta rikuchinku (Hebreos 10:23).

Tantakuyniykuman jamojtiykeqa Diospi creeyniyki astawan wiñanqa. Apóstol Pabloqa, uj congregacionman cartanejta nerqa: “Noqaqa rikuytapuni munashaykichej, [...] purajmanta kallpachanakunanchejpaj, qankunapis noqapis kikin creeyniyoj kasqanchejrayku”, nispa (Romanos 1:11, 12). Hermanosninchejwan tantakoyqa, creeyninchejta kallpachan. Chantapis Bibliaj nisqanman jina ruwanallapajpuni yanapawanchej.

Chayrayku tantakuyniykuman jamuriy. Jamojtiykeqa mayta kusikusqayku. Nitaj chay tantakuypi qolqeta paganaykichu kanqa.

• ¿Pikuna jinataj tantakuyniykuta ruwayku?

• ¿Imapajtaj tantakuykuna yanapawasunman?

Jehovaj testigosnenqa, lomasninta purinayku kajtinpis, tiempo mana allin kajtinpis, chʼampaykuna kajtinpis, diantinta llankʼasqaykumanta saykʼusqa kaspapis, tantakuyniykuman riykupuni. ¿Imaraykutaj hermanosniykuwan tantakunaykupaj kallpachakuyku?

Tantakusqaykoqa yanapawayku. Apóstol Pabloqa tantakuykunaman rinapuni kasqanmanta nerqa: “Ujkuna ujkunataj purajmanta qhawarinakunachej”, nispa (Hebreos 10:24). Chay nisqantaj purajmanta rejsinakuna kasqanta niyta munan. Arí, apóstol Pabloqa wajkunamanta llakikunata nisharqa. Hermanosta rejsispaqa imaynatachus llakiykunasninkuta atipasqankuta yachayku. Chaytaj, noqaykutapis problemasniykuta atipanaykupaj yanapawayku.

Sumaj amigos kanaykupaj yanapawayku. Tantakuykunapeqa sumaj amigoswan khuska kayku. Chantapis wakin kutisqa kusirikunaykupaj tantakullaykutaj. Ajinata tantakusqaykoqa purajmanta munanakunaykupaj, aswan ujchasqataj kanaykupaj yanapawayku. Noqaykumanta pillapis llakiypi rikukojtin, chay ratopacha yanapariyku (Proverbios 17:17). Congregacionpi tukuywan allinta kausakuspaqa, purajmanta ‘qhawarinakuyku’ (1 Corintios 12:25, 26).

Diospa munayninta ruwajkunawan masichakuy. Chay jina amigostataj Jehovaj testigosnin ukhupi tarinki. Chayrayku tantakuyniykuman jamuriypuni, amataj saqeychu ni ima jarkʼasunanta.

• ¿Imaynatataj hermanosniykuwan tantakuy yanapawayku?

• ¿Maykʼajtaj tantakuyniykuman jamuriyta atiwaj?

Ñaupa tiempomanta cristianosqa tantakuykunasninkupi Jehová Diosman takej kanku, paymanta mañakoj kanku, Palabrantapis leej, estudiaj ima kanku (1 Corintios 14:26). Tantakuyniykuman jamuspaqa, kikinta ruwasqaykuta rikunki.

Tantakuyniykupeqa Bibliamantapuni yachachikun. Sapa congregacionpi semana tukukuyta tantakuyku. Chaypitaj 30 minutosta Bibliamanta uj discursota uyariyku. Chay discursopi sutʼinchakun Bibliaj nisqan imaynatachus kay tiempopi juntʼakushasqanta, imaynatachus kausayninchejpi yanapawasqanchejta ima. Chantapis tukuy uyarejkuna ima versiculostachus leekushasqanta Bibliankupi leeriyta atinku. Discurso tukukusqantawantaj, Torremanta Qhawaj revistamanta estudianapaj tantakuy qallarin. Chay revistamantataj uj yachaqanata uj horapi tapuykunawan estudiakun, tukuytaj kutichiyta atinku. Chay tantakoyqa Bibliaj nisqanman jina kausakunaykupaj yanapawayku. Jallpʼantinpi 120.000 kuraj congregacionespi, kikinta yachakuyku.

