Jeremías
Chakrata Jeremías rantishqan
32 Kaychömi qelqaraykan Jeremíasta TAYTA DIOS nishqan. Tsay witsanqa Sedequías chunka watanami Judá nacionpa mandaqnin rey kaykarqan.* Nabucodonosornami chunka pusaq wata Babiloniapa mandaqnin rey kaykarqan.
2 Tsay junaqkunami Babilonia nacionpa mandaqnin reypa soldädunkuna Jerusalénta jiruruypa tsaparpaykarqan. Jeremíasnami reypa palaciunpa sawannincho prësu wichqaraykarqan. 3 Tsaycho prësu wichqaränanpaq tsarirkatsirmi rey Sedequías kayno nirqan: “¿Imanirtaq TAYTA DIOSPA jutincho wilakur niykanki Babiloniapa mandaqnin reyqa Jerusalénta vincinanpaq kashqanta? 4 Tsaynöpis ¿imanirtaq niykanki Babilonia soldädukuna prësu tsarirkamar mandaqnin reyman entregamaptin senqa senqa tinkunäpaq kashqanta? 5 Tsaynöpis niykanki Babiloniaman prësu apamaptin Tayta Dios nishqanyaq tsaycho tsararämänanpaq kashqanta. ¿Imanirtaq TAYTA DIOSPA jutincho niykanki Babilonia* soldädukunawan pelyarpis mana vincinantsipaq kashqanta?”
6 Tsay witsanmi TAYTA DIOS kayno nimarqan: 7 “Tiyuyki Salumpa tsurin Hanameelmi kayno nishunkipaq: ‘Anatotcho kaykaq chakräta rantikushayki. Legïtimu aylü kaptikimi qamta rantikuyta munaykä’ ”.
8 TAYTA DIOS nimashqannölami prïmü Hanameel palaciupa sawannincho prësu kaykashqäman watukamaq shamur kayno nimarqan: “Anatotcho kaykaq chakräta rantikushayki. Legïtimu aylü kaykarqa jukla rantiykalämay”.
Tsayno nimaptinmi tantiyarqä rantinäpaq TAYTA DIOS kamakaykätsishqanta. 9 Tsaymi prïmü Hanameelpa chakranta rantir chunka qanchis qellayta pägarqä. 10 Manaraq pägarmi papilta rurarkatsir firmar sëllarqä. Tsaynölami testïgukunatapis firmatsirqä. Tsaypitanami aykatapis päganäpaq parlashqäno pägarqä.
11 Ruratsishqä papilta pipis mana kichananpaq cërawan siguratsirqä. Copia kaq papilmi itsanqa siguräni karqan. Ishkan papilkunata aptarkurmi 12 Neríaspa tsurin y Maasíaspa wilkan Baructa entregarqä. Tsayno entregarqä prïmü Hanameelpa nawpancho, firmaq testïgukunapa nawpancho y sawancho kaykaq Judá runakunapa nawpanchömi.
13 Paykuna mayaykaptinmi Baructa kayno nirqä: 14 “Israel runakunata kuyaq y lapanta mandaq TAYTA DIOSMI kayno nin: ‘Chakrata rantir ruratsishqan papilta copiantinta atska wata churararpis mana ismunanpaq mitu mankaman churay. 15 Kay nacionchöqa yapaymi chakrata, wayita y üva chakrata rantipäkunkipaq y rantikunkipaq. Israel runakunata kuyaq y lapanta mandaq TAYTA DIOS karmi tsayno nï’ ”.
Tayta Diosta Jeremías manakushqan
16 Neríaspa tsurin Baructa tsay papilkunata qoykurmi TAYTA DIOSTA manakur kayno nirqä:
17 “TAYTA DIOS, pasaypa munayniyuq karmi jana patsatapis y kay patsatapis kamashqanki. Qampaqqa manami imapis sasa kantsu. 18 Cäsukushuqnikikunataqa maytsika kaptinpis kuyapankimi. Jutsa rurayta mana kachariqkunatami itsanqa kikinta y tsurinkunatapis castiganki. Munayniyuq Tayta Diosmi kaykanki. Jutikiqa lapanta mandaq *Yahwehmi kaykan. 19 Qam yarpashqaykikunaqa tantiyayta mana atipaypaqmi kaykan. Lapan rurashqaykikuna alimi kaykan. Rikaykankimi runakuna imata rurashqantapis. Tsaymi rurashqanman tupu yanapanki o castigankipis.
20 “Egiptupita Israel runakunata jorqamurmi mantsariypaq kaqkunata rurarqayki. Tsaynölami kananpis kay nacioncho y maytsay nacionkunachöpis espantaypaq kaqkunata ruraykanki. Tsaymi munayniyuq kashqaykita pïmaypis parlapäkun. 21 Munayniyuq karmi espantaypaq kaqkunata rurashpayki Egiptupita kuyashqayki unay aylükunata jorqamurqayki. Imaypis mana rikashqankunata ruraptikimi lapan runakuna pasaypa mantsakashqa rikakärirqan. 22 Nirkurmi promitishqaykino kay nacionta qoykurqayki. Kaychöqa lëchipis abëjapa mishkinpis yakunöraqmi atska kaykan.
23 “Tsayno kaptinpis kay nacioncho tarnami mana cäsukushurqaykitsu. Leynikikunatapis manami cumplirqantsu. Nishqaykita manami imatapis rurarqantsu. Tsayno kaptinmi paykunata kanan castigaykanki.* 24 Tsaymi Babilonia soldädukuna kay markaman yaykamunanpaq murälla waqtankunapa alpata qotupäkushqa. Markata tumaparämuptinmi runakuna yarquyta mana kamäpakur wakin yarqaypita wanunqa y wakinkuna pesti qeshyawan wanunqa. Babilonia soldädukuna markaman yaykamuptinnami wakin runakuna guërracho wanunqa. Tsayno vincimashpanmi noqakunata munayninman churapäkamanqa. Kay markata ima pasananpaq kashqantapis nishqaykinölami kanan pasaykan.
