Génesis
Adán y Eva Tayta Diosta mana cäsukushqan
3 Tayta Dios kamashqan uywakunapitapis mas astütumi karqan culebraqa.* Tsaymi warmi kaykashqan kaqman witiykur kayno nirqan: “¿Rasunpaku qamkunata Dios nishushqanki mayqan yörapa wayuynintapis mana mikupäkunaykipaq?”
2 Tsayno tapuptin warmi kayno nirqan: “Lapan yörapa wayuyninta mikunäpaqmi nipäkamashqa. 3 Huerta chawpincho kaykaq yörapa wayuyninpaqmi itsanqa mana mikupäkunäpaq ni yataylapis mana yatapäkunäpaq nipäkamashqa. Tsay yörapa wayuyninta mikurqa wanupäkushaqshi”.
4 Tsayno niptinmi culebra kayno nirqan: “Manami wanupäkunkipaqtsu. 5 Tsay yörapa wayuyninta mikunayki junaqqa Diosnömi tantiyapäkunkipaq ali kashqanta y mana ali kashqantapis. Tsaymi mikunaykita Dios mana munantsu”.
6 Tsayno niptinmi tsay yörapa wayuynin maypis mikurkuypaq kashqanta rikar pasaypa munaparqan. Tsaymi yachaq y musyaq kayta munar yörapa wayuyninta palarkur mikurqan. Nirkurnami runanman apapaptin paypis mikurqan. 7 Tsawraqa jinan hörami tantiyapäkurqan qarapächula karkaykashqanta. Tsaymi hïgus yörapa rapranta jirarkur penqayninta tsapakärirqan.
8 Tsay tardi inti jeqaykaptinnami huertacho TAYTA DIOS puriykarqan. Tsayta mayarmi ishkan pakakärirqan yörakuna rurinman. 9 Tsaymi Tayta Dios qayakur kayno nirqan: “Adán, ¿maychötaq kaykanki?”
10 Tsayno qayakuptin Adán kayno nirqan: “Huertacho puriykashqaykita mayarmi qarapächula kashpä penqakur pakakushqä, Tayta”.
11 Tsawraqa Tayta Dios kayno tapurqan: “¿Pitaq nishushqanki qarapächu kashqaykita? Paqta mikushqanki ‘ama mikunkitsu’ nishqä yörapa wayuyninta”.
12 Niptinmi Adán kayno nirqan: “Warmïpaq kamashqayki warmi apapämaptinmi tsay yörapa wayuyninta mikushqä, Tayta”.
13 Tsawraqa warmita Tayta Dios tapurqan: “¿Imatataq rurashqanki?”
Warminami kayno nirqan: “Culebra lulapämar shakyätsimaptinmi mikushqä tsay yörapa wayuyninta”.*
Jutsata rurashqanpita Adán y Eva nakananpaq nishqan
14 Tsawraqa culebrata Tayta Dios kayno nirqan:
“Tsayno lulapashqaykipitami lapan uywakunapitapis maldicionädu kankipaq.
Tsaynöpis pachalaykipami purinkipaq.
Alpata mikularmi kawankipaqpis.*
15 Kananpitaqa warmiwan fiyupami chikinakunkipaq.
Tsaynölami warmipita yuriqpis qampita miraqkunata rikaytapis mana munanqatsu.*
Warmipita yuriqtami talonnincho* picankipaq.
Paynami itsanqa umaykita chamchanqapaq*”.
16 Nirkur Evatana kayno nirqan:
“Tsayno rurashqaykipitami qeshyaq rikakur fiyupa nakankipaq.
Tsaynöpis fiyupa nanaywanraqmi wachakunkipaq.
Runaykitapis munaynikimanmi churayta munankipaq.*
Tsayno kaptinpis paypa munayninchömi imaypis kankipaq”.
17 Nirkurnami Adánta kayno nirqan:
“Mana mikunaykipaq niykaptïpis warmikita cäsukurmi tsay yörapa wayuyninta mikushqanki.
Tsayno mikushqaykipitami chakrakunapis maldicionashqa kanqapaq.
Tsaymi waran waran fiyupa nakarraq arunki mikunaykipaq.
18 Chakrachöpis tukuy casta kashakuna y mana ali jachakunami winamunqapaq.*
Tsayno kaptinpis munti jachakunapa wayuynintanami mikunkipaq.
19 Kawashqaykiyaqqa mikunaykipaq pasaypa südarraqmi arunkipaq.
Alpapita kamashqami kaykanki.
Tsaymi wanushpayki alpaman kutinkipaq”.
20 Tsaypita warminpa jutinta Adán churaparqan Eva* jutin kananpaq. Tsay jutita churaparqan paylapita lapan runakunapis y warmikunapis mirananpaq kaptinmi. 21 Adán y Eva jatikunanpaqnami uywakunapa qaratsanpita röpankunata Tayta Dios ruraparqan.
22 Nirkurnami Tayta Dios kayno nirqan: “Kananqa noqantsino karnami ali kaqta mana ali kaqtapis runa musyan. Tsayno kaptinqa imayyaqpis kawatsikuq yörapa wayuyninta ama mikutsuntsu. Tsayta mikurqa imayyaqpis kawanqapaqmi”.*
23 Tsaymi Edén huertapita TAYTA DIOS runata qarqurqan alpapita kamashqa kar chakracho arur kawananpaq. 24 Runata tsayno qarqurir inti jeqamunan läduman *querubinkunata* Tayta Dios churarqan nina rataykaq espädawan huertata täpananpaq. Tsaymi querubinkunaqa täparqan imayyaqpis kawatsikuq yöraman pipis mana yaykunanpaq.