CRISTIANOSPA KAUSAYNINKUMANTA
Tukuy kausayniypi Jehovata sirvini
Kay 1947 watapi, Santa Anamanta (El Salvador) Jehovaj testigosninman curas churanakorqanku. Sapa semana jina chay lugarmanta hermanosqa misionerospajpi Torremanta Qhawaj revistata ukhunchashajtinku, waynas rumiswan punkuman chʼanqayta qallarerqanku. Chantá curas, waj runaspiwan kʼanchanasninku, santosninku oqharisqas chayarqanku. Iskay horasta jinataj rumiswan wasiman chʼanqaspa “¡Jallalla Virgencita!”, “¡Jehová wañuchun!”, nispa qhaparisharqanku. Chay runasqa misionerosta ripunankupaj mancharichiyta munarqanku. Tukuy chayta willariykichej, imaraykuchus noqa chay misionerosmanta ujnin karqani. Chaymanta kunankamaqa 67 watasña kashan.a
CHAYMANTA iskay wata ñaupajta, Evelyn Trabert hermanawan Galaad Escuelaman clase 4 nisqaman rerqayku, chay Escuelamantataj Santa Anaman kachawarqayku. Ñaupajtaqa imaraykuchus Diospaj astawan llankʼayta ajllasqayta willarisqaykichej. Chantá 29 watasta jina misionera kasqaymantañataj.
CHEQA KAJMANTA YACHAKUYKU
Spokane (Washington, Estados Unidos) llajtapi, 1923 watapi nacekorqani. Tatasniy luteranos kaspapis, infiernomanta yachachiyta qhesachaj kanku. Imaraykuchus mana creeyta atejchu kanku, munakuyniyoj Dios runasta nina lauraypi castigananta (1 Juan 4:8). Tatayqa uj panaderiapi llankʼaj. Uj chʼiseqa llankʼaj masin, Biblia infiernomanta mana yachachisqanta sutʼinchasqa. Pisi tiemponmantaj tatasniy Jehovaj testigosninwan Bibliamanta yachakuyta qallarerqanku. Yachakorqankutaj imatapunichus Biblia wañuymanta yachachisqanta.
Tatasniy yachakushajtinku 9 watayojllaraj kasharqani. Yuyarikunitaj tatasniy Bibliamanta yachakuspa mayta kusikusqankuta. Astawanraj kusikorqanku Diospa sutin Jehová kasqanta, manataj kinsa uyayojchu kasqanta yachaspa. Tukuy chaykunata sumajta yachakorqani, Juan 8:32 nin jinataj, cheqa kajqa llulla yachachiykunamanta kacharichiwanchej. Bibliata ukhunchaspa mayta kusikoj kani, nitaj saykʼojchu kani. Manchali kaspapis tatasniywan willaj rej kani. Tatasniy 1934 watapi bautizakorqanku, noqataj 16 watayoj 1939 watapi bautizakorqani.
1941 watapi San Luispi (Misuri) tatasniywan uj jatun tantakuypi kashani
Kay 1940 watapi tatasniy wasiykuta venderqanku. Coeur dʼAlene (Idaho) llajtaman ripuspataj kinsantiyku precursores karqayku. Uj taller mecanicoj patanpi kaj wasita alquilakorqayku. Chaypitaj tantakuykunata ruwaj kayku. Jaqay tiempopeqa mana Tantakuna Wasis kajchu, chayrayku hermanospa wasisninkupi, chayri alquilasqa wasispi tantakoj kayku.
Kay 1941 watapi San Luis (Misuri) llajtaman uj jatun tantakuyman rerqayku. Domingo pʼunchaypi tantakoyqa “Día de los hijos” (Wawaspaj tantakuy), nisqa karqa. Wawastaj 5 watayojmanta, 18 watayojkama ñaupajpi tiyakorqayku. Hermano Joseph Rutherford umallirichiyninta tukuchishaspaña niwarqayku: “Wawas, qankuna [...] Diosta, Reyninta ima kasukuyta ajllarqankichej, sayarikuychej”, nispa. Tukuyniykutaj sayaykorqayku. Chantá nerqa: “¡Qhawaychej, 15.000 kuraj Reinoj mosoj testigosnin!”, nispa. Chay kutipitaj, tukuy kausayniypi precursora kanayta nerqani.
