¿Cristiano nichikojkunawanchu Jerusalén ninakun?

Ñaupajtaqa publicacionesninchejpi nej Diosta wasanchaj Jerusalenqa cristiano nichikojkunawan ninakusqanta. Jerusalén llajtapi Diosta wasanchasqanku, llulla dioskunata yupaychasqanku, suwakusqankupis rijchʼakun cristiano nichikojkunaj ruwasqankuman. Jinapis, ¿Biblia ninpunichu Jerusalén cristiano nichikojkunawan ninakusqanta? Mana. Kay qhepa wataspi publicacionesninchejpi, kay libropipis manaña Bibliaj nisqan imawanpis ninakusqanta ninchu, mana Biblia chayta nejtenqa.

Kaypi tʼukuriy: Jerusalenpeqa Jehovallata yupaychaj kanku, jinapis aswan qhepamanqa chaypi tiyakojkuna Diosta wasancharqanku. Cristiano nichikojkunatajrí ni jaykʼaj Jehová Diosllata yupaycharqankuchu. Astawanpis 300 wata chaynejpi rikhurisqankumantapacha tukuy tiempo llulla imasllatapuni yachachinku.

Chantapis babilonios Jerusalenta thuñisqankumanta qhepaman Jerusalén llajtaqa watejmanta Jehovaj ñaupaqenpi allinpaj qhawasqa karqa, Jehovallatataj chaypi yupaycharqanku. Cristiano nichikojkunatajrí ni jaykʼaj Jehová Diospa ñaupaqenpi allinpaj qhawasqachu karqanku. Manchay ñakʼariypi tukuchisqa kasqankutawantaj manaña jaykʼajpis ujtawan rikhurenqankuchu.

Chay imasta ukhunchariytawan, ¿imatá nisunman? Bibliaj profeciasnin Diosta wasanchaj Jerusalenpi juntʼakusqanta yachakuspaqa ichapis nisunman: “Kaypis jaqaypis cristiano nichikojkunata yuyarichiwan”, nispa. Jinapis Bibliaqa mana ninchu Jerusalenqa cristiano nichikojkunawan ninakusqanta.