Sumajta yachachinaykupaj yanapawayku. Chaupi semanapi Cristiano Kausayninchej nisqa tantakuyta ruwallaykutaj, chaytaj kinsapi tʼaqasqa kashan. Ñaupaj kajqa “Bibliamanta Sumaj Yachachiykuna” nisqa, kaytaj chay semanapi Bibliata leekusqanmanta yachakunaykupaj yanapawayku. Qhepan kajqa “Sumajta Yachachinachej” nisqa, kaytaj chay killapi ima publicacionwanchus runasman willamunapaj rikuchiykunanejta ruwakun. Sapa hermano tukusqantawantaj, uj hermano, aswan sumajta leenapaj chayri parlarinapaj yuyaychawayku (1 Timoteo 4:13). Kinsa kajqa “Cristiano Kausayninchej” nisqa, chaypitaj imaynatachus Diospa yuyaychaykunasnin kausayniykupi yanapawasqaykuta yachakuyku. Chaytaj Bibliata sumajta entiendenaykupaj tapuykunawan, kutichiykunawan ruwakun. Tukuy chay tantakoyqa Cristiano Kausayninchej nisqa folletoman jina kashan.

Tantakuyniykuman jamuriy. Chaypitaj sumajta yachachikusqanta rikunki (Isaías 54:13).

• ¿Imaynatataj tantakuykunasniykuta ruwayku?

• ¿Mayqen tantakuyniykumanpis jamuriyta munawajchu?

¿Kay folletopi fotosta rikunkichu? Ichá tantakuyniykuman sumaj pʼachallisqa risqaykuta rikuwayku. ¿Imaraykutaj sumajta pʼachallikuyku, kʼachanchakuyku ima?

Diosta jatunpaj qhawasqaykurayku sumajta pʼachallikuyku. Diosqa mana runaj allin rijchʼaynintachu qhawan (1 Samuel 16:7). Jinapis Diosta yupaychanapaj tantakuspaqa payta, hermanosniykuta ima, jatunpaj qhawasqaykuta rikuchiyta munayku. Presidentewan chayri alcaldewan parlanapajqa, jatunpaj qhawasqanchejrayku sumajta pʼachallikunchej. Kikillantataj tantakuyniykuman sumaj cambiasqas rispaqa, tukuy “nacionespa Reyninku” Jehová Diosta, Tantakuna Wasiykuta ima, jatunpaj qhawasqaykuta rikuchiyku (Jeremías 10:7).

Diospa yuyaychasqanta kasukusqaykurayku sumajta pʼachallikuyku. Bibliaqa niwanchej cristianos “wajkunata jatunpaj qhawaspa, allin yuyaywantaj” pʼachallikunata (1 Timoteo 2:9, 10). ‘Wajkunata jatunpaj qhawaspaqa’ mana aychaj munayninta rijchʼarichinapaj jinachu, nitaj tukuy imanchej rikukunanpaj jinachu vistikusun. Chantapis ‘allin yuyaywan’ maychus kajta pʼachallikuna, nitaj imapis purillanallachu. Biblia nisqanman jina vistikunapajqa, imaymana ropas tiyan. Chayrayku sumajta pʼachallikuspa, kʼachanchakuspa ima, “Salvawajninchej Diospa yachachiyninta tukuy imapi” kʼachanchanchej (Tito 2:10; 1 Pedro 2:12). Tantakuyniykuman sumaj pʼachallisqa rejtiykoqa, runaspis Diosta yupaychayta jatunpaj qhawanku.

Allin pʼachallisqa, llimphutaj kanapajqa, mana ashkha qolqewan rantisqa ropatapunichu churakuna tiyan. Chayrayku tantakuyniykuman jamuyta ama manchachikuychu.

• Diosta yupaychanapaj, ¿imaraykú sumajta pʼachallikuna kasqa?

• ¿Ima yuyaychaykunataj yanapawasun sumajta pʼachallikunapaj?

Jehovaj testigosninwan Bibliata estudiashanki chayqa, ichá ñaupajmantaña estudianaykipaj leerinki chayri grabacionta uyarinki. Tantakuykunapi astawan sumajta yachakunaykipajpis, ajinallatataj ruway. Chaypajtaj kay urapi yuyaychakusqanman jina ruwawaj.

Maykʼajchus, maypitajchus estudianaykita ajllay. ¿Ima horastataj astawan estudiayta atiwaj? ¿Niraj llankʼayman rishaspachu? Chayrí, ¿wawas puñukapusqankutawanchu? Ashkha ruwanayoj kaspapis, yachakunaykipaj tiempota tʼaqay. Amataj chayta juntʼanaykipaj imapis jarkʼasunanta saqeychu. Maypichus mana chʼajwa kanchu, chaypi estudiay. Radiota, teleta, celulartapis wañuchiy. Niraj estudiashaspataj Diosmanta yanapata mañakuy. Jinamanta mana waj imaspi yuyankichu, Diospa Palabranpitaj yuyayniykita churanki (Filipenses 4:6, 7).

