Deuteronomio
14 “TAYTA DIOSNINTSIPA wamrankuna kaykarqa pipis wanuptin ama cuerpuykita pishtaypa pishtar ushapäkunkitsu ni urkuykipapis ama rutukärinkitsu.* 2 Qamkunaqa TAYTA DIOS kuyashqan *santu runakunami karkaykanki. Paymi lapan nación runakunapitapis akrashushqanki paylapana kapäkunaykipaq.*
Püru kaq y impüru kaq uywakuna kashqan
3 “*Impüru kaq uywakunataqa ama mikupäkunkitsu. 4 Mikunaykipaq kaq uywakunaqa kaykan wäka, uysha, cabra, 5 munti cabra y tukuy casta luychukunami.
6 “Mayqan uywatapis mikupäkunki kutipaq kaptin y cada chakincho ishkay shilluyuq kaptin. 7 Mana kutipaq y ishkay shilluyuq mana kaptinqa ama mikupäkunkitsu. Tsayno kaptinqa *camëlluta, liebrita* y *tejonta ama mikupäkunkitsu. Tsay uywakunaqa kutipaq* karpis ishkay shilluyuq mana karmi qamkunapaq impüru kaykan. 8 Kuchiqa ishkay shilluyuq karpis mana kutipaq karmi qamkunapaq impüru kaykan. Tsay uywakunapa aytsantaqa ama mikupäkunkitsu. Wanuptinpis ama yataylapis yatapäkunkitsu.
9 “Mayucho kaqkunata y lamarcho kaqkunatapis alëtayuq y escämayuq kaqkunalata mikupäkunki. 10 Escämayuq kaptinpis alëtan mana kaptinqa ama mikupäkunkitsu. Tsaynöla alëtayuq kaptinpis escäman mana kaptinqa ama mikupäkunkitsu. Tsaykunaqa qamkunapaq impürumi kaykan.
11 “Mayqan päriqkunatapis püru kaqlata mikupäkunki. 12 Ama mikupäkunkitsu ankata, wiskulta, lamarcho pescädu tsariq äguilata, 13 milänu nishqan ankata, tukuy casta halconkunata, 14 tukuy casta cuervukunata, 15 *avestruzta, chushiqta, qewllata*, tukuy casta ankata, 16 tukuta, ibis nishqan yaku pätuta, cisnita, 17 pelïcanuta, condorta, cormorán nishqan yaku pätuta, 18 *cigüeñata, abubillata ni chikchitapis.
19 “Lapan casta päriq insectukunaqa* qamkunapaq impürumi kaykan. Tsaykunataqa ama mikupäkunkitsu. 20 Älayuqkunatapis püru kaqkunalata mikupäkunki.
21 “Qamkunaqa TAYTA DIOS kuyashqan *santu runakunami karkaykanki. Tsaymi ima uywatapis kikilan wanushqataqa ama mikupäkunkitsu. Tsaypa trukanqa markaykikunacho taq jäpa runakunata qoykunki o rantikuykunki.
“Cabra malwapa aytsantapis mamanpa lëchinwanqa ama yanupäkunkitsu.*
Diezmupita Moisés tantiyatsishqan
22 “Cada wata cosechayta usharkur mana qonqaypa *diezmuta rakipäkunki.* 23 Tsaymi trïguta cosechar cada chunka tupuypita jukta rakipäkunki diezmupaq. Vïnuta rurarpis cada chunka tupuypita jukta rakipäkunki diezmupaq. Olïvupita aceitita rurarpis cada chunka tupuypita juk tupuyta rakipäkunki diezmupaq. Tsaynöpis wäkaykipa, uyshaykipa y cabraykipa qechpa wawankunata *primiciapaq rakipäkunki. Tsay rakishqaykikunataqa TAYTA DIOS akrashqan kaq sitiuman apaykur paypa nawpancho mikupäkunki. Tsaynöpami TAYTA DIOSTA imaypis *mantsakuyta yachakärinkipaq.
24 “Tsay sitiu aläpa karu kaptinqa TAYTA DIOS bendicionninta qoshushqaykipita jorqushqayki diezmuta apayta mana kamäpakurqa 25 rantikärinki. Nirkurqa qellaylatana apapäkunki TAYTA DIOSTA adoranaykipaq akrashqan kaq sitiuman. 26 Tsaychöna rantipäkunki munashqaykita wäkata karpis, uyshata karpis, cabrata karpis, vïnuta karpis, o aswata karpis. Nirkurqa TAYTA DIOSPA nawpancho ayluykikunawan kushikushpayki mikupäkunki.
27 “Markaykicho taq *levitakunataqa mana qonqaypa imalawanpis yanapanki. Paykunapaqa manami chakrankunapis kanqatsu.
28 “Tsaynöpis cada kimsa watacho mikuyta cosechashqaykipita diezmuta rakir markaykikunacho juk sitiuman churapäkunki. 29 Tsay churashqayki diezmupitami mikupäkunqa levitakuna, qamkunacho taykaq jäpa runakuna, waktsa wamrakuna y viüdakuna. Tsayno mikunanpaq churapäkuptikimi TAYTA DIOS bendicionninta lapan arushqaykikunaman churamunqa.*