Daniel
Jerusalénpaq Tayta Diosta Daniel manakushqan
9 Media nacionpita kaq Asuerupa tsurin Darío Babilonia* nacionpa mandaqnin rey juk watana kaykaptinmi 2 noqa Daniel liyiykarqä TAYTA DIOSPA wilakuyninta profëta Jeremías qelqashqanta.* Tsayta liyirmi tantiyashqä qanchis chunka (70) watayaq Jerusalén marka raqäla kananpaq kashqanta. 3 Tsawraqa qachqa röpata jatikurkur y uchpaman jamaykur ayunashpä Tayta Diosta manakurqä. 4 Manakurmi kayno nirqä:
“Tayta Dios, lapanpaq munayniyuq y mantsakuypaqmi kanki. Kuyashushpayki mandamientuykikunata cumpliqkunapaqqa *pactu rurashqaykita imaypis cumplinkimi. 5 Noqakunaqa jutsata rurarmi mana alikunata rurapäkushqä. Mana wiyakuqmi kapäkushqä. Mandamientuykikunata y leynikikunata manami cäsukärishqätsu. 6 Reykunata, autoridäkunata, unay aylükunata y lapan runakunatapis sirvishuqniki profëtakuna qampa jutikicho wilakuynikita yachatsiptinpis manami cäsukärishqätsu.
7 “Tayta Dios, imaypis alilatami ruranki. Noqakunami itsanqa lutankunata rurar pasaypa penqakuypaq karkaykä. Lapanïmi Israel runakuna tsayno karkaykä Jerusaléncho tarpis, Judá particho tarpis, Israel nacionpa cercancho tarpis o karu nacioncho tarpis. Qam nishqaykita mana cäsukärishqäpitami maytsay nacionkunamanpis qarqapäkamashqanki. 8 TAYTA DIOS, mandamaqnï reykunapis, autoridänïkunapis, unay aylükunapis y kikïkunapis qamta mana cäsukuypami jutsata rurapäkushqä. Tsaymi pasaypa penqakuypaq karkaykä. 9 Noqakuna mana cäsukuq kaptïpis qamqa kuyapäkuq y perdonakuq TAYTA DIOSNÏMI kaykanki.
10 “TAYTA DIOSNILÄ, sirvishuqniki profëtakuna yachatsipäkamashqan leynikikunatapis manami cäsukärishqätsu. 11 Leynikikunata mana cäsukurmi lapanï lutanta rurapäkushqä. Tsaymi sirvishuqniki *Moisés qelqashqan leykunacho nishqanno noqakunaman maldición chayamushqa. 12 Castigapäkamänaykipaq nishqaykinömi noqakunata y autoridänïkunata mantsakuypaq castïguwan ushakätsimashqanki. Jerusalénta castigashqaykinöqa manami imaypis kay patsacho may markatapis castigashqankitsu.
13 “TAYTA DIOSNILÄ, kay nakaykunaqa Moisés qelqashqan leykunacho nishqannömi noqakunaman chayamushqa. Tsayno nakapäkurpis manami perdonamänaykipaq ruwakärimushqätsu. Jutsa ruraytapis manami noqakuna kacharishqätsu. Ni leynikikunatapis manami cäsukärishqätsu. 14 Tsaymi alilata ruraq kar mantsakuypaq castïguta kachamushqanki. Tsayno castigaykämaptikipis manami cäsukärishqätsu.
15 “Tayta Diosnilä, munaynikiwanmi kuyashqayki Israel runakunata Egiptupita jorqamurqayki. Tsaypita patsami kananyaqpis maytsaycho musyakaykan munayniyuq kashqayki. Tsayta musyaykarmi jutsata rurapäkushqä.
16 “Tayta, kuyapäkuq kaykarqa *sagrädu jirkannikicho kaykaq Jerusalénta tsayjinanpa ama castigaykulaynatsu. Unay aylükunapis y kikïkunapis jutsata rurapäkuptïqa Jerusalén markata y kuyashqayki runakunata lapan nacionkunacho taq runakuna manakaqmanmi churapäkaman.
17 “Tayta Diosnilä, kanan manakamur ruwakamushqäta mayaykalämay. Jutiki raykulapis juchutsishqa kaykaq templuykita kuyapaykulay. 18 Tayta Dios, manakamushqäta mayaykalämay. Ushakashqa kaykaq Jerusalén markaykita kuyapaykulay. Tsayno manakamü manami jutsaynaq kartsu, sinöqa kuyapäkuq kashqaykita musyarmi.
19 “Tayta Dios, ¡manakamushqäta mayaykalämay! ¡Jutsa rurapäkushqäta perdonaykalämay! ¡Yanapaykalämay, Tayta! ¡Jutiki rayku y akrashqayki marka rayku jukla salvaykalämay!”
Qanchis chunka semänapita tantiyatsishqan
20 Tsayno nirmi jutsata rurashqäpita y Israel mayïkuna jutsata rurashqanpita TAYTA DIOSTA ruwakur perdonta manakurqä. Tsaynöpis akrashqan *sagrädu jirkanpaq ruwakurqä. 21 Tsayno manakuykaptïmi sacrificiuta templucho tardipa rupatsinan höra *ángel Gabriel päriypa nawpäman chayamurqan. Paytami nawpa kaq revelacionchöpis rikarqä.
22 Paymi tantiyatsimar kayno nimarqan: “Daniel, noqa shamushqä lapan rikashqaykita shumaq tantiyatsinäpaqmi. 23 Manakuyta qalaykuykaptilaykimi ruwakushqaykita Tayta Dios awnishqa. Tsaymi pasaypa kuyashushpayki wilanäpaq kachamashqa. Tayta Diospa wilakuyninta tantiyatsiptï kanan shumaq mayamay.
24 “Qanchis chunka (70) semänami* destinashqa kaykan Israel mayikikuna y Tayta Dios akrashqan sagrädu markacho taqkuna mana cäsukuq kashqanta, jutsa rurashqanta y lutan rurashqanta kacharinanpaq. Tsay tiempu kaykan Tayta Dios munashqanno runa mayinwan ali kawapäkunanpaq, profëtakuna wilakushqankuna cumplikänanpaq y mas sagrädu kaqta* dedicapäkunanpaqmi.
25 “Kay nishqäta shumaq tantiyakuy. Jerusalén markata yapay sharkatsinanpaq ordenashqan junaqpita Tayta Dios akrashqan mandaq shamunanyaq qanchis semänami pasanqa y tsay jananmanmi soqta chunka ishkay (62) semäna pasanqa.* Pasaypa nakaykuna kaptinpis Jerusalén markapa cällinkunata y murällankunatapis altsapäkunqami.
26 “Soqta chunka ishkay semänakuna pasarkuptinnami Dios akrashqan runata ushakätsinqa. Juk mandaq runa soldädunkunawan shamurnami Jerusalén markata y *santu templuta chipyaq juchutsir ushakätsinqa. Löcu tamya elaqpita shamur imaykatapis ushashqannömi elaqpita kikinpis ushakanqapaq. Tsay tiempu ushakänanyaqmi Tayta Dios destinashqanno guërrapis y wanutsinakuypis kanqa.
27 “Juk semäna masmi tsay mandaq runa atska runakunawan *pactuta ruranqa. Nirkurmi pulan tsay semänacho* mana kachapanqatsu sacrificiukunata y tsaki mikuy ofrendakunata *altarcho rupatsipäkunanpaq. Nirkurmi altarpa nawpanman Tayta Dios mana munashqan kaqta churanqapaq.* Tsayno kanqa hasta Tayta Dios destinashqan tiempu cumplikänanyaqmi”.