Lucas
Jesús yurishqan
2 Tsay witsanmi Augusto *César wilakatsirqan mandashqan nacionkunacho lapan runakuna censakärinanpaq. 2 Tsay punta kaq censakuy karqan Cirenio jutiyuq runa Siria provinciacho gobernador kaykaptinmi. 3 Tsawraqa lapan runakuna unay aylunkunapa markankunaman aywapäkurqan censakärinanpaq.
4 Unay aylun rey David Beléncho yurishqa kaptinmi Josépis Galileacho kaykaq Nazaretpita Judeacho kaykaq Belénman censakuq aywarqan. 5 Warmin kananpaq parlashqana karmi Maríatapis pusharqan. Tsay junaqkuna Maríaqa wachakunanpaqnami kaykarqan. 6 Beléncho kaykaptinnami wachay nanay tsarikuykurqan. 7 Tsaychönami qechpa wawanta wachakurqan. Qorpakuna punukunancho posäda mana kaptinmi inchanawan piturkur uywakuna mikukunalaman punuykatsirqan.*
Uysha täpaqkunata angilkuna yuripashqan
8 Tsay tsakaymi Belén marka washa läduncho uyshayuqkuna uyshankunata täparkaykarqan. 9 Tsayman *ángel yuriparkuptin Tayta Diospa chipchipyaynin atsikyapaykurqan. Tsayta rikaykurmi uysha täpaqkuna fiyupa mantsakarqan. 10 Tsaymi ángel kayno nirqan: “Ama mantsakäriytsu. Lapan runakuna kushikärinanpaqmi ali wilakuyta apamushqä. 11 Kananmi rey *Davidpa markancho juk salvador yurishqa. ¡Payqa Señornintsi Cristumi! 12 Tsay ititami taripäkunkipaq uywakuna mikukunalancho inchanawan pitushqa punuraykaqta. Tsayno kaykaqta tarirmi niykashqäkuna rasunpa kashqanta musyapäkunkipaq”.
13 Ángel tsayno niykaptinmi tsaytsika angilkuna elaqpita yurirkur Tayta Diosta alabar kayno nirqan:
14 “¡Jana patsacho kaqkuna Tayta Diosta alabaykulätsun!
¡Kay patsachöpis Tayta Dios kuyashqan runakunapaq ali kaway kaykulätsun!”
15 Angilkuna jana patsaman kutikäriptinmi uysha täpaqkuna juknin jukninpis kayno parlapäkurqan: “Tayta Dios wilakatsimashqantsita rikanantsipaq Belénman jukla aywashun”.
16 Tsayno nir apurädu aywarmi itita taripäkurqan uywakuna mikukunalancho punuraykaqta. Josépis, Maríapis tsaychömi kaykarqan. 17 Tariykurmi wilapäkurqan itipita ángel wilapashqankunata. 18 Tsaymi lapan mayaqkuna kushikärirqan. 19 Maríanami shonqulancho lapanta yarpararqan. 20 Ángel wilashqannöla lapantapis tariykurmi uysha täpaqkuna rikashqanpita y mayashqanpita Tayta Diosta alabaraykar kutikärirqan.
Jesústa templuman apashqan
21 Tsaypita pusaq junaqniyuq kaykaptinmi itipa penqaynincho *señalatsirqan. María manaraq qeshyaq kaptin *ángel nishqannölami jutinta churaparqan Jesús jutin kananpaq.
22 *Moisés qelqashqan leykunacho nishqannölami María wachashqanpita purificakunan junaq chayamuptin* Joséwan María Jerusalén templuman itita apapäkurqan Tayta Diospa munayninman churapäkunanpaq. 23 Tsayno apananpaqmi Diospa leynincho kayno nir qelqaraykan: “Qechpa olqu tsuriki Tayta Diospami kanqa”.*
24 Tsaynöpis Diospa leynincho kaynömi qelqaraykan: “Ishkay kulkushta o ishkay pushapa palumata apamunqa”.* Tsay nishqantapis cumplinanpaqmi templuman aywapäkurqan.
25 Tsay witsanmi Jerusaléncho tarqan Simeón jutiyuq runa. Paymi alilata rurashpan Tayta Diosman yärakur kawarqan. Tsaynöpis Israel runakuna nakaykashqanpita Cristo jorqunanpaq kashqantami shuyaraykarqan. Payqa Espíritu Santupa munayninchömi kawaq. 26 Paytami Espíritu Santu musyatsirqan Tayta Dios kachamushqan Cristuta rikaykurraq wanunanpaq kashqanta. 27 Tsayno tantiyatsiptinmi templuman Simeón aywarqan. Tsaymanmi Tayta Diospa leynincho nishqanta cumplipäkunanpaq María y José Jesústa chayatsipäkurqan. 28 Tsaychömi Simeónqa itita marqarkur Tayta Diosta alabarqan kayno nir:
29 “Tayta Dios, nimashqaykita cumplishqankinami.
