“Noqa tukuy imata mosojyachini”

¿Mana onqospa familiaykiwan khuska wiñaypaj kausayta munawajchu? ¿Ñakʼariy, nanay, wañuy ima chinkanantarí? Chay jina kausayqa cheqamantapuni kanqa. Imaraykuchus Dios chayta nerqa. Imaynatachus juntʼakunanta yachanapaj, Apocalipsis 21:3-5 (leey) nisqanta ukhuncharina.

Diosqa “tukuy waqayta ñawisninkumanta pichanqa” (Apocalipsis 21:4). ¿Imayna waqaytataj Dios pichanqa? Mana kusiymanta waqaytachu, nitaj ñawisninchej necesitasqan waqaytachu. Manaqa llakiymanta waqasqanchejta pichanqa. Chantapis Diosqa, imaschus waqachiwasqanchejta chinkachillanqataj, nisunman nanayta, llakiytawan.

“Manañataj wañuy kanqachu.” (Apocalipsis 21:4.) ¿Imataj astawan waqachiwanchej? Wañuy. Chaywanpis Jehovaqa, kasukoj runasta wañuymanta kacharichenqa. ¿Imaynatá? Adanmanta japʼisqanchej juchata chinkachispa (Romanos 5:12). Jehovaqa runaspa juchankuta Jesuspa wañuyninnejta pichanqa.a Tukuy enemigosmanta qhepa kaj “atipasqa[taj] wañuy kanqa” (1 Corintios 15:26). Chaymanta, tukuy runas mana onqospa, wiñaypajtaj kausasun, imaynatachus Dios qallariypi kausananchejta munarqa ajinata.

“Nitaj nanaypis” kanqachu. (Apocalipsis 21:4.) ¿Imayna nanaytaj chinkanqa? Jucharayku rikhurisqan nanaykuna. May chhika runas, cuerponku, sonqonku chayri llakiyrayku umanku nanajtin, ni puñuyllatapis atinkuchu. Chaywanpis tukuy chaykuna chinkaponqa.

Tumpamantawan, mana waqaspa, mana wañuspa, ni ima nanaywantaj kausakusun. Chaywanpis ichá ninki: “¿Maypí ajinata kausakusunri? ¿Cielopichu?”, nispa. Mana. Diosqa imatachus ruwananta nishaspa, jinata qallarerqa: “Diospa tiyakuynin runas ukhupi kashan”, nispa. Runastaj Jallpʼapi tiyakunchej (Apocalipsis 21:3). Chantapis “manañataj wañuy kanqachu” nispa nillarqataj. Chaytaj uj tiempopi wañuy kasqanta, chantataj chinkapusqanta rikuchin. Cielopeqa mana wañuyta rejsinkuchu. Jallpʼapirí qallariymantapacha tukuy wañunchej. Chayrayku Dios sumaj kausay kananta nisqanqa, kay Jallpʼapi juntʼakonqa.

Jehovaqa nisqanpi atienekunanchejta munan. Qhepaman ima bendicioneschus kananmanta parlaytawan, jinata nerqa: “Noqa tukuy imata mosojyachini”, nispa. Chantá nillarqataj: “Kay palabrasqa maychus kajpuni, cheqataj kanku”, nispa (Apocalipsis 21:5). Diospa nisqan juntʼakojtin, ¿familiaykiwan khuska chaypi kausakuyta munawajchu? Imatachus chaypaj ruwanaykita yachakuy.