¿Imaraykutaj runas tapukunku?

Uj jatun llajtapi, Diospi mana creejkuna kay jina letrerota churasqanku: “¿Diosta necesitankichu? May chhika runas, mana Diosllawan allinta kausakunku”, nispa. Chay runaspaj, Diosqa mana kanchu, nitaj Payta faltachankuchu.

Wakintajrí, Diospi creesqankuta nispapis mana valechinkuchu. Catolicospa tata curanku Salvatore Fisichella, iglesianpi runasmanta nerqa: “Diospi mana creejkuna jinallataj kausayku. Ni pi creenmanchu cristianos kasqaykuta”, nispa.

Wakintaj ruwanasninkurayku, Diosmantaqa ni yuyarikullankupischu. Ancha karupi kasqanta yuyanku, chayrayku mana kausayninkupi valechinkuchu. Llakiypi chayri imata necesitaspalla Diosmanta yuyarikunku. Kamachinapaj muchachonkupis kanman jina qhawanku.

Wakinkunarí, iglesiaspi yachachisqanku qhasilla kasqanta ninku. Nitaj chaypi yachachikusqanman jinachu kausanku. Sutʼinchanapaj, Alemaniapi catolicosmanta khuskan kuraj, mana casaraspalla tiyakunku. Chaytataj mana Bibliallachu juchachan, manaqa iglesiankupis (1 Corintios 6:18; Hebreos 13:4). Nitaj catolicosllachu, iglesiankupi kajkuna puraj uyas kasqankuta ninku. Waj religionesmanta pastorespis, iglesiankupi kajkuna ruwasqasninkuwan “Diosta qhesachasqankuta” llakiywan nillankutaj.

Chaynejta kay tapuy rikhurin: ¿Diosta necesitanchejpunichu? Chay tapuytaj mana kunallanmantachu. Kay pachaj qallariyninpiña rikhurerqa. Chayrayku chay tapuypa kutichiyninta yachanapaj, imaschus qallariypi kasqanta Génesis libro nisqanman jina ukhuncharina.