Romanos
Tayta Dios juzgananpaq nishqan
2 Israel runa, qampis jutsayuq kaykar ¿imanirtaq runa mayikita juzgaykanki? Tsayno juzgaptikiqa pï kaptikipis Tayta Dios juzgashushpaykimi castigashunkipaq.*
2 Musyantsimi pitapis jutsa ruraq kaqtaqa jutsata rurashqanman tupu Tayta Dios castigananpaq kashqanta. 3 Tsayno kaykaptinqa ¿Tayta Diospa castïgunpita qeshpinkitsuraq? 4 Tayta Dios jukla mana castigashuptiki ama yarpapäkuytsu mana castigashunaykipaq kashqanta. Payqa kuyapäkuq, pacienciakuq y perdonakuq karmi jutsa ruraykunata kacharinaykita shuyaraykan. 5 Tsayno kaptinpis chukru shonqu karmi jutsa ruraykunata mana kacharinkitsu. Tsaymi juzganan junaq Tayta Dios fiyupa rabyar castigashunkipaq.
6 Tsay junaqqa imanöpis kawashqanman tupumi lapan runakunata juzganqa.* 7 Tayta Diospa nawpancho kawayta munar alilata ruraqkunataqa imayyaqpis kawananpaqmi gloriaman pushanqapaq. 8 Tayta Diosta mana cäsukur jutsata ruraqkunatami itsanqa rabyashpan mana kuyapaypa castiganqa.
9 Fiyupa castigaptinmi lapanpis jutsa ruraqkunaqa nakar lakikärinqa. Puntata Israel runakunami nakapäkunqa y tsaypitanami mana Israel runakuna. 10 Alilata ruraqkunami itsanqa Diospa nawpancho ali kawayta chaskipäkunqa. Puntata Israel runakunami chaskipäkunqa y tsaypitanami mana Israel runakuna.
11 Runakunata Tayta Dios tsayno juzganqa pipapis favornin mana sharkuylapami.* 12 Tsaymi leyninkunata musyaqkunatapis y mana musyaqkunatapis jutsata rurashqanpita Tayta Dios ushakätsinqa. Leyninkunata musyaqkunataqa tsay leykuna nishqanman tupumi juzganqa. 13 Manami leyninkunata musyashqalanpitatsu Tayta Dios pitapis salvanqa, sinöqa leyninkunata cäsukushqanpitami.
14 Mana Israel runakuna Diospa leyninkunata mana musyarpis alita rurarqa tsay leykunata musyaqnömi kaykan. 15 Jutsata rurar lakikuptin y alita rurar kushikuptinmi musyantsi runakunapa shonquncho Diospa leyninkuna qelqaraykashqanta. 16 Tsaymi pakaylapa jutsata rurashqanpita juzganan junaq Tayta Dios pïmaytapis juzganqa. Tsayno juzgananpaqmi Jesucristuta Tayta Dios churashqa. Tsayno kananpaq kaqtami ali wilakuyta wilakur pitapis tantiyatsï.
Diospa leyninkunata Israel runakuna mana cäsushqan
17 Israel runakuna, tantiyakäriy. Qamkuna yarpanki Diospa leyninkunata yachashqaykipita mana juzgashunaykipaq kashqantami. Tsaynöpis kushikurkaykanki Tayta Dios akrashushqaykipitami. 18 Tayta Diospa leyninkunata yacharmi pay munashqanno kawanaykipaqpis musyapäkunki. Tsaymi ali kashqanta y mana ali kashqantapis tantiyapäkunki. 19 Qaprano kaqkunata pusharaqno y tsakaychöno kawaqkunata atskipaqno kashqaykitami yarpapäkunki. 20 Mana yachaqkunata y wamrakunata ali yachatsiq kashqaykitami yarpapäkunki. Tsayno yarpapäkunki Diospa leyninkunata yachakushqa karmi.
21 Wakin runakunata tsayno yachaykätsirqa ¿imanirtaq kikikikuna mana cäsukärinkitsu? Mana suwakunanpaq yachaykätsirqa ¿imanirtaq kikikikuna suwakärinki? 22 Majanta mana jarukunanpaq yachaykätsirqa ¿imanirtaq kikikikuna majaykita jarukärinki? Ïdulukunata rikaytapis mana munaykarqa ¿imanirtaq ïdulukunapa adornunkunata suwakurkaykanki? 23 Diospa leyninkunata yachashqaykipita alabakuykarqa ¿imanirtaq tsay leykunata mana cumplir Tayta Diosta manakaqman churarkaykanki? 24 Tsayno kawaptikichari Tayta Diospa palabrancho kayno qelqaraykan: “Qamkuna lutanta rurar kawaptikimi mana criyiq runakuna Tayta Diosta manakaqman churapäkun”.*
Señalakuypita yachatsishqan
25 Tayta Diospa leyninkunata cumpliptikiqa *señalakushqaykipis alimi kaykan. Leyninkunata mana cumpliptikimi itsanqa señalakushqaykipis manakaqlapaq kaykan. 26 Mana señalakushqa runakunapis Diospa leyninkunata cumpliptinqa ¿manatsuraq señalakushqatano Tayta Dios chaskinqa? 27 Tsaymi mana señalakushqa karpis Diospa leyninkunata cumpliqkuna juiciu finalcho kayno nipäkushunki: “Señalakushqa kaykarqa y Diospa leyninkunata shumaq yachaykarqa ¿imanirtaq Tayta Diosta mana cäsukurqaykitsu?”
28 Manami maman o taytan Israel runa kashqalanpitatsu pipis rasunpa Israel runa kaykan. Tsaynöpis manami señalashqa kashqalanpitatsu rasunpa señalashqa kaykan. 29 Tsaypa trukanqa rasunpa señalashqa kaykan shonqunta Espíritu Santu señalaptinmi.* * Paykunataqa runakuna chikiptinpis Tayta Dios kuyanmi.