¿Imaynatá tukuy ima qallarerqa?

Génesis, Bibliaj ñaupaj kaj libronqa, pisi parlayllapi imaynatachus tukuy ima qallarisqanta sutʼinchan. Nin: “Qallariypeqa Dios cielotawan, kay pachatawan ruwarqa”, nispa (Génesis 1:1). Tukuy laya plantasta, animalesta ima ruwaytawan, Diosqa ñaupa runa Adanta, warmin Evatawan ruwarqa. Animalesmanta nisqaqa, imatachus ruwayta ajllayta aterqanku. Imaraykuchus Diospa rijchʼayninman ruwasqa karqanku. Chaywanpis allinta ajllananku karqa. Diosta kasukojtinkoqa, wawasninkuwan khuska mana onqospa, nitaj wañuspa, Jallpʼapi wiñaypaj kusisqa kausakunkuman karqa, Dios qallariypi munarqa ajinata.

Chaywanpis uj ángel, munaynillanta maskʼaspa ñaupa tatasninchejta chʼaukiyarqa. Jinamantataj Satanasman tukorqa, chaytaj “Churanakoj” niyta munan. Payqa uj katarinejta Evata chʼaukiyarqa, mana Diosllawan kausaspa allin rinanta nispa. Adanwan Evawanqa Satanasta kasorqanku, Diospa kamachiyninpi kaytataj qhesacharqanku. Mana allinta ajllasqankurayku, wiñay kausayta chinkacherqanku. Jinamantataj wawasninkuman juchata, wañuyta ima saqerqanku.

Chaywanpis Diosqa, Adanpa wawasninman wiñay kausayta watejmanta qonanpaj, chay ratopacha yuyaychakorqa. Payqa, uj “miray” chayri uj runa jamunanta nerqa. Chay runataj Satanasta chinkachinan karqa, paywan ñaupa tatasninchejwan rikhurichisqanku ñakʼariykunatapis (Génesis 3:15). ¿Pitaj chay “miray” karqarí? Tiempowanraj yachakunan karqa.

Chaykamataj Satanasqa, Diospa munaynin mana juntʼakunanpaj, juchawan sajra kajwan miraykunanpaj ima, tukuy imata ruwarqa. Chayrayku Diosqa, sajra runasta Jatun Parawan chinkachinanta nerqa. Cheqa sonqo Noemantaj, pay, familian, animales ima salvakunankupaj, uj arcata —jatun cajata jina— ruwananta kamacherqa.

Jatun Paramanta watanman, Noé, familian ima, arcamanta llojserqanku. Jallpʼaqa llimphu kasharqa. Suyasqa “miraytaj” niraj chamorqachu.

(Kaykunamanta orqhokun: Génesis 1-11; Judas 6, 14, 15; Apocalipsis 12:9.)