Leejkunaj tapuyninku
¿Imajtintaj autoridades allinta ruwajkuna nisqa karqanku?
Jesusqa wañuchisqa kananpaj uj chʼisillaña faltashajtin, apostolesninman nerqa ama jatunchachikunankuta, nitaj kurajpaj qhawasqa kayta maskʼanankuta. Chayrayku Jesús nerqa: “Kay jallpʼapi reyesqa, munayninkuman jina runasta kamachinku, autoridadespis allinta ruwajkuna nisqa kanku. Qankunatajrí mana ajinachu kanaykichej tiyan”, nispa (Luc. 22:25, 26).
Unay tiemponmanta monedas, qhelqasqas imaqa, rikuchin griegoswan romanoswan wakin autoridadesta, waj runastawan evérgetes nispa jatunchasqankuta. Evérgetes palabraqa allinta ruwajkuna niyta munan. Wakin runasta allinta ruwajkuna nispa nej kanku llajtanrayku imallatapis ruwasqanmanta.
Ashkha autoridades allinta ruwajkuna nisqa karqanku. Paykunamanta wakintaj kaykuna karqanku: Egiptomanta rey Tolomeo III Evérgetes (247-222 q., J.n.j.), Tolomeo VIII Evérgetes II (147-117 q., J.n.j.), Romamanta kamachej Julio César (48-44 J.n.j.), kamachej Augusto (31 J.n.j.-14 J.j.), Judeamanta Jatun kamachej Herodes ima. Jatun kamachej Herodesqa allinta ruwaj nisqa karqa waj lugarmanta suyunpaj trigota apachimusqanrayku, wajchasmantaj ropata qosqanrayku.
Uj kutipi Bibliasta estudiaj runa jinata nerqa: “Unay tiempopi may chhika runasqa allinta ruwajkuna nisqa karqanku. Chayrayku chay tiempomanta maukʼa cosaspi allinta ruwajkuna nisqata uj ratollapi pachajta jina tarisunman”, nispa.
Jesusqa apostolesninman nerqa, ama allinta ruwajkuna nichikoj autoridades jina kanankuta. Imaraykuchus chay autoridadesqa wajkunawan allinpaj qhawachikuyta munaspalla imatapis ruwaj kanku.
Jesuspa tiemponpi qhapaj runasqa qolqeta churaj kanku deportes, fiestas, parques, templos, waj imaspiwan ruwakunanpaj. Chaytataj ruwaj kanku wajkunawan jatunchachikunankurayku, allinta ruwajkuna nisqa kanankurayku chayri eleccionespi gananankurayku. Chaymanta parlaspa uj libro nin: “Ashkha runasqa allinninkuta maskʼaspalla wajkunata yanapaj kanku chayri qolqeta qoj kanku”, nispa. Chayrayku Jesusqa apostolesninman nerqa ama chay runas jina kanankuta.
Apóstol Pablopis tiemponman Corintomanta cristianosman jinata nerqa: “Sapa uj sonqonpi yuyasqanman jina churachun, mana llakikuspa, nitaj kamachisqa jinachu. Imaraykuchus Diosqa kusiywan qojta munakun”, nispa (2 Cor. 9:7).