Efesios
3 Tsaymi noqa Pablo, Jesucristupa ali wilakuyninta qamkunata y wakin mana Israel runakunata wilapashqäpita prësu wichqaraykar...*
Mana Israel runakunatapis wilapänanpaq Pabluta churashqan
2 Tayta Dios kuyakuq karmi churamashqa qamkunata y wakin mana Israel runakunatapis ali wilakuyninta wilapänäpaq.* Tsay wilakuytaqa musyarkaykankinami. 3 Ali wilakuyninta runakuna mana musyashqa kaptinpis Tayta Diosmi tantiyatsimashqa tsay wilakuy imapita kashqantapis.* Tsayno tantiyatsimashqantami kay cartacho wilaykä.
4 Tsaymi kay cartata liyir tantiyakärinki Jesucristupa wilakuyninta wilakushqäta. 5 Tsay ali wilakuyta manami unay runakuna musyarqantsu. Kananraqmi santu *apostolkunata y profëtakunatapis Espíritu Santu tantiyatsipäkamashqa. 6 Tsay wilakuy kaynömi niykan: Tayta Diospa ali wilakuyninta chaskikurmi mana Israel runakunapis salvacionta taripäkunqa. Tsaymi Israel runakunata Tayta Dios promitishqankunata paykunapis chaskipäkunqa. Tsaynöpami lapantsipis tsay aylunölana kaykantsi.* 7 Tsay ali wilakuyninta wilakunäpaqmi Tayta Dios kuyakuq kar munayninwan churamashqa.
8 Tayta Diosman lapan yärakuqkunapita mana väliq kaykaptïpis* Tayta Diosmi kuyamar churamashqa Jesucristupa ali wilakuyninta mana Israel runakunata wilapänäpaq. Tsay ali wilakuymanqa manami ima riquëzapis tinkuntsu. 9 Unaypita mana musyapäkushqan wilakuyta pïmaytapis wilapänäpaqmi lapantapis kamaq Tayta Dios churamashqa.
10 Tsaynöpami Jesucristuman yärakuqkuna salvakuptin *supaykunapis y jana patsacho kaykaq lapan *angilkunapis tantiyarkaykan Tayta Dios shumaq yachayniyuq kashqanta. 11 Tsayno tantiyarkaykan Tayta Dios unaypita patsa yarpashqanno Señor Jesucristo noqantsi rayku wanushqa kaptinmi. 12 Tsaymi Jesucristuman yärakur Tayta Diosta mana mantsakuypana manakuntsi.
13 Jesucristo salvamashqantsita musyaykarqa mana Israel runakunata wilapashqäpita prësu wichqaraptïpis ama lakikäriytsu. Lakikunaykipa trukanqa salvakärinaykipaq wilakushqäpita kushikäriy.
Jesucristo pasaypa kuyamashqantsi
14 Tsaymi qonqurpakuykur [Señor Jesucristupa] Papänin Tayta Diosta manakü. 15 Paymi kamashqa jana patsacho kaqkunata y kay patsacho kaqkunatapis. 16 Paytami manakü gloriacho riquëzankuna kashqanman tupu Espïritunwan poderta qoshunaykipaq. 17 Tsaynöpis manakü shumaq yärakäriptiki Jesucristo shonquykicho tänanpaq. Tsaynöpami shumaq sapitsashqa yörano y ali cimientushqa wayino kar paypa kuyakuynilancho kawapäkunkipaq.
18 Kuyakuynincho kawarmi lapan yärakuq mayintsikunawan tantiyakärinki Jesucristo pasaypa kuyamashqantsita. Pay kuyakuq kashqanqa pasaypa anchumi, largumi, altumi y hondumi kaykan. 19 Tsaymi Tayta Diosta manakü kuyakuyninta tantiyatsishunaykipaq. Tsaynöpami Tayta Dios qamkunacho kar pay munashqanno kawapäkunaykipaq imaypis yanapashunki.
20 ¡Tayta Diosta alabaykuläshun! ¡Pasaypa munayniyuq karmi manakushqantsipita y yarpashqantsipitapis masraq yanapamantsi! 21 ¡*Iglesian kanantsipaq Jesucristo salvamashqantsipita lapantsi mana ajayaypa imaypis alabaykuläshun! Amén.