Leejkunaj tapuyninku

Jesús Belenpi nacekusqantawan, ¿imajtintaj Josewan Mariawan mana llajtanku Nazaretman kutiporqankuchu?

Bibliaqa mana ninchu imajtinchus Nazaretman mana kutipusqankuta. Jinapis wakin imasta willan, ichapis chayrayku mana kutiporqankuchu.

Uj ángel Mariaman onqoj rikhurinanta nejtin, Mariawan Josewanqa Nazaretpi tiyakusharqanku, chay llajtaqa Galileapi kasharqa (Luc. 1:26-31; 2:4). Tiemponmantaj, Egiptomanta llojsejtinku Nazaretman kutinporqanku. Jesusqa chaypi wiñakusqanrayku nazareno nisqa karqa (Mat. 2:19-23). Chayrayku Nazaretmanta parlaspaqa Josepi, Mariapi, Jesuspi imapuni yuyanchej.

Kaypi piensarina: Mariapaj Judeaqa rejsisqan jallpʼaña karqa. ¿Imajtín chayta ninchej? Imajtinchus chaypeqa familian kallarqataj. Elisabetpis chaypi tiyakorqa, payqa sacerdote Zacariaspa warmin karqa, Juan Bautistaj mamantaj (Luc. 1:5, 9, 13, 36). Mariaqa Elisabetta visitaj rerqa, paywantaj kinsa killata jina qhepakorqa, chantataj Nazaretman kutiporqa (Luc. 1:39, 40, 56).

Tiempowanqa uj ley llojserqa tukuy runas “qhelqachikunankupaj”. Chay leyta kasukunankupajtaj, Joseqa Nazaretmanta Belenman viajarqa, chaytaj sutikoj “Davidpa llajtan”. Unaymantañataj nikorqa Mesías chaypi nacekunanta (Luc. 2:3, 4; 1 Sam. 17:15; 20:6; Miq. 5:2). Jesustaj chaypipuni nacekorqa. Joseqa Mariata mana mañanmanchu karqa chay chhika karuta Nazaretman kutipunankuta, imajtinchus uña wawitallayojraj kasharqa. Paykunaqa Belenpi qhepakorqanku. Chaytaj Jerusalén qayllitallapi kasharqa, 9 kilometrospi jinalla. Chaytaj may sumajpuni paykunapaj karqa. Ajinamanta wawitankuwan temploman riyta atillarqanku, Ley nisqanman jina ofrendata jaywanankupaj (Lev. 12:2, 6-8; Luc. 2:22-24).

Chantapis Diospa angelnenqa Mariata nisqaña chay wawanqa “Davidpa kamachina tiyananta” japʼinanta, Reytaj kananta. Ichapis Josewan Mariawanqa piensarerqanku Jesusqa Davidpa llajtanpi nacekunan kasqanta (Luc. 1:32, 33; 2:11, 17). Ichapis yuyarqanku Belenpi qhepakunanku allin kasqanta, imatachus Dios ruwanankuta munasqanta nimunankama.

Paykunaqa unaytasina Belenpi tiyakorqanku. Chʼaskasta qhawaj yatiris paykunata visitashajtinku mana yachakunchu mashkha unaytañachus chaypi tiyakushasqankuta. Jinapis chaypacha Jesusqa manaña uña wawitachu karqa, jatitunña karqa. Chantapis paykunaqa wasiyojña karqanku (Mat. 2:11). Chayrayku Nazaretman kutipunankumantaqa, unaysitutasina Belenpi qhepakorqanku.

Herodesqa ‘Belén llajtapipis tukuynin qhari wawasta wañuchicherqa iskay watayojmanta uraman’ (Mat. 2:16). Uj ángel chayta Joseman willajtintaj, Josewan Mariawanqa Egiptoman ayqekorqanku Jesuswan. Chaypitaj tiyakorqanku Herodes wañupunankama. Chaymantataj Joseqa familianta Nazaretman pusakaporqa. Chanta, ¿imajtintaj mana Belenman kuterqankuchu? Imajtinchus Herodespa wawan Arquelaoñataj Judeapi gobernasharqa. Paytaj manchay sajra karqa. Chantapis uj ángel Joseman nerqa familianta pusakapunanta. Nazaretpi Jesustaqa ni pi imanayta atinmanchu karqa, Jehová munasqanman jinataj uywayta atinkuman karqa (Mat. 2:19-22; 13:55; Luc. 2:39, 52).

Jesuspa wañuynenqa runas cieloman ripunankupaj punkuta kicharerqa. Josetaj niraj Jesús wañupushajtinsina wañuporqa. Ajina karqa chayqa Joseqa kay jallpʼapi kausarimonqa. Tukuytaj payta rejsiyta atisunchej, tapurisuntaj imaraykupunichus Belenpi qhepakusqankuta Jesús nacekusqantawan.