Amaña suyaychu, bautizakullayña

1. ¿Imaraykutaj bautizakuy may allin?

¿JEHOVATA munakunkichu? Payqa tukuy laya allin imasta qosunki, kausaytapis. ¿Munakusqaykita reparananta munawajchu? Kausayniykita payman qopuspa bautizakojtiyki sutʼita reparanqa munakusqaykita. Chayta ruwajtiyki Jehovaj familianmanta kanki. Paypata kanki, paytaj Tatayki jina, amigoyki jina yuyaychasonqa, cuidasonqataj (Sal. 73:24; Isa. 43:1, 2). Chantapis kausayniykita Jehovaman qopusqaykirayku, bautizakusqaykirayku wiñay kausayta suyakuyta atinki (1 Ped. 3:21).

2. ¿Imatá kay yachaqanapi yachakusun?

² ¿Imachu jarkʼashasunki bautizakunaykipaj? Ama llakikuychu, mana qanllachu ajinapi rikukunki. May chhika runasña bautizakunankupaj kausayninkuta, yuyayninkutapis cambianku, kunantaj kusisqas, sonqo kʼajaywan Jehovata sirvishanku. Kay yachaqanapi parlarisun apostolespa tiemponkupi wakin bautizakoj runasmanta. Yachakusun imachus paykunata jarkʼasqanta, imatajchus yanapasqanta chay jarkʼaykunata atipanankupaj. Joven kajtiykipis, machuña kajtiykipis, reparariy imatachus paykunamanta yachakuyta atisqaykita.

SAMARITANOS BAUTIZAKUNKU

3. ¿Imatataj wakin samaritanos ruwananku karqa bautizakunankupaj?

³ Jesuspa tiemponpi samaritanosqa uj grupo religionmanta karqanku. Chay religionmanta kajkunaqa Sichem llajtaj muyuyninpi, Samaria llajtaj muyuyninpiwan tiyakorqanku, Judeaj norte ladonpi. Samaritanosqa bautizakunankupaj Diospa Palabranta aswan sumajta rejsinanku karqa. Paykunaqa yuyaj kanku phishqa libroslla: Genesismanta, Deuteronomiokamalla, chantá ichapis Josué libropiwan Diosmanta jamusqanta. Chaywanpis yacharqanku imatachus Dios ruwasaj nisqanta, Deuteronomio 18:18, 19 versículos nisqanman jina. Chayrayku Mesías jamunanta suyasharqanku (Juan 4:25). Bautizakunankupajqa creenanku karqa Jesusqa Mesiaspuni kasqanta. ‘Ashkha samaritanostaj’ chayta ruwarqanku (Juan 4:39). Wakin samaritanosqa ichapis cambiananku karqa judiosta manaña chejnikunankupaj (Luc. 9:52-54).

4. Hechos 8:5, 6, 14 nisqanman jina, ¿imatataj wakin samaritanos ruwarqanku Felipej willasqanta uyarispa?

⁴ ¿Imataj samaritanosta yanaparqa bautizakunankupaj? Sumaj willaykunata willaj Felipe paykunaman “Cristomanta” willajtin, wakenqa “Diospa palabranta” japʼikorqanku (Hechos 8:5, 6, 14 leey). Felipe judío kajtinpis, samaritanosqa uyarillarqanku. Ichapis yuyarikorqanku Dios tukuyta uj rejllata qhawasqanmanta parlaj versiculosta (Deu. 10:17-19). Imayna kajtinpis imatachus Felipe Cristomanta nisqanta “sumajta uyarerqanku”, repararqankutaj Dios kachamusqanta. Chantapis rikorqanku Felipe ashkha milagrosta ruwasqanta, onqosqasta sanoyachisqanta, supaykunatapis runasmanta qharqosqanta (Hech. 8:7).

5. ¿Imatá samaritanosmanta yachakunki?

