“Juk copitatawan munani”

ALBERTOQA, 11 watayuqllaraq kachkaspa alcoholta ukyayta qallarirqa.a Amigosninwan imataq montepi tantakuq kanku, peliculaspi atipaq runasta qhawasqankumanjina ruwanankupaq. Chaytataq pukllaspalla ruwaq kanku, chaywanpis, chiqamantapuni alcoholta ukyaq kanku.

Tonyqa, 40 watayuq kachkaspa alcoholta ukyayta qallarirqa. Qallariypiqa chʼisisllapi jukta chayri iskay copasllata ukyaq, chantá pisi tiemponmanqa, phichqa chayri suqta copastaña ukyachkarqa, chaywanpis tiempo pasasqanmanjina diantinpi machkha copastachus ukyasqantaqa, manaña yuyakuqchu.

Albertoqa, chʼampayninta atipananpaq yanapata maskʼarqa, Tonytaqrí familian, amigosnin ima yanapayta munasqankuta qhisacharqa. ¿Imataq kunan paykunamantarí? Albertoqa, kawsachkallanpuni, Tonytaqrí machasqamanta autonta apachkaspa chocakusqanrayku, pasaq watasllapi wañupurqa.

Wakinkunaqa, sapallanku ukyaspa ni pita ñakʼarichichkasqankuta yuyanku, chaywanpis ajinata yuyaspaqa, pantachkanku, imaraykuchus machaykunankukama ukyaspa familiasninkuta llakichinku.b Rikukunjina, achkha runas, machasqamanta sunquta nanachinapaqjina parlanku, wakkunata maqarpanku, abusanku, wañuchinku, autota apachkaspa chocakunku, chayri anchata machasqankurayku unquykunku. Tukuy chay chʼampaykunata allinchanapaq may chhika qullqi gastakun, chantá machaykuqkuna, familiasninku imataq sinchita ñakʼarinku.

Chaywanpis Estados Unidos suyupi, wakin doctores ninku: “Mana tukuy machaykuqkunachu alcoholman qukuq runas kanku, chantá mana tukuy alcoholman qukuq runaschu machaykunankukamapuni ukyanku”, nispa. Wakinkunaqa, mana alcoholman qukuq runaschu kanku, chaywanpis mana reparakuspalla anchata ukyayta qallarinku. Wakinkunataqrí wakin kutilla ukyanku, chaywanpis ukyayta qallarispaqa, saksanankukama waqtaykunku.

¿Imaynatá reparakusunman alcoholta ukyayman qukuchkasqanchiktañachus manachus? Chantá, ¿imaynatataq reparasunman juk copitatawan ukyananchik manaña allinchu kasqanta? (Proverbios 23:29, 30.) Qhipan yachaqanaspi kay tapuykunaman kutichisunchik.

[Sutʼinchaykunasnin]