Isaías
Babilonia nación imano kananpaqpis wilakushqan
13 Kaychömi qelqaraykan Amóspa tsurin Isaíasta Tayta Dios revelashqan. Tsay revelacioncho rikatsirqan shamuq watakunacho Babilonia nación imano kananpaq kashqantapis.*
2 “¡Altunnin jirkaman señalta jawipäkuy!
¡Atacananpaq soldädukunata qayakäriy!
¡Reykuna yaykunan punkukunapa yaykunanpaq qemlapäkuy!
3 Rabyanätsimaq runakunata castigananpaqmi juk nación runakunata kachashqä.
Paykunata atacananpaqmi ordenashqä.
Tsay runakunaqa pelyayta yachaq geniuyuq runakunami karkaykan.
Paykunami conträkunata vinciptï kushikärin”.
4 Atska nación runakuna juntakaykur qayakushqanmi puntakunapita mayakaykämun.
Lapanta mandaq TAYTA DIOSMI shuntaykan kamarikushqa soldädunkunata pelyaq aywananpaq.
5 Karu nacionpitami aywarkaykämun.
Patsapa kuchun ciëlu tinkuraqpitami shamurkaykan.
TAYTA DIOS rabyashpanmi tsay aywaykämuq soldädukunawan Babilonia nacionta chipyaq elqäratsinqa.
6 ¡Ataypa atar waqapäkuy!
Lapanpaq munayniyuq TAYTA DIOS castigashunaykipaq junaq chayaykämunnami.
Castigashushpayki lapan nacionnikitami ushakätsinqa.*
7 Tsay hörami runakunapa rikrankunapis warkakäkunqa.
Lapanpa kalpanpis ushakanqapaq.
8 Fiyupa mantsakushpanmi siksikyanqa.
Wachay nanaywan warmi nakaqnömi qochpapäkunqa.
Juknin jukninpis mantsakashqami rikapänakunqa.
Penqakuylawanmi qaqlankunapis pukayanqa.
9 TAYTA DIOS castiganan junaq chayaykämunnami.
Tsay junaq fiyupa mantsakuypaqmi kanqa.
Fiyupa rabyar castigashpanmi kay patsata chunyaraykaqta kachaykunqa.
Jutsata ruraqkunata lapantami ushakätsinqa.
10 Qoylarkunapis manami atsikyanqanatsu.
Intipis jeqarkamularmi tsakakäkunqa.
Killapis manami atsikyanqanatsu.*
11 Tayta Dios kaynömi nin:
“Maytsaycho taptinpis fiyu runakunataqa y jutsata ruraqkunataqa castigashaqmi.
Mana respitakuqkunatapis penqaymanmi churashaq.
Runa tukuqkunatapis choqpakatsishaqmi.
12 Castigar ushakätsiptïmi Ofirpita kaq qori walkala kashqanno runakunapis walkalana kanqapaq.
13 Tsay höraqa jana patsapis siksikyanqami.
Kay patsapis juk lädumanmi witikunqa.
Fiyupa rabyar castiganä junaqmi tsayno kanqa.
14 “Tsay junaqmi runakuna mantsakar markankunapana kutikuyta munapäkunqa.
Qatikachaptin luychu qeshpiqnömi qeshpipäkunqa.
Mitsiqniynaq uyshakuna mantsakar qeshpiqnömi aywakärinqa.*
15 “Tsayno kaptinpis tinkushqan kaqtaqa pitapis soldädukuna wanutsinqami.
Tsarishqan kaqtaqa pitapis espädawanmi tuksirinqa.
16 Maman y taytan rikarpaykaptinmi wamrankunatapis saqtarqärinqa.
Qechurmi wayinpita imaykantapis apakärinqa.
Warminkunatapis tsaripakärinqa.
17 “Babilonia runakunata atacananpaqmi Media nación runakunata qayatsimushaq.
Tsay runakunaqa mana atacananpaq qellayta ni qorita pägaptinpis manami chaskinqatsu.
18 Tsaypa trukanqa atacashpanmi mözukunatapis flëchawan wanutsipäkunqa.
Iti wamrakunatapis pishi wamrakunatapis mana kuyapaypami wanutsipäkunqa.
19 “Babilonia nacionqa kuyaylapaq perlasnöraqmi wakin nación rikananpaq kaykan.
Tsaycho taq caldeo runakunaqa* chanin cuestaq ruminöraqmi karkaykan.
Tsayno kaptinpis Tayta Dios ushakätsishqan Sodoma y Gomorra markakunanömi ushakanqa.*
20 Manami imaypis tsaycho runa tanqanatsu.
Tsaychöqa Arabia runakunapis manami patsakunqanatsu ni uysha mitsiqkunapis mitsikunqanatsu.
21 “Jirkacho taq fiyu uywakuna y *avestruzkunalanami tsaycho tanqa.
Wayikunachöpis tukukunalanami tanqa.
Munti cabrakunalami tsaycho pañanqa.
22 Palaciukunachöpis *hiena uywakunalanami aular tanqa.
Alinnin wayikunachöpis *chacalkunalami tanqa.
Babilonia nación ushakänanpaq kaq höra chayaykämunnami.
Manami aykäpis pishinnatsu”.*