Mañakuy

6 ¿Yanapawanchikchu?

MAY chhika runas, mañakuy mana yanapakusqanta ninku. Chaywanpis, Bibliaqa allinninchikpaq kasqanta niwanchik (Lucas 22:40; Santiago 5:13). Mañakuyqa, Diosta yupaychanapaq, allinta kakunapaq, kusisqa kawsakunapaq ima, yanapawanchik. ¿Imaynatá?

Sutʼincharina: wawas regalota japʼiptinku, tatasninku, ¿imatá ruwanankuta yachachinku? Mana, kusisqallachu japʼikunankuta, manaqa graciasta quyta yachachinku. Graciasta quspa, astawan agradecekuyta yachanchik. Kikillantataq Diosninchikmanpis agradecekuyta yachakusun. Imaynatachus mañakuykuna yanapawasqanchikta qhawarina.

Graciasta qunapaq mañakuna. Dios tukuy imata quwasqanchikmanta, graciasta quptinchik, bendicionesninpi tʼukurinchik. Chayraykutaq, aswan kusisqas, agradecekuyta yachaq runasman ima, tukunchik (Filipenses 4:6).

Sutʼincharina: Jesusqa, Tatan uyarisqanmanta graciasta qurqa (Juan 11:41).

Juchasta pampachananpaq mañakuna. Diosmanta, juchanchikta pampachananta mañakuspaqa, pisipaq qhawakusqanchikta, atipanapaq, yanapawanchik. Chantapis conciencianchikta yachachin, juchata reparananchikpaq, pesachikunanchikpaq ima.

Sutʼincharina: Davidpa pesachikusqanmanta mañakuynin (Salmo 51).

Yuyayta, yachayta japʼinapaq mañakuna. Kay mañakuyqa, llampʼu sunqu kanapaq yanapawanchik, imatachus mana ruwayta atisqanchikta yuyarichiwanchik. Ñuqallanchikpi atienekunamantaqa, Diospi atienekunapaq yanapawanchik (Proverbios 3:5, 6).

Sutʼincharina: Salomonqa, Israel llaqtata kamachinanpaq, Diospa yanapayninta, yuyaychayninta mañakurqa (Reyes 3:5-12).

Llakisqa kaspa mañakuna. Imallamantapis mayta llakikuspaqa, sunqumantapacha Diosman willakuy yanapawanchik. Chantapis, Jehovapi atienekunchik (Salmo 62:8).

Sutʼincharina: Rey Asá, enemigospa ñawpaqinpi mañakusqa (2 Crónicas 14:11).

Wakkunapaq mañapuna. Wakkunapi yuyayqa, khuyakuyta, dakukuyta wak kʼacha kaykunata ima wiñachinapaq yanapawanchik.

Sutʼincharina: Jesusqa, discipulosninpaq mañapurqa (Juan 17:9-17).

Diosta jatunchanapaq mañakuna. Jehovap ruwaykunasninta, kʼacha kaykunasninta ima allinpaq qhawaptinchik, munakuyninchik, jatunpaq qhawasqanchik ima wiñanqa. Kayjina mañakuykunaqa Diosman astawan qayllaykuchiwanchik.

Sutʼincharina: Davidqa, mañakusqanpi, Diospa ruwasqasninta jatunpaq qhawasqanta, rikuchirqa (Salmo 8).

Mañakuyqa, tukuy imaymanamanta yanapawanchik. Chantapis, “Diosqa chay mana unanchay atina sonqo tiyaykuyninta” qullawanchiktaq (Filipenses 4:7). Kunan sunqu tiyasqa kawsakuyqa, tukuy imamanta aswan sumaq. ¡Mana anchata unqunapaq yanapawanchik! (Proverbios 14:30.) Chantá, ¿ñuqallanchikmantachu sunqu tiyasqa kawsakusunman? Chayri, ¿yanapatachu necesitanchik?

[10 paginapi sutʼinchaynin]

Mañakuyqa allin kanapaq, kusisqa kawsanapaq, Diosta yupaychanapaq ima, yanapawanchik