25 “TAYTA DIOS, ¿Babilonia soldädukunapa munaynincho kay marka kananpaq kaykaptinku testïgukunapa nawpancho chakrata rantinäpaq nimashqanki?”
Jerusalénta Babilonia runakuna munayninman churananpaq nishqan
26 Tsayno nir manakuptïmi TAYTA DIOS kayno nimarqan: 27 “Noqaqa lapan kawaqkunapa TAYTA DIOSNINMI kaykä. Tsaymi noqapaqqa imapis mana sasatsu kaykan.* 28 Babilonia nacionpa mandaqnin rey Nabucodonosorpa y soldädunkunapa munayninmanmi kay markata kachaykushaq. Paykunami munaynincho tsararanqa.*
29 “Tsaymi Jerusalén markata jiruruparaykämuq Babilonia soldädukuna yaykamushpan wayikunata rupatsir ushapäkunqa. Tsaynölami wayikuna janancho* *Baalta adorar inciensu qoshtatsikunankunatapis rupatsir ushanqa. Tsay wayikunachömi Jerusalén runakuna pasaypa rabyatsimar juk dioskunata adorar vïnutapis jichapäkurqan. Tsay wayikunaqa lapanpis ruparmi ushakanqa.
30 “Noqa TAYTA DIOSMI kayno nï: Unaypita patsami Israel runakuna y Judá runakunaqa mana munashqäkunata rurashqa. Ïdulukunata ruraykur adorashpanmi pasaypa rabyatsimashqa. 31 Kay markacho tashqan junaqpita patsami pasaypa rabyatsimashqa. Tsaymi chipyaq ushakätsishaq 32 lapanpis jutsata rurar rabyatsimashqanpita. Tsayno rabyatsimashqa Israel runakuna, Judá runakuna, Jerusaléncho taqkuna, mandaqnin reykuna, autoridäninkuna, cürankuna y profëtankuna. 33 Paykunaqa manami cäsupäkamashqatsu. Unaypita patsa yaparir yaparir yachaykätsiptïpis y jutsa rurayta kacharinanpaq mayjina anyapaptïpis manami cäsukärimashqatsu.
34 “Adoramänan templutapis manakaqman churashpanmi ïdulukunata tsayman churapäkushqa. 35 Ben-hinom raqracho* *altarkunata rurarmi Baal diosta adorapäkushqa. Moloc diostapis adorashpanmi* tsay altarkunacho olquta warmitapis tsurinkunata rupatsipäkushqa. Tsayta rurananpaq manami nirqätsu ni yarpaylapis yarparqätsu. Tsayno rurashpanmi lapan Judá runakunata jutsaman tunitsipäkushqa.
Nacionninman shuntamunanpaq nishqan
36 “Qamkuna nirkaykanki kay markacho wakin runakuna guërracho wanunanpaq kashqanta, wakinkuna yarqaypita wanunanpaq kashqanta y wakinkunana pesti qeshyawan wanunanpaq kashqanta. Tsaynöpis nirkaykanki Babilonia nacionpa mandaqnin rey vinciykur munayninman churashunaykipaq kashqanta.
“Israel runakunata kuyaq y lapanta mandaq TAYTA DIOS karmi kayno nï: 37 Nishqaykinölami kanqa. Pasaypa rabyarmi maytsay nacionkunamanpis qarqupäkushayki. Tsayno kaptinpis qamkunapita miraqkunata tsay nacionkunapita shuntamushaqmi. Kay nacionman shuntarkamurnami paykunata yanapashaq jawkala kawapäkunanpaq. 38 Paykunami kuyashqä runakuna kapäkunqa. Noqanami paykunapa Diosnin kashaq. 39 Shonqunmanmi ali yarpayta churashaq imaypis *mantsakamar munashqäno kawananpaq. Tsaynöpami kikinkunapis y tsurinkunapis ali kawanqapaq.
40 “Paykunawanmi *pactuta rurashaq imayyaqpis yanapanäpaq. Tsaynöpis paykunapa shonqunmanmi ali yarpayta churashaq imayyaqpis noqalatana sirvimänanpaq.* 41 Ali kawananpaqmi kushishqa yanapashaq.* Lapan shonqüwan kuyashpämi plantata plantaqno paykunata kay nacioncho tsararäshaq. Tsay nishqätaqa cumplishaqmi. 42 Qamkunata castiganäpaq nishqäta y yanapanäpaq nishqätapis cumplishaqmi. Noqa TAYTA DIOSMI tsayno nï.
43 “Qamkuna nirkaykanki kay nación chunyaq kananpaq kashqanta y runapis ni uywapis manana kananpaq kashqantami. Tsaynöpis nirkaykanki Babilonia soldädukuna munaynincho tsararäshunaykipaq kashqantami. Nishqaykinömi rasunpa kanqa. Tsayno kaptinpis noqaqa nï kay nacioncho runakuna yapay chakrayuq kananpaq kashqantami. 44 Juk lädu nacionkunacho tashqanpita kay nacionman shuntamuptïmi chakrata yapay rantipäkunqa y rantikärinqa. Rantikurmi papilta rurarkur autoridäwan sëllatsinqa. Testïgukunapis tsay papilman firmanqa. Tsaynöqa ruranqa Benjamín particho, Jerusalén nawpankunacho, intëru Judá nación markakunacho, jalqakunacho, *Sefelacho kaykaq markakunacho y *Neguev markakunachömi. Noqa TAYTA DIOSMI tsayno nï”.