Ñawiriqkuna yachayta munanku
¿Dios wawitasta janaqpachaman pusakapunchu angelesman tukuchinanpaq?
Juk wawita wañupuptin, tatasninpa amigosninkuqa, “Dios janaqpachapi angelitosta necesitasqanrayku wawaykichikta pusakapun” nispa paykunata sunquchanku. Chaywanpis chay nisqanku, ¿chiqapunichu kanman?
Juk saqra Dioslla janaqpachapi angelesta sapa necesitaspa, juk wawitata wañuchinman. Chaywanpis Bibliaqa, Jehová Diosmanta mana jinatachu parlan (Job 34:10). Astawanpis munakuyniyuq Dios kasqanta niwanchik (1 Juan 4:8). Sutʼincharinapaq; juk runaqa mana ancha khuyakuyniyuq kaspapis, mana pimantapis wawitanta qhichunmanchu familianman yapaykunanpaq, ¿icharí? Astawanraq Jehová Diosqa mayta munakuwasqanchikrayku ni jaykʼaq chayta ruwanmanchu.
Kaypi tʼukuriy: ¿chiqamantachu Dios astawan angelesta janaqpachapi necesitanman? Mana, Biblia nisqanmanjina Diospa tukuy ruwasqasninqa, may sumaq (Deuteronomio 32:4). Chayrayku Diosqa, angelesta ruwachkaspa maychus necesitasqanmanjina achkha angelesta ruwarqa (Daniel 7: 9, 10). Jinamanta tukuy atiyniyuq Diosqa ni jaykʼaq angelesmanta pisichikunmanchu. Chaywanpis, ¿manachu Biblia niwanchik Dios wakin runasta akllasqanta, paykuna wañupuytawan espiritusman tukuspa janaqpachamanta kamachimunankupaq? Arí, chaywanpis mana ninchu kay akllasqas runasqa, wawitas kasqankuta (Apocalipsis 5:9, 10).
Chantapis Jehová Diosqa, mana wawitasta janaqpachaman pusakapunmanchu, imaraykuchus chayqa, mana paypa munayninmanjinachu kanman. Edén huertapi Diosqa Adanta Evatawan nirqa: “Miraychej, kay pachaman juntʼaychej; atiyniyojtaj kaychej”, nispa (Génesis 1:28). Arí, Diospa munaynin juntʼakunanpaqqa, runasqa wawasniyuq kananku karqa. Chayrayku Diosqa, angelesman tukuchinanpaq wawitasta janaqpachaman pusakapuyta ni jaykʼaq yuyanmanchu. Chantá Bibliaqa, ‘wawas Diosmanta herencia kasqankuta’ nin, nisunman tataspaq juk sumaq regalo kasqankuta (Salmo 127:3). Jehová Dios chay regalota tatasman quptin, ¿paykunamanta qhichukapullanmantaqchu? Mana, ¿icharí?
Yachanchikjina juk wawita wañupuptinqa, tatasninpaq may llakiy. Chaywanpis wawitankuta rikukapunankupaq, ¿juk suyakuy kanchu? Bibliaqa, Dios kay Jallpʼata juk paraisoman tukuchiptin achkha runasta kawsarichinanta niwanchik. Manchay kusiychá kanqa, wawitas kawsarimuytawan tatasninkuwan tinkukapuptinkuqa (Juan 5:28, 29). Rikunchikjina Diosqa, wawitas wiñanankuta, kusikunankuta, payta riqsinankuta ima munan. Chayrayku nisunman wañupuqkuna wawitasqa, mana janaqpachapichu angelesjina kawsachkasqankuta, manaqa aya pʼampanapi kachkasqankuta, Jallpʼa juk paraisoman tukuptintaq kawsarimunankuta. Chaypitaq, munakuyniyuq Ruwawaqninchikqa, mayta bendeciwasunchik, manchay kusiywantaq wawitas, machu runas ima, wiñay wiñaypaq Diosta yupaychasunchik.