Leejkunaj Tapuyninku

¿Allillanchu kanman cristianos pistolayoj chayri escopetayoj kananku runasmanta jarkʼakunankupaj?

Cristianosqa imallamantapis jarkʼakuyta atinkuman. Jarkʼakunankupaj imallatapis ruwajtinkoqa Bibliaj nisqanman jina kanan tiyan. Bibliaj nisqantaj reparachiwanchej waj runamanta jarkʼakunapaj, pistolata chayri escopetata apaykachayqa mana allinchu kasqanta. Imaraykuchus mana allinchu kasqanta qhawarina.

Jehovaqa kausayta may valorniyojpaj qhawan, astawanraj runaj kausaynintaqa. Davidqa Jehovaman nerqa: “Qampi kawsay yaku juturi kashan”, nispa (Sal. 36:9). Chayrayku uj cristiano jarkʼakuyta munaspa chayri kapuyninta jarkʼayta munaspaqa, allinta qhawarikunan tiyan ama pitapis wañuchinanpaj (Deu. 22:8; Sal. 51:14).

Mana allinta qhawarikuspaqa imallawanpis uj runata wañurpachisunman. Pistolawan chayri escopetawanrí chay rato pillatapis wañurpachisunman.a Uj suwa pistolayojta rikowajtinchej ichá manchariymanta wañurpachiwasunman chayri noqanchej wañurpachisunman.

Jesús niraj wañushajtin, uj chʼisi ñaupajta yachachisqasninman nerqa uj espadata apakunankuta, chaytaj mana jarkʼakunankupajchu karqa (Luc. 22:36, 38). Manaqa chaywan yachachiyta munasharqa, ashkha runas kʼaspiswan, espadaswan wañuchiyta munajtinkupis, mana maqanakunankuta (Luc. 22:52). Uj kuti Pedroqa espadanwan kuraj kaj sacerdotej kamachinpa ninrinta mururparerqa. Jesustaj Pedrota nerqa: “Espadaykita waqaychay”, nispa. Chantá kayta nerqa: “Espadata oqharejkunaqa, espadallawantaj wañuchisqa kanqanku”, nispa. Chay nisqantataj cristianosqa kasukunchej (Mat. 26:51, 52).

Miqueas 4:3 nin jina, Diospa kamachisnenqa ‘espadasninkuta rejasman tukuchinku, tʼojsina lanzasninkutapis hocesman tukuchinku’. Cristianosqa tukuywan allinta kausakuyta maskʼanchej. Apóstol Pabloj yuyaychasqantataj kasukunchej. Pay nerqa: “Ama pimanpis sajramanta sajrallawantaj kutichiychejchu”, nispa. Chantá nillarqataj: “Tukuy atisqaykichejta ruwaychej, tukuywan allinpi kausakunaykichejpaj”, nispa (Rom. 12:17, 18). Pabloqa ashkha llakiykunapi rikukorqa, “suwaspis casi” wañurpacherqanku (2 Cor. 11:26). Jinapis mana Bibliaj nisqanta pʼakerqachu suwasmanta jarkʼakunanrayku. Astawanqa Jehovapi atienekorqa, Palabranman jinataj ruwarqa. Chaytaj “maqanakupaj armasmanta nisqaqa” aswan allin (Ecl. 9:18).

Cristianospajqa kapuyninchejmanta nisqaqa kausayninchej aswan valorniyoj. Kausayninchejqa mana kapuyninchejmantachu kashan (Luc. 12:15). Uj runa pistolawan suwashawajtinchej, kʼachamanta parlapayana. Mana ripojtintajrí, allin yuyaywan imatapis ruwana, Jesuspa nisqantataj kasukuna. Pay nerqa: “Ama sajra runawanqa churanakuychejchu”, nispa. Arí, imallanchejtapis munajtin apakapunanta saqena (Mat. 5:39, 40; Luc. 6:29).b Chantá mayllapipis kashaspa allinta qhawarikuna. Amataj runaykachanachu valorniyoj imasninchejmanta (1 Juan 2:16). Chantapis vecinosninchejwan Jehovaj testigosninta jina rejsichikuna, rikuchinataj tukuywan allinta kausakuyta munasqanchejta (Pro. 18:10).

Cristianosqa wajkunaj concienciankuta respetanchej (Rom. 14:21). Suwasmanta jarkʼakunapaj pistola chayri escopeta kapuwasqanchejta hermanos yachankuman chayqa, wakinta pantachisunman, wakintataj phiñachisunman. Gobiernoj leyesninman jina pistolata apaykachayta atejtinchejpis, hermanosninchejta munakusqanchejrayku paykunaj allinninkuta maskʼasunchej (1 Cor. 10:32, 33; 13:4, 5).

Cristianosqa Bibliaj nisqanman jina kausakunapaj kallpachakunchej (2 Cor. 4:2; 1 Ped. 5:2, 3). Uj cristianoqa, ancianos yuyaychajtinkupis sajra runasmanta jarkʼakunanpaj pistolata apaykachallanpuni chayqa, congregacionpi manaña allinpajchu qhawasqa kanqa. Chayrayku wakin ruwanastapis manaña japʼenqachu. Ajinallataj kanqa pi hermanollapis trabajonrayku pistolata apaykachajtenqa. Ajinapi rikukuspa aswan allin kanman waj trabajota maskʼakunan.c

Yachakunchej jina sapa cristiano ajllananchej tiyan imaynatachus suwasmanta jarkʼakunanchejta chayri imaynatachus familianchejta, kapuyninchejta ima jarkʼananchejta. Chantapis imapichus trabajanata ajllanallataj tiyan. Chaykunata ajllashajtinchejtaj Bibliaj yuyaychaykunasninpi tʼukurina tiyan. Bibliaj yuyaychaykunasnenqa allin yuyaywan ruwanapaj yanapawanchej, Dios munakuwasqanchejtataj reparachiwanchej. Jesús jina yuyaj cristianosqa, Bibliaj nisqanta kasukunku, chayrayku suwasmanta jarkʼakunankupaj mana pistolata apaykachankuchu. Paykunaqa yachanku Jehovapi atienekojtinku, Bibliaj yuyaychasqanman jinataj kausakojtinku allin kausayta japʼinankuta (Sal. 97:10; Pro. 1:33; 2:6, 7).