Yachayniyojqa “aswan yuyayniyoj” kayta maskʼan
Kausaytaqa mama qochanejta viajaywan kikinchakun. Chaywanpis runaj yachaynenqa, runas allinta kausanankupaj pisillata yanapan. Chayrayku ashkha runasqa, kausayninkupi yakuman chinkaykuspa jinanku (Sal. 107:23, 24, 27). ¿Imaraykú kay kikinchay may allin?
Unayqa mama qochapi barcota purichiy, yachajkunallapaj karqa. Chantá unaytaña barcota purichejkunata qhawaspalla yachakuyta atej kanku (Hech. 27:9-11). Pintasqa dibujospitaj, barcosta purichejkunata wajkunamanta nisqaqa aswan jatunta pintaj kanku. Barcota purichinapajqa, maynejmanchus wayrasqanta, chʼaskasta, waj imastawan sumajta rejsinanku karqa. Bibliapeqa barcota purichejkunamanta wakin, “yuyayniyoj” kasqankuta nin, chaytaj “yachayniyoj” kay niyta munan (Eze. 27:8).
Kay tiempopi chʼampaykunaqa may jatuchaj kanman, unay tiempopi barcota purichejkunajta jina. ¿Imataj yanapawasunman?
¿IMAYNATÁ “ASWAN YUYAYNIYOJ” KASUNMAN?
Kausayninchej, barcopi riy jina kasqanta yuyaspa, Biblia kayta nisqanta ukhuncharina: “Yachayniyojqa uyarispa, aswan yachayniyoj kanqa; yuyayniyojpis aswan yuyayniyoj kanqa”, nispa (Pro. 1:5, 6). Hebreo qallupi, “aswan yuyayniyoj” rimaykunata, unay tiempopi barcota sumajta purichiyta yachajmanta parlananpaj oqharin. Chaytaj barcota sumajta, cheqanta ima purichiy ninayan.
Mayta kallpachakuna kajtinpis, tukuy “aswan yuyayniyoj” kasunman. Mama qochapi jinataj, kausayninchejpi sumajta puriyta yachasunman. Chaypajqa Proverbiospi nin jina, “yachayniyoj”, “yuyayniyoj” kana, sumajtataj entiendena (Pro. 1:1-6; 2:1-9). Chantapis Diospa yuyaychayninta maskʼanapuni, imajtinchus sajra runaspis, munasqankuta imaynatachus ruwayta yachanku (Pro. 12:5).
Chayrayku Diospa Palabranta sumajta ukhunchana, ajinamanta Jehovamanta mayta yachakusun, Jesucristomantapis, pichus Tatan jinapuni ruwan (Juan 14:9). Tantakuykunapipis ashkha yuyaychayta japʼinchej. Chantá wajkunamanta, astawanqa tatasninchejmanta mayta yachakusunman (Pro. 23:22).
TʼUKURIY, ÑAUPAJMANTATAJ WAKICHIKUY
Qhollchoqeyashaj yakupi jina sinchʼi chʼampayniyoj kaspa, “aswan yuyayniyoj” kayqa may sumajpuni. Imaraykuchus jinapi rikukuspaqa, imatachus ruwanamanta iskayrayasunman, chaytaj mana allinman chayachiwasunman (Sant. 1:5, 6).
Chantapis “aswan yuyayniyoj” rimayta, guerramanta parlanapaj oqharikullantaj. Bibliapi nin: “Maqanaku chʼajwapi atipanapajqa sumaj yuyaywan wakichina; sumaj yuyaychajkuna ashkha kajtinkutaj, pipis atipan”, nispa (Pro. 20:18; 24:6).
Guerrata sumaj yuyaywan wakichej runa jina, Dioswan masichakusqanchejta imaschus chinkachinayasqanpi tʼukurispa, ñaupajmanta wakichikuna (Pro. 22:3). Sutʼincharinapaj, waj llankʼayta chayri aswan allin llankʼayta qoyta munasojtinku, kaykunapi tʼukuriwaj: mashkhatachus pagasunankupi, chay llankʼayman mashkha tiempopichus chayanaykipi, kutimunaykipi ima. Kaykunapipis tʼukurinayki tiyan: chay llankʼay Bibliaj yuyaychasqanman jinachus manachus kasqanpi, chayri waj horaspi llankʼanayki kasqanrayku, cristiano ruwanasniykita niña ñaupajta jina ruwajta saqesunanpi ima (Luc. 14:28-30).
Hermana Lorettamanta parlarina. Payqa uj empresapi sumaj llankʼayniyoj karqa. Chay empresa wajnejman astakunan kajtintaj, aswan allin llankʼayta qonayarqanku. Chay empresapi kamachejkuna jinata nerqanku: “Kayqa kunan kutilla. Tantakunaykichej Wasipis chay qayllallapi kasqa”, nispa. Chaywanpis payqa, Jehovata astawan sirvinanpaj llankʼayninta pisiyachiyta munarqa, chay llankʼayta japʼikojtintaj cristiano ruwanasninta juntʼananpaj niña tiempoyoj kananta reparakorqa. Chayrayku patronnin, paylla sumaj llankʼaj kasqanta nispa qhepachiyta munajtinpis, chay llankʼaymanta llojsiporqa. Kunanqa Loretta 20 watasta jinaña precursora jina llankʼashan. Payqa “aswan yuyayniyoj” kasqanrayku, nisunman Bibliaj yuyaychaykunasninman jina ñaupajmanta wakichikusqanrayku, allin risqanta nin. Jehovawan masichakusqanpis sinchʼiyarqa, ashkha runastataj Bibliamanta yachakunankupaj yanaparqa.
Familia ukhupipis “aswan yuyayniyoj” kananchej tiyan. Wawasta yachacheyqa mana uj ratollachu. Chantapis uj tataqa, familian Dioswan masichakunanpaj, nitaj imatapis pisichinanpaj imatachus ruwananta ajllanan tiyan, chaytaj allinninkupaj kanman chayri mana (Pro. 22:6). Cristiano tatas kayta tapukunkuman: “Parlasqaykuwan ruwasqaykuwan, ¿yachachishaykuchu wawasniykuta Dioswan masichakunankupaj, jatunyaspataj allinta imatapis ruwanankupaj? Imaynatachus kausasqaykuwan, ¿yachachishaykuchu kapusqallankuwan kusisqa kayta, cristiano ruwanasninkutataj allinta juntʼayta?” (1 Tim. 6:6-10, 18, 19).
Allin rinawanchejpajqa, mana runas jinachu kapuyniyoj kayta, rejsisqa kayta ima maskʼana. Rey Salomonpis chayta yachaspa, Dios yuyaychasqanman jina kayta qhelqarqa: “Yachani, pikunachus Diosta manchachikuspa kawsakunku, chaykunata allimpuni rinanta”, nispa (Ecl. 8:12). Arí, “aswan yuyayniyoj” kayta Diospa Palabranpi maskʼayqa, aswan sumaj (2 Tim. 3:16, 17).
[30 paginapi dibujo/foto]
Pintasqa dibujospeqa, barcosta purichejkunaj ruwayninkuta sutʼita rikuchinankupaj, aswan jatunta pintaj kanku.
[Maymantachus foto orqhokusqan]
Su concessione del Ministero per i Beni e le Attività Culturali. Kay dibujoqa mana copianapajchu.