⁵ Chay samaritanosqa Felipeta mana uyarillankumanchu karqa judío kasqanrayku chayri mosoj imasta yachachisqanrayku. Jinapis mana chaytachu ruwarqanku. Paykunaqa Felipe cheqa kajllata yachachishasqanta reparaytawankama bautizakorqanku. Biblia nin: “Diospa Gobiernonmanta, Jesucristoj sutinmantawan sumaj willaykunata Felipe willajtin, ashkha qharis, ashkha warmis ima payta creespa bautizakorqanku” (Hech. 8:12). Qanrí, ¿reparankichu Diospa Palabran cheqapuni kasqanta? ¿Reparankichu Jehovaj testigosnin Jesús cheqa discipulosninmanta nisqanman jinapuni munanakunankupaj kallpachakusqankuta, tukuytataj uj rejllata qhawasqankuta? (Juan 13:35). Jina kajtenqa bautizakullayña, amaña suyaychu. Jehovataj bendecisonqapuni.

6. ¿Imatá Rubenmanta yachakuwaj?

⁶ Rubenmanta parlarina. Payqa Alemaniamanta, testigo familiapitaj uywakorqa. Chaywanpis jovenyaspa, Dios kasqanmanta iskayrayarqa. ¿Imataj yanaparqa manaña iskayrayananpaj? Ashkha imastaraj yachakunan kasqanta reparakuspa estudiaj churakorqa. Pay nin: “Sapallaypi Bibliata estudiarqani allinta yachanaypaj, niñataj iskayrayanaypaj. Evolucionmanta kutin kutita estudiarqani”, nispa. Rubenqa ¿Existe un Creador que se interese por nosotros? nisqa librota leererqa, chaywantaj creeynin astawan sinchʼiyarqa. Chayrayku nikusqa: “Jehová kasqapuni, qhasillata iskayrayashani”, nispa. Chantapis Rubenqa centralninchejta visitarqa, mundontinpi Diospa kamachisnin sumaj ujchasqa kashasqankuta rikuspataj mayta tʼukorqa. Alemaniaman kutispataj 17 watasniyoj bautizakorqa. Qanpis Bibliamanta yachakusqaykimanta iskayrayashanki chayqa, publicacionesninchejta astawan ukhunchariy. Bibliata ‘sumajta rejsispaqa’ manaña iskayrayankichu (Efe. 4:13, 14). Chantapis Jehovaj llajtan mundo enteropi munanakusqankuta, ujchasqataj kashasqankuta rikuspa, congregacionniykipis ajinallataj kasqanta rikuspa, mundontinmanta hermanosta astawan munakunki.

TARSO LLAJTAYOJ SAULO BAUTIZAKUN

7. ¿Ima yuyasqantataj Saulo cambianan karqa?

⁷ Tarso llajtayoj Saulomanta parlarina. Payqa judiospa religionninkupi sumajta ñauparisharqa, aswan rejsisqamantaj tukusharqa (Gál. 1:13, 14; Fili. 3:5). Chay tiempopi ashkha judíos yuyaj kanku cristianosqa Diospa contranta oqharikusqankuta. Chayrayku Sauloqa cristianosta mana khuyarispa qhatiykacharqa, Diospa munayninta ruwashasqanta yuyaspa. Ajinata yuyaspataj mayta pantasharqa (Hech. 8:3; 9:1, 2; 26:9-11). Chayrayku sichus Jesuspi creenman karqa, cristiano jinataj bautizakunman karqa chayqa, paypis qhatiykachasqallataj kanman karqa.

8. 1) ¿Imataj Saulota yanaparqa bautizakunanpaj? 2) Hechos 22:12-16 nisqanman jina, ¿imaynatá Ananías Saulota yanaparqa? (Dibujotawan qhawariy).

