Samuelqa cheqan kajtapuni ruwarqa

Samuelqa wawitamantapacha Dioswan tinkukuna toldopi sirverqa, chaynejpitaj tiyakorqa. Runasqa, Jehovata yupaychaj chayman rej kanku. ¿Imaraykuchus Samuel chayman risqanta yachayta munawajchu? Chayta yachanapajqa, mamanmanta parlarina. Mamanqa Ana sutikorqa.

Anaqa, mayta munarqa wawitayoj kayta. Chaywanpis mana aterqachu. Chayrayku Jehovamanta mañakorqa: “¡Jehová yanapariway!”, nispa. Wawayoj kajtintaj kayta ruwananta nerqa: “Uj wawata qowanki chayqa, tinkukuna toldoman kachasaj chaypi llankʼananpaj, chay qayllapitaj tiyananpaj”, nispa. Jehovaqa mañakusqanta uyarerqa. Chaymantataj Anaqa wawitayoj karqa. Chay wawitantaqa Samuelta suticharqa. Chantá kinsa chayri tawa watitayojña kajtintaj, Anaqa nisqanta juntʼarqa. Dioswan tinkukuna toldomantaj, Diosta sirvinanpaj pusarqa.

Dioswan tinkukuna toldopi llankʼaj sacerdoteqa Elí sutikorqa. Paytaj kuraj kaj sacerdote karqa. Iskaynin wawasnintaj kuraj runasña karqanku, paykunapis chayllapitaj llankʼarqanku. Chay lugarqa Jehovata yupaychanapaj karqa. Chayrayku chaypi kaj runasqa allinta kausakunanku karqa. Chaywanpis Samuelqa, Elijpa wawasnin sajra imasta ruwashasqankuta rikorqa. ¿Samuelrí paykuna jinallatajchu sajra imasta ruwarqa?... Mana. Samuelqa cheqan kajllatapuni ruwarqa, tatasnin yachachisqankuman jina.

¿Imatá Elí ruwanan karqa? ¿Manachu wawasninta kʼaminan karqa?... ¡Arí! Dioswan tinkukuna toldopi, mana llankʼajta saqenallanchu karqa. Chaywanpis Eliqa qhawallarqa. Chayraykutaj Jehovaqa, mayta phiñakorqa. Payta, wawasninta imataj castigarqa.

Samuelqa uj chʼisi puñushajtin, wajyasqankuta uyarerqa. Paytaj usqhayllata correspa Eliman rerqa. Elitaj mana wajyasqanta nerqa. Iskay kutitawan ajina karqa. Kinsa kaj kutipitaj Eliqa, Samuelman nerqa: “Ujtawan wajyamusojtenqa, kutichiy: Parlallay Jehová, kay kamachiykeqa uyarishasunki, nispa kutichinanta”. Ajinata Samuel ruwajtintaj Jehovaqa nerqa: “Eliman niy, familianta castiganayta tukuy sajra imasta ruwasqankumanta”, nispa. Chayta Eliman willaytaqa nichá atillarqachu. ¿Samuel chayta willayta manchachikunmachu karqa?... Arí, manchachikorqa. Jinapis, Jehovata kasukuspa imatachus nisqanta Eliman willarqa. Jehovaj nisqanqa tiemponman juntʼakorqapuni. Eliwan iskaynin wawasninwantaj wañorqanku.

Samuelmantaqa mayta yachakusunman. Samuelqa, wajkuna sajra imasta ruwasqankuta rikuspapis, cheqan kajtapuni ruwarqa. ¿Qanpis kikillantatajchu ruwanki? ¿Samuel jinachu Jehovata kasukunki? Jinata ruwanki chayqa, Jehová, tatasniyki ima mayta kusikonqanku.