FAMILIANTIN DIOSTA SIRVIYKU
Chay jatun tantakuymanta, killasninman uj qotuchakuyta sayarichinaykupaj Californiaj ura ladonpi kaj Oxnard llajtaman riporqayku. Tiyakorqaykutaj ruedasniyoj wasipi, chaytaj uj camayojlla karqa. Ñaupajtaqa uj cuartoyoj karqani. Chay llajtapitaj sapa chʼisi mesa patapi camayta wakichinayku karqa.
Kay 1941 watapi diciembre 7 pʼunchaypi Californiaman niraj chayashajtiyku, Pearl Harbor (Hawái) llajtaman Japón bombasta kachaykusqa. Chayraykutaj qʼayantin Estados Unidos Iskay kaj Guerra Mundialman yaykorqa. Japonesespaj yaku ukhunta purej barcosninpi soldadosqa, mama qocha kantunta qhawaspa chay barcospi purej kanku. Chayrayku Californiamanta autoridades chʼisisninpi luzta apaganaykuta niwarqayku. Laqha kasqanraykutaj chay soldadosqa mana disparamojchu kanku.
Chaymanta killasninman, Cleveland (Ohio) llajtaman 1942 watapi, septiembre killapi Asamblea Teocrática del Nuevo Mundo nisqaman rerqayku. Chaypitaj hermano Nathan Knorrpa, “Paz... ¿será duradera?” umallirichiyninta uyarerqayku. Sutʼincharqataj Apocalipsis 17 capitulota, chaypi nin: “Phiña animalqa karqa, kunantajrí manaña kanchu. Ukhu pachamanta wicharim[onqa]”, nispa (Apo. 17:8, 11). Sutʼincharqataj chay “phiña animalqa” Sociedad de Naciones kasqanta, 1939 watapitaj chinkasqanta. Biblia nin jinataj chay phiña animalpa cuentanmanta waj rikhurinan karqa, uj tiempotataj allin kausay kanan karqa. Chaytaj ajinapuni karqa. Kay 1945 watapi Iskay kaj Guerra Mundial tukukorqa. Chantá chay ‘phiña animal’, watejmanta rikhurillarqataj Naciones Unidas sutiwan. Chaymantapachataj Jehovaj testigosnenqa aswan ashkha suyusman willayninkuwan chayarqanku. Diospa llajtantaj wiñallarqapuni.
Galaad Escuelamanta diplomay
Chay profeciaqa maytaraj runasman willana kasqanta reparanaypaj yanapawarqa. Chayrayku Galaad Escuela qallarinanta willakojtin, misionera kayta mayta munarqani. Kay 1943 watapi Portland (Oregón) llajtaman precursora kanaypaj kachawarqanku. Chay wataspeqa gramofonoswan willaj kayku. Uj hermanoj umallirichiyninta uyarichiytawantaj, Diospa Reinonmanta parlaj publicacionesta saqej kayku. Chay watantintaj misionera kaypi yuyarqani.
Kay 1944 watapi Galaad Escuelaman amigay Evelyn Traberttawan wajyariwasqaykumanta kusikorqani. Chaypi yachachejkunaqa Bibliata ukhunchaspa kusiyta tarinaykupaj 5 killasta yanapawarqayku. Chay hermanos llampʼu sonqos kasqanku, ¡mayta tʼukuchiwarqayku! Imaraykuchus mikhuna horasta paykuna meseros karqanku. Kay 1945 wata enero 22 pʼunchayninpi chay Escuelapi yachakuyta tukorqayku.