Tantakuypaj kutichiykunata marcakuy. Imamantachus uj yachaqana chayri uj capítulo parlashasqanta reparay. Chantá titulonta, sapa subtitulota ima leeriy, dibujostapis qhawariy. Ajinamanta yachanki imamantachus parlakushasqanta. Yachakusqaykita yuyarikunaykipajtaj, yuyarinapaj tapuykunata leeriy. Chantá parrafosta ujmanta uj leey, kutichiykunasnintataj maskʼay. Bibliamanta versiculostapis leeriy, reparaytaj imaynatachus chay versículo astawan sutʼinchashasqanta (Hechos 17:11). Kutichiykunata tariytawan, yuyarichisunanpaj jina palabrasllata marcakuy. Jinamantataj tantakuypi kashaspa makiykita oqhariyta atinki, pisi palabrasllapitaj yuyarikusqaykimanta parlariyta atinki.

Sapa tantakuypaj ñaupajmanta wakichikuspaqa, Bibliamanta astawan yachakunki (Mateo 13:51, 52).

• ¿Imatataj ruwawaj tantakuykunapaj sumajta wakichikunaykipaj?

• ¿Imaynatá wakichikuwaj tantakuypi tapuykunaman kutichinaykipaj?

Ñaupa tiempomantapacha, Jehová Diosqa familias payman astawan qayllanankupaj, ujchasqas kanankupaj ima, tantakunankuta kamacherqa (Deuteronomio 6:6, 7). Jehovaj testigosnenqa sapa semana familiapi Diosta yupaychanapaj tiempochakuyku. Chaypitaj Bibliamanta orqhosqa publicacionesta estudiayku. Sapallanku tiyakojkunapis tiempochakullankutaj Bibliamanta astawan yachakunankupaj.

Diosman astawan qayllaykuna. “Diosman qayllaykuychej, paytaj qankunaman qayllaykamusonqachej” (Santiago 4:8). Jehová Diostaqa Biblianejta astawan rejsisunman. Chaypitaj imaynachus kasqanta, imatachus ruwasqanta ima willawanchej. Qallarinapajqa familiapi Bibliata leeriwajchej. Ichapis mayqen capitulostachus Cristiano Kausayninchej tantakuypi leekunanpaj ajllakun, chayta leeriwajchej. Sapa ujpis wakin versiculosta leeriwajchej, chantá imatachus yachakusqaykichejmanta parlariwajchej.

Familia astawan ujchasqa kanqa. Casados Bibliata khuska estudiajtinkoqa astawan ujchasqa kanqanku, jinallataj tatas, wawasninkuwan estudiajtinkupis. Chay tantakoyqa kusiyta tarinapaj jina, may suyasqataj kanan tiyan. Wakin tatasqa wawasninkuta yanapanankupaj jina yachachiykunata ajllanku, Torremanta Qhawaj, ¡Rijchʼariy! revistamanta chayri Internetpi jw.org nisqamanta. Qankunapis kikinta ruwawajchej. Ichapis wawasniykichej escuelapi imaspichus rikukusqankumanta, imaynatachus chayta atipanankumanta ima parlariwajchej. Chantapis JW Broadcasting (tv.jw.org) nisqapi kaj videosta qhawariwajchej, chaymantataj parlariwajchej. Tantakuypaj takiykunatapis takiriwajchej, tukuchanapajtaj imallatapis khuska mikhuriwajchej.

Familiapi Jehová Diosta yupaychanapaj sapa semana tiempochakojtinchejqa, Palabranta estudiaspa kusiyta tarisunchej. Paytaj chayta ruwasqanchejmanta mayta bendeciwasun (Salmo 1:1-3).

• ¿Imapajtaj familiapi Diosta yupaychanapaj tiempochakuyku?

• Familia Diosta yupaychanapaj tantakuyta kusiywan suyakunankupaj, ¿imatataj tatas ruwankuman?

Kay fotospi kajkunaqa kusisqa kashanku ujnin jatun tantakuyniykupi. Diosqa ñaupa tiempopi llajtanta watapi kinsa kutita tantakunankuta kamacherqa. Paykunataj may kusiywan tantakoj kanku. Noqaykupis kikinta tantakuspa, mayta kusikuyku (Deuteronomio 16:16). Sapa wata kinsa jatuchaj tantakuykuna kapuwayku: iskayqa uj pʼunchayllamanta, ujtaj kinsa pʼunchaymanta. ¿Imaynatá chay tantakuykuna yanapawayku?

