Deuteronomio
17 “Töruta karpis uyshata karpis däñashta o mana alitaqa TAYTA DIOSPAQ altarcho ama rupatsipäkunkitsu. Tsayno kaqkunata ruraptikiqa pasaypami rabyakun.
2 “TAYTA DIOS rurashqan *pactuta manakaqman churashpan qoykushunaykipaq kaykaq markakunacho olqupis o warmipis 3 juk dioskunata adorar qonqurpakuptin o intita, killata o qoylarkunata adoraptinqa 4 shumaq tapukärinki rasunpa adorashqanta o mana adorashqantapis. Israel nacioncho rasunpa tsayno adoraykashqanta musyarqa 5 tsay runata o warmita marka yarqunancho saqmaypa wanutsipäkunki.*
6 “Tsayno wanutsipäkunaykipaqqa ishkay o kimsa testïgukunaraqmi kanman. Juk testïgu nishqalanwanqa manami wanutsipäkunkimantsu.* 7 Tsay testïgukunaraqmi warmita o runata karpis puntata saqmayta qalaykärinqa. Tsaypitanami lapan runakuna saqmapäkunqa. Tsaynöpami mana ali ruraykuna qamkunacho mana kanqatsu.*
8 “Markaykicho aläpa sasa arreglaypaq problëmakuna kanqami. Tsayno problëmakuna kanqa runa mayinta wanutsishqanpita, runa mayinwan rimanakushqanpita o runa mayinwan pelyashqanpitapis. Tsaykunata arreglayta mana kamäpakurqa TAYTA DIOS akrashqan sitiuman aywaykur 9 tsaycho kaq *levita cürakunata karpis o juezta karpis tapukärinki. Paykunami tantiyatsishunkipaq imano arreglanaykipaqpis. 10 Kutiykur paykuna tantiyatsishushqaykinöla arreglapäkunki. 11 Paykuna yätsishushqaykinöla imatapis mana qonqaypa lapanta arreglapäkunki.
12 “TAYTA DIOSTA sirviykaq cüra o juez imano arreglananpaq nishqanta mana cäsukuq runataqa wanutsipäkunki. Tsaynöpami lutan ruraq runakuna Israel nacioncho mana kanqatsu. 13 Tsayno wanutsishqanta musyashpanmi runakuna mantsakunqa cürakuna y juezkuna nishqankunata cäsukärinanpaq.
Reykuna imano kananpaq nishqan
14 “TAYTA DIOS qoykushunaykipaq kaq nacioncho tashpayki wakin nación runakunapa mandaqnin reykuna kashqanno qamkunapis rey kananta capaz munapäkunkipaq.* 15 Tsayno munarqa TAYTA DIOS akrashqan Israel mayikita churapäkunki mandaqniki rey kananpaq. Jäpa runataqa ama churapäkunkitsu.
16 “Tsay reyqa ama rantinqatsu atska cawallukunata ni Egiptumanpis ama kachanqatsu cawalluta rantimunanpaq.* Egiptuman mana kutinantsipaqmi TAYTA DIOS kayno nirqan: ‘Egiptuman imaypis ama kutipäkunkitsu’. 17 Tsaynöpis atska warmiyuq ama katsuntsu.* Atska warmiyuq karqa TAYTA DIOSTAPIS qonqaykunqami. Qoritapis ni qellaytapis aläpa ama shuntatsuntsu.*
18 “Rey kananpaq churapäkuptin kay yachatsishqä leykunata liyinanpaq *levita cürakuna tsararashqan röllupita juk rölluman copiatsinqa. 19 Tsay leykunatami reyqa wanunanyaq waran waran liyinqa. Tsaynöpami TAYTA DIOSTA *mantsakuyta yachakur lapan leyninkunata y estatütunkunata cäsukunqapaq. 20 Tsaynöpis marka mayinkunata manami manakaqman churanqatsu y ley nishqankunatapis manami qonqanqatsu. Tsayno karqa kikinpis, tsurinkunapis y tsurinkunapita miraqkunapis Israel nacioncho imaypis reymi kanqapaq.