Jeremías
Judá runakuna ïdulukunata adorashqan
17 Tayta Dios kaynömi nin:
“Judá runakuna, jutsa rurayqa rumiman laqlaypa qelqashqanömi shonquykicho kaykan.
Tsaynöpis adorapäkushqayki *altarkunapa waqrankunaman laqlaypa qelqashqanömi kaykan.
Fiërrupita rurashqa diamanti puntayuq cincilwan laqlashqanömi kaykan.*
2 Perqashqayki altarkunachömi tsurikikunapis ïdulukunata adorarkaykan.
*Asera diösata adoranaykipaq jawishqayki raku qerukuna kaqchömi mana qonqaypa adorarkaykan.
Tsay qerukunaqa kaykan copösu yörakuna sikincho, altunnin jirkankunacho 3 y maytsay jirkakunachömi.
Intëru nacionnikichömi ïdulukunata adorarkaykanki.
Tsayno kashqaykipitami lapan imaykaykitapis contraykikuna apakärinanpaq kachapärishaq.
4 Bunyaypa bunyar imaypis rupaykaq ninano rabyashpämi herencia qoykushqä nacionpitapis qarqushayki.
Tsaymi mana reqishqayki nacioncho contraykikunapa ashmaynin kapäkunkipaq”.
Tayta Diosman yärakuqkuna y mana yärakuqkuna imano kashqan
5 TAYTA DIOSMI kayno nin:
“Maldicionädumi kanqa noqaman yärakamänanpa trukan runa mayilanman y kalpalanman yärakuqkunaqa.
6 Tsay runakunaqa pipis mana tashqan chunyaq jirkacho winaq shirakanömi karkaykan.
Tsaynöpis rumikuna chawpincho winaq yöranömi karkaykan.
Ali kawayta manami imaypis tarinqatsu.
7 “NOQAMAN yärakamuqkunami itsanqa kushishqa kawapäkun.
8 Tsay runakunaqa yaku kuchuncho plantaraykaq yöranömi karkaykan.
Tsay yörapa sapin yakuman sapitsashqa kaptin usyachöpis raprankuna verdiraykanmi.*
Usya kaptinpis qarwashtaykänanpa trukanqa mana chawaypami wayuykan.
9 “Runapa shonqunqa mana yärakuypaq fiyumi kaykan.
¿Piraq musyanman shonquncho imata yarpaykashqantapis?
10 Noqa TAYTA DIOSLAMI musyä shonquncho runa alita o mana alita yarpashqantapis.*
Tsaymi imanöpis kawashqanman tupu pitapis yanapä o castigäpis.*
11 Sakyapakuypa rïcuyaq runaqa tsakwa jukpa runtunta oqlaqnömi kaykan.
Riquëzankuna elaqpita ushakaptin pasaypa waktsami rikakunqa”.
Tayta Diosman Jeremías yärakushqan
12 TAYTA DIOS, qalaykunanpita patsami kuyaylapaq templuykipita lapanta mandaykämunki.
13 Qamqa Israel runakunata kuyaq TAYTA DIOSMI kaykanki.
Mana tsakiq pukyuno kaykaptikimi wakin runakunaqa qampita witikärishqa.
Paykunaqa pasaypa penqaychömi kanqapaq.
Alpacho qelqashqan juti wayrawan elqashqannömi paykunapis elqanqapaq.
14 TAYTA DIOS, ali kawanäpaq yanapaykalämay.
Imayka mana alikunapita salvaykalämay.
Noqaqa qamlatami imaypis alabä.
15 Runakunaqa asipämashpan kaynömi niman:
“¿Imaytaq cumplinqa TAYTA DIOS wilakatsishushqayki?
¡Jukla cumplitsun ari!”
16 Noqaqa manami imaypis qamta manakamurqätsu paykunata castiganaykipaq ni paykunata desgracia pasananpaq.
Musyankimi imata wilakushqätapis.
Mayaykämaptikimi lapanta nishqä.
17 Ima desgracia pasamaptinpis qamlamanmi amparakamü.
Ama kachaykamaytsu.
Qonqaykamaptikiqa fiyupami mantsakushaq.
18 Penqayman churamänaykipa trukanqa qatikachämaqkunata penqayman churaykuy.
Noqata castigamänaykipa trukanqa paykunata castigaykuy.
Paykunata ima desgraciapis pasaykulätsun.
Jamay junaqta respitananpaq Tayta Dios nishqan
19 TAYTA DIOSMI kayno nimarqan: “Marka yaykuna jatun punkuman aywaykur wilakuynïta tsaycho wilakuy. Tsay punkupami reykunapis yaykapäkun y yarqapäkun. Tsaycho wilakushqaykinöla Jerusalénman yaykuna wakin punkukunachöpis wilakuy.
20 “Wilakur kayno ninki: ‘Judá nacionpa mandaqnin reykuna, Judá runakuna y Jerusaléncho taq runakuna, TAYTA DIOS nishqanta lapayki cäsukäriy. 21 TAYTA DIOSMI kayno nin: Imapis mana pasashunaykipaq jamay junaqchöqa ama ima qepitapis apapäkuytsu ni Jerusalén punkukunapapis ima cargatapis yaykatsipäkuytsu.* 22 Jamay junaqchöqa wayikikunapitapis ama ima qepitapis jorqapäkuytsu. Tsay junaqchöqa ima aruytapis ama arupäkuytsu. Tsaypa trukanqa unay ayluykikunata nishqäno noqata respitamashpayki jamapäkuy.* 23 Unay ayluykikunaqa tsayno niykaptïpis manami wiyakärimashqatsu ni cäsukärimashqatsu. Tsaypa trukanqa shonqunta chukruyätsirmi mana cäsukamashpan corriginätapis mana munapäkushqatsu.
24 “ ‘Qamkunaqa nishqäta cäsukushpayki jamay junaqcho markaman yaykuna mayqan punkupapis cargata ama yaykatsimuytsu. Jamay junaq arunaykipa trukan noqata respitamar jamaptikiqa 25 kay nacionpita y kay markapita imaypis manami qarqushaykitsu. Tsaynölami rey David jamarashqan trönunpita rey imaypis mandanqa. Reykunami y autoridäkunami carrëtankunawan y cawallunkunawan kay markapa punkunkunapa imaypis pasanqa. Paykunawanmi Judá runakuna y Jerusalén runakuna kay punkunkunapa yaykapäkunqa. Jerusalénchömi imayyaqpis runakuna tanqa.
26 “ ‘Tsaynöpis adoramänanpaqmi Jerusalénman shapäkamunqa Judá nacioncho kaykaq markakunapita, Jerusalénpa nawpankunapita, Benjamín trïbu runakuna tashqan partipita, *Sefelapita, jalqakunapita y *Neguevpita. Shamurmi templuman apapäkamunqa rupatsina sacrificiukunata, tsaki mikuy ofrendakunata, inciensuta, agradëcikamänanpaq kaq sacrificiuta y wakin sacrificiukunatapis.
27 “ ‘Nishqäta mana cäsukur jamay junaq mana jamaptiki y Jerusalén markapa punkunkunapa tsay junaqcho ima qepitapis yaykatsiptikiqa Jerusalénpa punkunkunatami rupatsishaq. Tsaymi Jerusaléncho kaykaq palaciukunapis rupar ushakanqapaq. Tsaytaqa manami pipis upitsinqatsu’ ”.