Kanan kushishqanami wanukushaq.
30 Kachamushqayki salvadorta rikashqänami.
31 Payta kachamushqanki maytsaycho taq runakunata salvanaykipaqmi.
32 Mana Israel runakunapaqpis atskimi kanqa.
Paypitami kuyashqayki Israel runakunapis reqishqa kanqa”.
33 Simeón nishqankunata mayarmi José y María kushikärirqan. 34 Tsawraqa Tayta Diosta Simeón manakurqan bendicionninta paykunaman churamunanpaq. Nirkurna Jesúspa maman Maríata kayno nirqan: “Kay itita Tayta Dios churamushqa wakin Israel mayintsikunata salvananpaq y wakintana juzgananpaq. Paytaqa atska runakunami chikipäkunqa. 35 Tsaynöpami runakuna alita o mana alita yarpashqanpis musyakanqa. Qampa shonquykiqa espädawan tuksishqanöraqmi lakikuypita nananqapaq”.
36 Templu patiuchömi Tayta Diospa profëtan Ana jutiyuq chakwanpis kaykarqan. Paypa taytanmi Aser trïbupita Fanuel karqan. Payqa qanchis watalami runanwan tarqan. 37 Tsaypita pusaq chunka chusku (84) watanami viüdala täkurqan. Templu patiupita mana yarquypami paqasta junaqta ayunashpan Tayta Diosta manakuq. 38 Itita Simeón bendicionta qoshqan hörami Anapis Jesús kaykashqan kaqman chayaykur Tayta Diosta agradëcikurqan. Nirkurmi Tayta Dios kachamushqan Cristuta shuyaraykaq runakunata kayno nirqan: “Kay itimi shuyaraykashqantsi salvakuq kaykan”.
39 Tayta Diospa leynincho nishqanno cumplirkurnami José y María Galileacho kaykaq Nazaret markanman kutikärirqan. 40 Tayta Dios yanapaptinmi Jesúsqa winashqan tupu yachaq y kalpayuq rikakurqan.
Templucho Jesústa taripäkushqan
41 Cada watami Jesúspa taytan y maman *Pascua fiestapaq Jerusalénman aywapäkuq. 42 Chunka ishkay watayuq Jesús kaykaptinmi Israel runakunapa costumbrin kashqanno Pascua fiestaman Jesústapis pushapäkurqan. 43 Fiesta ushaynami Joséwan María markanpana kutikärirqan. Jerusaléncho Jesús quëdakushqantaqa manami cuentata qokärirqantsu. 44 Tsaymi paykunaqa wakin runakunawan Jesús aywaykashqanta yarpashpan juk junaq qoyayta aywaykashqanchöraq Jesústa watukurqan. Tsaymi aylunkunacho y reqinakushqanchöpis ashipäkurqan. 45 Mana tariykurmi Jerusalénman ashiq kutipäkurqan.
46 Kimsa junaqtaraqmi templucho kaykaqta Jesústa taripäkurqan. Tsaychömi ley yachatsiqkunawan tapunakur jamaraykarqan. 47 Ali yachaq kar tapupäkushqanta contestaptinmi mayaqkuna espantashqa rikakurqan. 48 Tsaycho tariykurmi taytan y maman pasaypa mantsakashqa rikakurqan. Tsaymi maman kayno nirqan: “¿Imanirtaq kaycho quëdakurqayki, hïju? Pasaypa lakishqami ashir puripäkushqä”.
49 Tsawraqa Jesús kayno nirqan: “¿Imanirtaq ashipäkamanki? ¿Manaku musyapäkunki Taytäpa wayincho kanäpaq kashqanta?”
50 Paykunaqa manami tantiyapäkurqantsu imanir tsayno niykashqantapis.
51 Tsaypitanami paykunawan Nazaretman Jesús kutikur mandashqankunata rurarqan. Mamanqa lapan ima pasashqankunatapis shonqulanchömi yarpararqan. 52 Winaylan tupumi Jesús mas yachaq rikakurqan. Tsaymi Tayta Diospis y runakunapis kuyarqan.