Hermanosniykuwan masichakuyku. Israelitasqa “jatun tantakuykunapi” Diosta yupaychanapaj, may kusiywan tantakoj kanku. Noqaykupis jatun tantakuykunapi hermanosniykuwan khuska Diosta yupaychaspa, mayta kusikuyku (Salmo 26:12; 111:1). Chantapis chay tantakuykunapeqa waj congregacionesmanta chayri waj lugaresmanta hermanosniykuwan tinkuyku. Chaupi pʼunchaypitaj, paykunawan khuska mikhurikuspa, astawan masichakuyku (Hechos 2:42). Chay tantakuykunapitaj rikuyku ‘tukuy hermanos’ munanakusqaykuta (1 Pedro 2:17).

Jatun tantakuykunaqa Diosta yupaychaypi ñaupajman rinaykupaj yanapawayku. Israelitasqa Diospa Palabranpi yachakusqankuta ‘sumajta umankupi japʼej’ kanku, chaytaj mayta yanapaj (Nehemías 8:8, 12). Noqaykupis jatun tantakuykunapi Bibliamanta yachakusqaykuta may jatunpaj qhawayku. Sapa jatun tantakoyqa Bibliaj ujnin versiculonmanta orqhokun. Chay tantakuypi sumaj umallirichiykuna, rikuchiykuna ima, Diospa munayninta ruwanapaj yanapawayku. Chantapis wakin hermanos, kay tiempopi ima chʼampaykunatachus atipasqankumanta parlarinku, chaytaj mayta kallpachawayku. Jatun tantakuykunapeqa Bibliamanta orqhosqa videosta qhawayku. Chaykunanejtataj sumaj yuyaychaykunata japʼiyku. Chantapis jatun tantakuykunapi Jehová Diosman kausayninkuta jaywapojkuna bautizakunku.

• ¿Imaraykutaj jatun tantakuykunaman rispa kusikuyku?

• ¿Imaynatá jatun tantakuyniykuman riy yanapasunkiman?

Jesusqa niraj wañuchisqa kashaspa nerqa: “Diospa Gobiernonmanta sumaj willaykunapis jallpʼantinpi willakonqa tukuy laya runas yachanankupaj, chaypachamá tukukoyqa jamonqa”, nispa (Mateo 24:14). ¿Imaynatataj chayta jallpʼantinpi willayta atisunman karqa? Jesús jina ruwaspa (Lucas 8:1).

Wasimanta wasi willayku. Jesusqa yachachisqasninman wasimanta wasi willanankuta yachacherqa (Mateo 10:11-13; Hechos 5:42; 20:20). Chantapis maynejpichus willanankuta kamacherqa (Mateo 10:5, 6; 2 Corintios 10:13). Kunanpis kikillantataj ruwayku. Sapa congregacionman maynejpichus willanankuta kamachikun. Ajinamanta Jesuspa kamachisqanman jina, willashaspa runasman ‘sumajta sutʼinchayku’ (Hechos 10:42).

Runaman tukuynejpi willayku. Jesusqa maypichá runa kaj chaypi willaj, qocha kantuspi, pozo kantupi ima (Marcos 4:1; Juan 4:5-15). Noqaykupis kikillantataj runasman tukuynejpi Bibliamanta willayku. Willayku callespi, llankʼayniykupi, parquespi, telefononejta ima. Chantapis vecinosniykuman, familiaresniykuman, colegiomanta chayri llankʼaymanta compañerosniykuman, atikusqanman jina willarillaykutaj. Chayta ruwasqaykurayku, jallpʼantinpi may chhika runas ‘salvacionmanta sumaj willaykunata’ uyarishanku (Salmo 96:2).

¿Pimantaj Diospa Gobiernonmanta sumaj willaykunata willariwaj? Imatachus yachakusqaykitaqa wajkunaman willariypuni, paykunapis qan jina yachakunankupaj.

• ¿Imamantataj willananchej tiyan?

• ¿Imaynatataj Jesús jina runasman willamuyku?

Jesusqa kay jallpʼaman jamorqa runasman Diosmanta willananpaj. Ajinamanta runas salvacionta tariyta atinankupaj (Mateo 20:28). Noqaykupis runasman willamunaykupaj Jesús jina tiempochakuyku (Mateo 28:19, 20). Noqaykumanta wakintaj astawan ashkha horasta willanku, paykunatataj precursores nispa niyku.