MISIONERA JINA LLANKʼASQAY
Kay 1946 wata, junio killapi noqa, Evelyn, Leo, Esther Mahan ima El Salvadorman chayarqayku. Jaqaypeqa ‘chajras cosechanapaj poqosqaña kasharqanku’ (Juan 4:35). Killasninmantaj, Santa Anapi ñaupaj kaj iskay pʼunchaypaj jatun tantakuyta ruwarqayku. Tukuypaj umallirichiyta uyarinankupaj ashkha runasta wajyarerqayku, 500 runas jina jamusqankumantataj kusikorqayku. Chaytaj chay llajtamanta religionta kamachejkunata mayta phiñaricherqa. Semananmantaj qallariypi willarerqaykichej chay karqa. Jinapis Santa Anamanta mana riporqaykuchu. Astawanpis llampʼu sonqoyoj runasta yanaparqayku. Curasqa mana munarqankuchu runas Bibliata leenankuta. Chantapis wakillan Bibliata rantikuyta atej kanku. Ashkha runastaj Diosmanta yachakuyta munarqanku. Castellanota yachakushasqaykuta, Jehovamanta, kay Jallpʼata uj paraisoman tukuchinanmanta willasqaykuta ima jatunpaj qhawaj kanku.
Galaad Escuelamanta phishqa El Salvadorman rerqayku. Lloqʼemanta, paña ladoman: Evelyn Trabert, Millie Brashier, Esther Mahan, noqa, Leo Mahan ima
Chay llajtapeqa Rosa Ascencioman ñaupajta Bibliamanta yachacherqani. Yachakuyta qallariytawantaj, tiyakusharqa chay runamanta tʼaqakorqa. Tiemponmantaj chay runapis yachakullarqataj. Chantá casarakorqanku, bautizakorqanku, sonqo kʼajaywan willaj testigostaj karqanku. Rosaqa ñaupaj kaj precursora karqa chay lugarpi.b
Rosaqa tienditayoj karqa. Willaj rinanpajtaj wisqʼaykoj, necesitasqanta Jehová qonanpitaj atienekoj. Tienditanta kicharejtenqa ashkha runas rantikoj rej kanku. Rikorqataj Mateo 6:33 versiculoj nisqan cheqapuni kasqanta. Wañupunankamataj cheqa sonqo karqa.
Uj kuti uj cura wasiyojniywan parlaj jamorqa, chay wasipeqa sojta misioneros tiyakoj kayku. Chay curaqa wasiyojman alquilallawajtiykupuni payta, warminta ima iglesiamanta qharqonankuta nerqa. Wasiyojniykutaj chay curawan phiñasqa kasharqa sajra ruwasqasninta rikusqanrayku. Chayraykutaj chay curata mana kasutapis ruwarqachu. Astawanpis iglesiamanta qharqonankuta mana manchachikusqanta nerqa, wasinpi tiyakunallaykutapuni niwarqayku.
MAY REJSISQA RUNA DIOSMANTA YACHAKUN
1955 watapi sucursal ruwakorqa
San Salvadorpi uj ingenieroj warmin Bibliamanta uj misionerawan yachakusharqa. Chay ingenieroqa Baltasar Perla sutikorqa. Kʼacha runa karqa, llulla religionespi millay imasta rikusqankuraykutaj niña Diospi creejchu. Niraj testigo kashaspataj, ni imata mañaspalla sucursalniykoj planosninta, sucursalta ima ruwarqa.
Sucursalta hermanoswan ruwashaspataj, cheqa kajta tarisqanta repararqa. Kay 1955 wata julio 22 pʼunchaypitaj bautizakorqa. Pisi tiemponmantaj warmin Paulinapis bautizakullarqataj. Iskaynin wawasninpis Jehovata cheqa sonqo sirvinku. Ujnenqa Baltasar sutikun, 49 watastañataj Brooklyn Betelpi kashan, pachantinpi willakunanpajtaj yanapakushan. Kunantaj Estados Unidospi Comité de Sucursalmanta ujnin.c
San Salvadorpi jatuchaj tantakuykunata ruwayta qallarejtiyku, hermano Perla yanapawarqayku uj gimnasiota mañakunaykupaj chay tantakuykunata chaypi ruwanaykupaj. Qallariypeqa pisilla kaj kayku. Jehovaj yanapayninwantaj sapa wata astawan yapakusqaykurayku, gimnasioman niña yaykuyta aterqaykuchu. Chay tantakuykunapeqa Bibliamanta noqawan yachakojkunawan tinkoj kani. Paykunataj allchhisniyta rejsichiwaj kanku, nisunman Bibliamanta yachacherqanku chay hermanosta, pikunachus chaypachallaraj bautizakorqanku. ¡Chaytaj mayta kusichiwarqa!
