1 Juan
Apóstol Juanpa punta kaq cartan
1 Kawatsikuq Palabrapitami* qamkunapaq qelqamü. Payqa imapis manaraq kaptin maynami kaykarqan.* Paytami rikapäkushqä, yatapäkushqä y parlashqantapis mayapäkushqä. 2 Tsay Kawatsikuqta Tayta Dios kachamuptinmi rikapäkurqä.* Tsaymi qamkunata wilapaykä *mana ushakaq kawayta qomaqnintsi kashqanta. Paymi Tayta Dioswan kaykashqanpita noqantsiman shamushqa. 3 Rikapäkushqäta y mayapäkushqätami qamkunata wilaparkaykä. Tsaynöpami Tayta Diospa y Tsurin Jesucristupa nawpancho kawapäkushqäno qamkunapis paypa nawpancho kawapäkunkipaq. 4 Tsaykunata qelaykämü kushishqa kawanantsipaqmi.
Jutsata mana ruraypa kawanantsipaq nishqan
5 Jesucristo yachatsimashqalantami qamkunata kayno wilapaykä: Tayta Diosqa atskimi. Paychöqa manami ima tsakaypis kantsu.* 6 Tsaymi mayqantsipis “Tayta Dios munashqannömi kawaykä” niykar jutsata rurarqa lulakuykantsi. Tsayno kawarqa manami rasunpatsu Tayta Dios munashqanno kawaykantsi. 7 Tayta Dios atsikyaqcho kashqanno noqantsipis atsikyaqcho kawarmi* juknintsi juknintsi kuyanakuykantsi. Tsaynöpis Tsurin Jesucristumi yawarninwan lapan jutsa rurashqantsita maylamashqantsi.
8 Mayqantsipis “noqaqa jutsaynaqmi kä” nirqa manami rasun kaqtatsu parlaykantsi, sinöqa lulakuykantsimi. 9 Jutsata rurashqantsipita perdonta manakuptintsimi itsanqa promitimashqantsita cumplir Tayta Dios perdonamäshun. Payqa alilata ruraq karmi lapan jutsantsita maylamäshun.
10 Jutsaynaq tukurqa pay nishqankunata manakaqmanmi churaykantsi. Tsayno karqa manaraqmi wilakuyninta chaskikushqantsiraqtsu.*