Ezequiel

19 “Israel runakunapa mandaqnin reykunapaq wanupakuy cantata cantar 2 kayno ninki:*

“ ‘Mamaykiqa leönami karqan.

Payqa leonkunapa chawpinchömi tarqan.*

Tsaychömi wawankunatapis chuchurqan.

 3 Juk wawantami shumaq qeshpitsirqan mantayashqanyaq.

Uywata tsariyta yachakurkurnami tsay leonqa runa mikuyta mäñakurqan.

 4 Tsayta mayaykurmi juk lädu nación runakuna pözuta uchkuykur tsayman jeqashqata tsarirqan.

Nirkurmi cadinarkur Egipto nacionpa apakärirqan.*

5 “ ‘Apashqan wawan kutimunantami maman leöna shuyararqan.

Mana kutimuptinnami jukaq wawantana pasaypa fiyuta ashmarqan.

 6 Tsaypis mantayarnami wakin leonkunawan purirqan.

Uywata tsariyta yachakurnami paypis runa mikuyta mäñakurqan.

 7 Palaciukunatapis juchutsirmi markakunatapis ushakätsirqan.

Mantsakuypaq qaparashpanmi pïmaytapis mantsakätsirqan.

 8 Tsayno kaptinmi nawpan nacionkunapita y provinciakunapita runakuna juntakaykur pözuta uchkupäkurqan.

Tsayman jeqashqatanami redkunawan tsaripäkurqan.

 9 Cadinarkurmi jaulaman wichqapäkurqan.

Nirkurmi Babilonia nacionman apaykur reypa makinman kachaykurqan.

Carcilman wichqaykuptinnami Israel jirkakunacho qaparashqan mana mayakarqannatsu.*

10 “ ‘Israel runakuna, mamaykiqa karqan yaku kashqan chakracho üva plantaraykaqmi.*

Yaku yaykuptin atska rämankuna kaptin alimi wayurqan.

11 Reypa väranpaqnömi rämankunapis fuerti karqan.

Wakin üvakunapitapis mas copösu winaptinmi pïmaypis rikarqan.

12 Tsayno kaykaqtami pasaypa rabyakur lukirirqan.*

Inti jeqamunan kaq lädupita shamuq akaq wayrawanmi lapan wayuyninpis shikwarqan.

Rämankuna tsakiptinmi lapanta rupatsirqan.

13 Kananqa yaku mana kashqan chunyaq tsaki chakrachönami plantaraykan.

14 Rämankunapita nina ratarmi lapan wayuyninta rupar usharqan.*

Reypa väranpaqno rämankuna kashqanpis manami kannatsu’.*

“Kayqa wanupakuy cantami kaykan.

Tsaymi wanupakushqano kay cantata cantapäkunqa”.