Salmos

91 Tayta Diospa makincho kawaq runataqa munayniyuq Tayta Diosmi imapitapis tsapan.

 2 TAYTA DIOSTA manakurmi kayno nï:

“Qammi pakakunä kaykanki.

Qammi amparakunä törri kaykanki.

Qamlami yärakushqä Diosnï kaykanki”.

 3 Tayta Diosmi salvashunki contraykipa makinpita.

Paymi tsapäshunki wanutsikuq qeshyapitapis.

 4 Paymi älankunawan tsapäshunki.

Älan rurincho karqa manami imatapis mantsakunkinatsu.

Promitishqanta cumplirmi escüduno imaypis tsapäshunki.*

 5 Tsakaypa ima kaptinpis manami mantsakunkipaqtsu.

Junaqpa flëchashuptikipis manami mantsakunkipaqtsu.

 6 Tsakaypa o junaqpa pesti qeshya pïmayta wanutsiptinpis manami mantsakunkipaqtsu.

 7 Itsuq kaq nawpaykicho waranqata (1,000) wanutsirpis y alawqa kaq nawpaykicho chunka waranqata (10,000) wanutsirpis qamtaqa manami wanutsishunkitsu.

 8 Kikikimi rikankipaq fiyu runakunata castigashqanta.

 9 TAYTA DIOSMAN yärakur kawaptikiqa y poderniyuq Diosman amparakuptikiqa 10 imapis manami pasashunkitsu.

Wayikicho taqkunapis manami qeshyanqatsu.

11 *Angilninkunatami Tayta Dios kachamunqa maypa aywaptiki imapitapis tsapäshunaykipaq.

12 Paykunami tsarishunki chakilaykitapis rumikunaman mana takakunaykipaq.*

13 Leonkuna y culebrakuna kashqanchöpis jawkami purinkipaq.

Manta leontapis y culebratapis jarurinkimi.*

14 Tayta Dios kaynömi nin:

“Kuyamaqkunataqa noqami salvashaq.

Jutïta joqariqkunataqa imaypis noqami rikashaq.

15 Manakamaptinqa awnishaqmi.

Lakikuptin kikïmi paykunawan kaykäshaq.

Yanaparmi nakaykunapita jorqushaq.

16 Atska wata kawananpaqmi yanapashaq.

Salvaptïmi imaypis kushikärinqapaq”.