⁸ ¿Imataj Saulota yanaparqa bautizakunanpaj? Jesús cielomantapacha parlamojtin uj kʼanchay Saulota ciegoyacherqa (Hech. 9:3-9). Kinsa día juntʼata ni imata mikhorqachu, tʼukurisharqatajchá imachus pasasqanpi. Payqa sutʼita repararqa Jesús Mesiaspuni kasqanta, cristianostaj cheqa religión kasqankuta. Chantapis maytachá sonqon juchacharqa Estebanta wañuchisqankuta allillanpaj qhawasqanmanta (Hech. 22:20). Chay kinsa día pasaytataj Ananías Saulota waturikoj rerqa. Payqa kʼachamanta parlaparerqa, ñawisninta watejmanta qhawaricherqa, bautizakunanpajtaj amaña suyananta nerqa (Hechos 22:12-16 leey). Sauloqa kʼumuykukoj sonqowan Ananiaswan yanapachikorqa, bautizakorqataj (Hech. 9:17, 18).

9. ¿Imatá Saulomanta yachakunki?

⁹ Sauloj kausayninmanta ashkha imasta yachakusunman. Payqa jatunchakunman karqa, manchikunmantaj karqa bautizakuyta. Jinapis mana ajinachu karqa. Cristomanta cheqan kajta yachakuytawan, kʼumuykukoj sonqowan kausayninta cambiarqa (Hech. 26:14, 19). Qhatiykachasqa kananta yachaspapis cristianoman tukorqa (Hech. 9:15, 16; 20:22, 23). Bautizakusqantawan Jehovapi atienekullarqapuni, tukuy laya pruebasta aguantananpaj yanapananta yachaspa (2 Cor. 4:7-10). Qanpis Jehovaj testigon jina bautizakojtiyki, ichapis pruebaspi rikukunki chayri ichapis churanakusonqanku. Pero mana sapaykichu kanki. Jehovawan Jesuswan yanapasonqankupuni (Fili. 4:13).

10. Annaj kausaynin, ¿imaynatá yanapasunki?

¹⁰ Europa del Estepi tiyakoj Annamanta parlarina. Payqa kurda familiapi uywakorqa. Maman bautizakusqantawan Annaqa tatanpa permisonwan Bibliata estudiayta qallarerqa, 9 watayoj kashaspa. Familianqa tukuy parientesninkuwan uj wasillapi tiyakorqanku. Chayrayku chay parientesnenqa Jehovaj testigosninwan Bibliata estudiashasqanta yachaspa, Annaj contranpi churakorqanku. Paykunaqa yuyarqanku ñaupa tatasninkoj religionninmanta llojsipojtin familiankupaj pʼenqay kananta. 12 watasniyoj kashajtin Annaqa tatanta nerqa bautizakuyta munasqanta. Tatantaj taporqa payllamantachus bautizakuyta munashasqanta chayri pichus obligashasqanta. Annataj kuticherqa: “Jehovata munakuni”, nispa. Chayrayku tatanqa saqellarqa bautizakunanta. Bautizakusqantawan familiaresnenqa Annamanta burlakullarqankupuni, tukuy imatataj nej kanku. Ujnin familiarnin nisqa: “Jehovaj testigon kanaykimantaqa tukuywan puriykojtiyki, cigarrotapis pitajtiyki aswan allin risunkiman”, nispa. ¿Imataj Annata yanaparqa chayta aguantananpaj? Pay nin: “Jehová kallpata qowarqa. Mamaypis papasuypis mayta yanapawarqanku”, nispa. Annaqa uj listata ruwakusqa ima kutispichus Jehová yanapasqanmanta, chaytataj qhawaykurinpuni mana qonqakunanpaj. Sichus qanpis churanakusunankuta chayri qhatiykachasunankuta manchikushanki chayqa, yuyarikuy Jehovaqa qantapis yanapasunallantataj (Heb. 13:6).

CORNELIO BAUTIZAKUN

11. ¿Imataj Corneliota jarkʼanman karqa bautizakunanpaj?

¹¹ Corneliomantañataj parlarina. Payqa uj “centurión” karqa, nisunman Romamanta uj capitán, cargonpeqa 100 soldados jina karqanku (Hech. 10:1, sutʼinchaynin). Chayrayku llajtanpi, ejercitopipis jatunpaj qhawasqachá karqa. Payqa “wajchasta khuyakuspa yanapaj” (Hech. 10:2). Jehovaqa apóstol Pedrota kacharqa sumaj willaykunata payman willananpaj. ¿Imatá Cornelio ruwarqa? ¿Jatunpaj qhawasqa kasqanraykuchu mana bautizakorqa?