Hermano Franz jatun tantakuypi misioneroswan parlashan
Uj jatun tantakuypi, uj hermano noqawan parlariyta munasqanta niwarqa. Chaytaj tʼukuchiwarqa, imaraykuchus payta mana rejserqanichu. Niwarqataj: “Santa Anapi kashajtiykichej, rumiswan chʼanqaj waynasmanta ujnin kani”, nispa. Jehovata sirvishasqanta yachaspataj mayta kusikorqani. Chaytaj rikuchiwarqa Diospaj astawan llankʼayqa ni imawan kikinchakusqanta.
El Salvadorpi ñaupaj kaj iskay pʼunchaypaj jatun tantakuyman rerqayku
AJLLASQAYMANTA KUSISQA KASHANI
El Salvadorpa llajtasninpi 29 watasta jina misionera karqani. Chay llajtastaj Santa Ana, Sonsonate, Santa Tecla, San Salvador ima kanku. Kay 1975 watapitaj Diosmanta mayta mañakuytawan, machitu tatasniyta yanapanaypaj misionera llankʼayniyta saqeporqani. Spokane llajtamantaj kutiporqani.
Tatayqa 1979 watapi wañuporqa. Mamaytataj qhawanallaypuni karqa, astawan machuyapusqanraykutaj tatay wañupusqanmanta 8 watasninman, 94 watasniyoj wañuporqa. Chaytaj noqapaj may llakiy karqa, chayraykutaj may saykʼusqa kasharqani. Jina llakisqa kashasqayraykutaj herpes zóster chayri culebrilla nisqawan onqoykorqani. Chayta atipanaypajtaj Diosmanta mañakusqay, Jehová yanapawasqan ima yanapawarqa. Jehovaqa “yuraj chujchallaña” kanaykama qhawawaspa Isaías 46:4 versiculopi nisqanta juntʼarqa.
Kay 1990 watapitaj Omak (Washington) llajtaman riporqani. Chaypitaj castellanota parlajkunaman willarqani, chaytaj ujtawan yanapakushasqayta reparachiwarqa. Wakin noqawan Bibliamanta yachakojkunaqa bautizakorqanku. Tiemponmantaj Omak llajtapi kaj wasiypi ruwanasta niña ruwayta atisqayrayku, 2007 watapi noviembrepi Chelan llajta qayllitaman riporqani. Kaypitaj noqalla paya hermana kani, chayraykutaj castellano qotuchakuymanta hermanosqa abuelankupaj jina rejsikapuwanku. Mayta agradecekuni yanapawasqankumanta.
Jehovapaj astawan llankʼanayrayku mana casarakorqanichu, nitaj wawasniyojchu karqani (1 Cor. 7:34, 35). Kay pachapi mana tukuy imatachu ruwayta atisqanchejrayku, Diosta tukuy almaywan sirviyta ajllarqani. Ashkha runasta yanaparqani Jehovata rejsinankupaj, paykunaqa wawasniy jina kanku. Paraisopitaj tukuy gustawasqan imasta ruwasaj. Salmo 145:16 nisqantaj mayta gustawan, imaraykuchus chaypi Jehová ‘tukuy kausajkunata sajsachinanta’ nin.
Precursora jina llankʼayqa sipaspis kashayman jina yuyanaypaj yanapawan
Precursorallapuni kani 91 watayojña kaspapis. Precursora kayqa kusisqa kanaypaj, uj sipas jina sientekunaypaj ima yanapawan. El Salvadorman chayasharqani chay wataspi chay lugarpi runasman willayta qallarikusharqa. Kunantaj chay suyupi Satanás willayta sayachinanpaj tukuy imata ruwajtinpis, 39.000 willajkunaña kanku. Chaytaj creeyniyta mayta kallpachan. Chayraykutaj niyman, Jehová llajtanwan kashasqanta.
a Anuario de los testigos de Jehová para 1981 nisqapi, 45, 46 paginasta leey.
b Anuario para 1981 nisqapi 41, 42 paginasta leey.
c Anuario para 1981 nisqapi 66, 67, 74, 75 paginasta leey.