Tukuy tiemponkuta Diosmanta willanankupaj churanku. Tukuyniyku sumaj willaykunata willamuyku. Chaywanpis wakenqa, sapa killa 70 horasta Diosmanta willamunankupaj tiempochakunku. Paykunatataj precursores regurales niyku. Paykunamanta ashkhastaj khuskan diallata llankʼanku. Wakintaj precursores especiales kanankupaj ajllasqas kanku. Paykunataj maypichus astawan willajkuna necesitakun, chayman kachasqas kanku. Sapa killataj 130 horasta chayri astawan willanku. Precursoresqa maychus kajllawan kausakunku, necesitasqankuta Jehová qonanpitaj atienekunku (Mateo 6:31-33; 1 Timoteo 6:6-8). Mana precursor regularchu chayri especialchu kajkunataj, precursores auxiliares kayta atinku, 30 chayri 50 horasta sapa killa willanankupaj.

Precursoresqa Diosta, runa masinkutapis munakusqankurayku astawan willamunku. Jesús jinallataj noqaykupis reparayku runas mana michejniyoj ovejas jina kashasqankuta (Marcos 6:34). Yachaykutaj kay tiempopi, aswan qhepaman ima, runas allinta kausakuyta atisqankuta. Chayrayku precursoresqa runa masinkuta munakusqankurayku tiemponkuta, kallpankuta ima Diosmanta yachachinankupaj churanku (Mateo 22:39; 1 Tesalonicenses 2:8). Chayta ruwaspataj, precursoresqa creeyninkuta kallpachanku, Jehová Diosman astawan qayllaykunku, may kusisqataj kanku (Hechos 20:35).

• ¿Imatataj uj precursor ruwan?

• ¿Imaraykutaj wakinkuna precursores jina llankʼanku?

Jehovaj testigosnenqa, unaymantapachaña imaymana escuelasta wakichiyku. Jinamantataj willanankupaj tukuy tiemponkuta churajkunata, ‘Diospaj llankʼayninkuta allinta juntʼanankupaj’ yanapayku (2 Timoteo 4:5).

Precursorespaj Escuela. Kay escuelaqa sojta diasta uj Tantakuna Wasipi ruwakun. Chaymantaj riyta atinku uj watataña precursor regular kajkuna. Kay escuelaqa precursoresta yanapan Diosman astawan qayllaykunankupaj, sumajta willanankupaj, yachachinankupaj, precursoresllapuni kanankupaj ima.

Diospa Gobiernonmanta Willajkunapaj Escuela. Kay escuelaqa iskay killata ruwakun. Chaymantaj riyta atinku unaytaña precursores kajkuna. Paykunataj mayllamanpis willaj ripunankupaj wakichisqa kananku tiyan. Paykunaqa Jesucristo jina ruwanku, ninkutaj: “Kaypi kani, noqata kachaway ari”, nispa (Isaías 6:8; Juan 7:29). Waj ladoman kachajtinkutaj, ichapis pisi imasllawan kausakunanku kanqa. Ichá yachakunanku kanqa, waj costumbresman, chiriman, qʼoñiman, waj jina mikhunasman, waj parlayman ima. Chay escuelamanqa casarasqas, solteros, solteras riyta atinku, 23 watasniyojmanta, 65 watasniyojkama. Chay escuelaqa paykunata yanapan Diosta tukuynejpi sirvinankupaj. Chantapis yanapallantaj Diospaj sumajta llankʼanankupaj.

Galaad Escuela. “Galaad” palabraqa hebreo parlaypi niyta munan “testigo jina sayaj montón”. Chay escuela 1943 watapi qallarerqa. Chaymantapachataj 8.000 kuraj misionerosña graduakunku. Tukuynejpitaj Diosmanta willashanku (Hechos 13:47). Ñaupaj misioneros Peruman chayashajtinkoqa, ni uj congregacionllapis Perupi karqachu. Kunantaj 1.000 kurajña tiyan. Japonman ñaupaj misioneros chayashajtinkutaj, ni 10 testigospis Japonpi karqachu, kunanrí 200.000 kurajña kan. Chay escuelapeqa, Bibliata phishqa killasta sumajta estudianku. Yachakusqankutaj, Diosmanta jallpʼantinpi willakunallanpajpuni sumajta yanapakunankupaj wakichin. Chay escuelamantaj riyta atinku precursores especiales, misioneros, betelitas, congregacionesta waturejkuna ima.

• ¿Imapajtaj ruwakun Precursorespaj Escuela?

• ¿Pikunataj Diospa Gobiernonmanta Willajkunapaj Escuelaman rinku?