12. ¿Imataj Corneliota yanaparqa bautizakunanpaj?

¹² ¿Imataj Corneliota yanaparqa bautizakunanpaj? Biblia nin: “Cornelioqa Diosta manchachikoj, tukuy familianpis”. “Diosmantapis mayta mañakullajpuni”, nispa (Hech. 10:2). Pedro sumaj willaykunata willajtin Corneliowan familianwanqa Cristopi creerqanku, usqhayllatataj bautizakorqanku (Hech. 10:47, 48). Cornelioqa familianwan khuska Jehovata yupaychananpaj imastachus cambianan kasqanta reparakuspa, chay ratochá cambiarqa (Jos. 24:15; Hech. 10:24, 33).

13. ¿Imatá Corneliomanta yachakunki?

¹³ Cornelioqa Saulo jinallataj sumaj cargoyoj kasqanrayku, ichapis mana munanmanchu karqa cristianoman tukuyta, jinapis mana ajinachu karqa. ¿Qanpis bautizakunaykipaj ashkha cambiostarajchu kausayniykipi ruwanayki kashan? Jina kajtenqa Jehová yanapasonqa. Payqa bendecisonqa Bibliaj yuyaychaykunasninman jina kausakunaykipaj kallpachakojtiyki.

14. ¿Imaynatá Tsuyoshij kausaynin yanapasunki?

¹⁴ Tsuyoshimanta parlarina. Payqa Japonmanta, bautizakunanpajtaj trabajonpi wakin imasta manaña ruwananchu karqa. Payqa Ikenobopi tʼikasta wakichiyta yachachej escuelapi trabajaj, directorpa yanapajnintaj karqa. Directorqa uj wañusqata pʼampananku kajtin tʼikasta apaj, budistaspa costumbresninkutataj ruwaysikoj. Director mana riyta atejtintaj Tsuyoshi cuentanmanta rej chay imasta ruwananpaj. Bibliapi wañusqasmanta yachakuytawantaj, reparakorqa chay imasta siga ruwajtillanpuni mana bautizakuyta atinanta, chayrayku niña chayta ruwarqachu (2 Cor. 6:15, 16). Directorman chayta sutʼinchajtintaj mana trabajonmanta wijchʼorqachu, manaña chay costumbresta ruwajtinpis. Tsuyoshiqa Bibliata estudiayta qallarisqanmanta watanman jina bautizakorqa.a Sichus qanpis Diosta kusichinaykipaj trabajoykipi wakin imasta manaña ruwanaykichu kanqa chayqa, ama kayta qonqaychu: Diosqa tukuy ima necesitasqaykichejta qosonqachej qanman, familiaykimanpis, ni imata faltachisonqachejchu (Sal. 127:2; Mat. 6:33).

CORINTIOS BAUTIZAKUNKU

15. ¿Imastaj corintiosta jarkʼanman karqa mana bautizakunankupaj?

¹⁵ Ñaupa tiempopi Corinto llajtapi tiyakojkunaqa qolqemanta wañusqas karqanku, khuchichakojtaj kanku. Ashkhasqa Jehovaj chejnisqan imasta ruwaj kanku. Chayrayku chaypi tiyakojkunaqa mana Jehovata sirviyta atinankupaj jinachu karqanku. Chaywanpis apóstol Pablo chay llajtaman chayaspa Cristomanta sumaj willaykunata willajtin, “ashkhas creeyta qallarerqanku, bautizakorqankutaj” (Hech. 18:7-11). Señorninchej Jesucristotaj Pabloman mosqoypi jina rikhurispa nerqa: “Kay llajtapeqa ashkha runasraj noqapi creenqanku”, nispa. Chayrayku Pabloqa chay llajtapi uj wata khuskanniyojta predicarqa.

16. ¿Imataj corintiosta yanaparqa bautizakunankupaj? (2 Corintios 10:4, 5).

