2 Reyes
Judá nacioncho Acaz rey kashqan
16 Chunka qanchis wata Israel nacioncho Remalíaspa tsurin Peka rey kaykaptinmi Judá nacioncho Jotampa tsurin Acaz mandayta qalaykurqan. 2 Mandayta qalaykushqan witsan ishkay chunka (20) watayuqmi kaykarqan. Payqa chunka soqta watami Jerusalénpita mandarqan.
Acazqa manami unay aylun Davidnötsu TAYTA DIOS munashqanta rurarqan. 3 Tsaypa trukanqa Israel nación reykunanömi juk dioskunata adorarqan. Tsaymi *Canaáncho taq unay runakunapa mana ali costumbrinkunata rurar sacrificiupaq tsurintapis *altarcho rupatsirqan. Tsaynöpami TAYTA DIOS unay qarqushqan mana Israel runakunano pasaypa jutsata rurarqan.* 4 Tsaynölami markakunacho kaykaq altarkunacho, jirkankunacho y copösu yörakuna sikinchöpis sacrificiukunata rupatsir inciensuwan qoshtatsirqan.
5 Tsay witsanmi Siria nacionpa mandaqnin rey Rezín y Israel nacionpa mandaqnin rey Peka Jerusalénman soldädunkunawan chayarqan Acazta atacananpaq. Ishkan reykuna atacarpis manami vinciyta kamäpakurqantsu.*
6 Tsaynöpis Acaz mandashqan witsanmi Judá runakunata Elat markapita Edom nacionpa mandaqnin rey qarqurqan. Nirkurmi Elat markata shuntarqan Edom nacionpana kananpaq. Tsaypita patsami edomita runakuna kananyaq tsaycho tarkaykan.
7 Siria runakuna y Israel runakuna atacaptinmi rey Acazqa kachakunata kacharqan Asiria nacionpa mandaqnin rey Tiglat-pileserman soldädunkunawan shamur yanapananpaq. Chayaykurmi Tiglat-pileserta kayno nipäkurqan: “Noqaqa qampa ashmaynikinömi y juramentu tsurikinömi kaykä. Siria nacionpa mandaqnin rey y Israel nacionpa mandaqnin reymi conträ sharkur atacarkaykäman. Paykuna mana ushakätsimänanpaq shamur tsapaykalämay, tayta”.
8 Asiria nacionpa mandaqnin reyta pägananpaqmi rey Acazqa TAYTA DIOSPA wayinpita y palaciupitapis qellayta y qorita jorqurir kachakunawan apatsirqan. 9 Acaz apatsishqankunata chaskirkurmi Asiria nacionpa mandaqnin rey soldädunkunawan Siria nacionpa capitalnin Damascuta atacananpaq aywarqan. Damascuman yaykuykurmi rey Rezínta wanutsirqan. Nirkurmi runakunata prësu apapäkurqan Kir markaman tsaychöna tänanpaq.
10 Tsaypitanami rey Acazqa Damascuman aywarqan Asiria nacionpa mandaqnin rey Tiglat-pileserwan tinkunanpaq. Damascuman chayaykurmi rikarqan kuyaylapaq altarta. Tsaytami imano kashqantapis shumaq dibujaykur Urías cüraman apatsirqan. 11 Tsayta chaskirkurmi cüra Uríasqa altarta ruratsirqan rey Acaz apatsishqan dibüjutano. Altarta ruratsiyta usharqan rey Acaz Damascupita manaraq kutiptinmi.
12 Damascupita kutirnami mushuq altar rurashqatana tariykur tsay altarcho sacrificiukunata rupatsirqan. 13 Sacrificiuta rupatsirmi tsaki mikuykunatapis tsay altarcho rupatsirqan y vïnutapis tsay altarman winaparqan. Tsaynölami jawka kawakuy sacrificiukunata rupatsinanpaq uywakunata pishtarkur yawarninta altar jananman tsaqtsuparqan.
14 Tsayno rurarkurmi broncipita rurashqa unay kaq altarta* wititsirqan TAYTA DIOSPA templun nawpancho kaykashqanpita mushuq kaq altarpa norti kaq lädunman. 15 Nirkurmi cüra Uríasta rey Acaz kayno nirqan: “Tutapa rupatsishqayki sacrificiuta y tardipa rupatsishqayki tsaki mikuykunata jatun kaq mushuq altarchöna rupatsinki. Tsaynöpis tsay altarchöna rupatsinki noqa apamushqä sacrificiuta y tsaki mikuykunata. Tsaynöla runakuna apamushqan sacrificiukunata y tsaki mikuykunatapis tsaychöna rupatsinki. Vïnuta apamuptinpis tsay altarmanna winapanki. Sacrificiukunata rupatsinaykipaq uywakunata pishtar shuntashqayki yawarta tsay altarmanna tsaqtsupanki. Bronci altarqa Tayta Diosta tapukunaläpaqmi kanqa”.
16 Cüra Urías lapanta rurarqan rey Acaz nishqannölami.
17 Nirkurnami rey Acazqa templupa carrëtankunacho kaykaq lavatoriunkunata y carrëtacho clävaraykaq tablakunatapis jorqutsirqan. Tsaynöpis broncipita rurashqa törukuna janancho* kaykaq lamar nishqan lavatoriuta jorqurkatsir rumikuna jananmanna jamatsirqan. 18 Tsaynöpis Asiria nacionpa mandaqnin reypa gustunta rurarmi jamay junaqcho TAYTA DIOSTA adorananpaq armashqan tabladïlluta jorqutsirqan. Tsay tabladïlluqa templu patiuchömi karqan. Tsaynölami jorqutsirqan templu patiuman reykunala yaykukunan punkutapis.
19 Rey Acaz imata rurashqanpis lapanmi qelqaraykan Judá nacionpa mandaqnin reykunapa acta libruncho. 20 Wanuykuptinmi* *Davidpa Markancho unay aylunkuna pamparaykashqan kaqman pampapäkurqan. Acazpa trukannami tsurin Ezequías rey karqan.