¹⁶ ¿Imataj corintiosta yanaparqa bautizakunankupaj? (2 Corintios 10:4, 5 leey). Diosqa Palabrannejta, espíritu santonnejta paykunata yanaparqa kausayninkuta cambiasqata cambianankupaj (Heb. 4:12). Sumaj willaykunata japʼikoj corintiosqa machaykuyta, suwakuyta, qharipura puñuykuytapis saqeporqanku (1 Cor. 6:9-11).b

17. ¿Imatá corintiosmanta yachakunki?

¹⁷ Wakin corintiosqa bautizakunankupaj ashkha imasta kausayninkupi cambiananku karqa, nitaj yuyarqankuchu mana cambiayta atinankuta. Tukuy atisqankuta ruwarqanku wiñay kausayman pusaj kʼullku ñanta purinankupaj (Mat. 7:13, 14). ¿Qanpis kallpachakushankichu uj viciota chayri mana allin ruwaykunata qonqanaykipaj? Kallpachakullaypuni. Jehovamanta espíritu santonta mañakuy mana chay imaspi urmanaykipaj.

18. ¿Imaynatá Monikaj kausaynin yanapasunki?

¹⁸ Monikaqa Georgia suyupi tiyakun. Payqa sipasllaraj kashaspa mayta kallpachakorqa mana sajra imaswan kusirikunanpaj, nitaj millay imasta parlananpaj. Ajinamanta bautizakuyta atinanpaj. Pay nin: “Diosmanta mañakuspa kallpata japʼerqani. Jehová yacharqa allin kajta ruwayta munasqayta. Payqa yanapawajpuni, yuyaychawajpunitaj”, nispa. Monikaqa 16 watasniyoj kashajtin bautizakorqa. Qanrí, ¿kallpachakunallaykitajchu tiyan wakin mana allin imasta qonqanaykipaj, ajinamanta Jehovata kusichinaykipaj, sirvinaykipajpis? Espíritu santonta mañakullaypuni cambiayta atinaykipaj, paytaj mana michʼakuspa qosonqa (Juan 3:34).

CREEYNIYKEQA ORQOSTA ITHIRICHINMAN

19. ¿Imataj yanapasunkiman orqosman rijchʼakoj jarkʼaykunata atipanaykipaj? (Fototawan qhawariy).

¹⁹ Bautizakunaykipaj ima jarkʼaykunata atipanayki kajtinpis, amapuni iskayrayaychu Jehová munakususqanmanta, familianmanta kanaykitataj munasqanmanta. Jesusqa ashkha discipulosninta nerqa: “Creesqaykichejchus mostaza mujitu chhikitallanpis kanman chayqa, kay orqota niwajchej ‘jaqayman ithiriy’ nispa, ithirinmantaj. Mana imapis qankunapaj kanmanchu mana atikojqa”, nispa (Mat. 17:20). Chay discipulosqa pisi watasllataraj Jesuswan kasharqanku, chayrayku creeyninkoqa wiñananraj karqa. Chaywanpis Jesús paykunata nerqa sinchʼi creeyniyoj kajtinku, Jehová yanapananta orqosman rijchʼakoj jarkʼaykunatapis atipanankupaj. Qantapis Jehová yanapallasonqataj.

20. Kay yachaqanapi parlarisqanchej cristianospa kausayninku, ¿imaynatá qanta yanapasunki?

²⁰ Bautizakunaykipaj ima jarkʼaytapis atipanaykiraj kasqanta reparaspaqa, ama suyaspalla usqhayllata chayta ruway. Yachakunchej jina, apostolespa tiemponkumanta, kay tiemponchejmantapis cristianospa kausayninku kallpata qosunkiman, sonqochasunkimantaj. Paykunaj kausayninkupi tʼukureyqa kallpachasonqa, sonqoykitataj aysanqa Jehovaman kausayniykita qopunaykipaj, bautizakunaykipaj ima. Chaytaj imata ruwasqaykimantapis aswan sumajpuni.