Zacarías
Tayta Dios shamushpan mandananpaq nishqan
14 Jerusalén runakuna, TAYTA DIOS juzgashunayki junaq chayamunqapaqnami. Kikikikuna rikaykaptikimi chikishuqniki nación runakuna vincirkushushpayki imaykaykikunatapis qechushushqaykita rakipänakunqa.
2 Jerusalénta tsayno atacananpaqmi lapan nación runakunata Tayta Dios shuntamunqa. Tsay runakuna Jerusalénman yaykurmi tsaycho kaq wayikunapita imaykantapis apakärinqa. Warmikunatanami tsaripakärinqa. Jerusaléncho taq runakunata pulanta prësu apakärinqa. Wakintanami markalancho kachaykunqa.
3 Tsayno ruraykaptinnami kikin TAYTA DIOS pelyanqa tsay nacionkunawan. Israel runakunata unay yanapar pelyashqannömi tsay nacionkunawan pelyanqapaq. 4 Tsay junaqmi Jerusalén tsimpan inti jeqamunan kaq lädu Olivos jirkancho TAYTA DIOS ichiranqa. Tsaycho ichiraptinmi Olivos jirkan ishkayman partikanqa. Partikaptinmi jatunkaray raqra rikakunqa inti jeqamunanpita hasta inti jeqananyaq. Pulan jirkanmi norti kaq lädupa rakikanqa y pulan kaqnami sur kaq lädupa rakikanqa. 5 Tsay raqra Azal partiyaq chayaptinmi qamkunaqa tsay jatunkaray raqrapa qeshpipäkunkipaq. Judá nacionpa mandaqnin rey Uzías kashqan witsan terremötu kaptin unay ayluykikuna qeshpishqannömi qamkunapis qeshpipäkunkipaq. Tsay hörami *santu *angilninkunawan TAYTA DIOS shamunqa.
6 Tsay witsanqa manami kanqapaqtsu atsikyaypis, qasaypis ni qasapapis. 7 Manami tsakaypis ni junaqpis kanan kashqannötsu kanqa, sinöqa tsakay kaptinpis junaqpanöla atsikyanqapaq. Tsay junaqnöqa manami imaypis kashqatsu ni kanqatsu. TAYTA DIOSLAMI musyan tsay junaq imano kananpaq kashqantapis.*
8 Tsay witsanqa usya tiempupis y tamya tiempupis chuya yakumi Jerusalénpita yarqamunqa.* Pulan yakumi chayanqa inti jeqamunan kaq lädu lamaryaq.* Pulan yakunami chayanqa inti jeqanan kaq lädu lamaryaq.*
9 Tsay witsanqa intëru kay patsacho TAYTA DIOSLAMI rey kanqa. Tsaymi maytsaychöpis pay japalantana alabapäkunqa.
10 Intëru Judá nacionmi pampa rikakunqa Gebapita hasta Jerusalénpa sur kaq läduncho kaykaq Rimón partiyaq. Jerusalénnami jirkan jananchöna quëdanqa. Runakuna Jerusaléncho tanqa Benjamín Punkupita hasta Unay Punku jutiyuq punku kashqanyaqmi. Tsay Unay Punkupa jutin kanan kaykan Esquïna Punkumi. Tsaynölami runakuna tanqa Hananeelpa rikachakunan törripita hasta reypaq üvata jarukunan kaykaqyaq. 11 Tsaymi Jerusaléncho runakuna kichkiyparaq tanqapaq. Mananami ima maldicionpis paykunapaq kanqanatsu, sinöqa jawkalanami kawapäkunqapaq.
12 Jerusalén runakunata atacashqanpitami lapan contran nación runakunata TAYTA DIOS mantsariypaq fiyu qeshyawan castiganqa. Tsay qeshyawanmi kawaykaptilan aytsanpis jurunqa y nawinkunapis ismunqa. Tsaynölami qallunkunapis shimilancho ismunqa. 13 Tsay witsanmi tsay runakunata fiyupa mantsakuyman TAYTA DIOS churanqa. Tsaymi kikinpura chikinakur pelyapäkunqa.
14 Jerusalénta tsapar pelyananpaqmi Judá parti markakunacho taq runakuna Jerusalénman shapäkamunqa. Nawpan nacionkunacho taq runakunata vinciykurmi tsaytsika riquëzankunata qechupäkunqa. Tsay riquëzakunami kanqa tsaytsika qellay, qori y röpakunapis. 15 Contrankunapa campamentunkunacho kaykaq cawallukunata, mulakunata, *camëllukunata, bürrukunata y wakin uywakunatapis fiyu qeshyami ushanqa. Tsay qeshyaqa ämunkunata tsarishqan qeshyalami kanqa.*
16 Jerusalén runakunawan pelyashqanpita kawaykar quëdaq jäpa nación runakunaqa cada watami Jerusalénman shapäkamunqa poderniyuq rey TAYTA DIOSTA adorapäkunanpaq. Tsaycho adorarmi *Ramäda fiestata rurapäkunqa.*
17 Mayqan nación karpis lapanta mandaq TAYTA DIOSTA adorapäkunanpaq Jerusalénman mana shapäkamuptinqa tsay nacioncho tamya manami kanqatsu. 18 Egiptupita karpis Ramäda fiestata rurananpaq mana shamuptinqa TAYTA DIOSMI wakin nacionkunata castigashqannöla castiganqapaq. Tsaymi paykunapaqpis tamya mana kanqatsu. 19 Tsaynömi castiganqa Egipto runakuna y mayqan nación runakunapis Ramäda fiestata rurananpaq mana shamuptinqa.
20 Tsay witsanmi cawallukuna walqaraykashqan campanillakunachöpis qelqaranqa kayno nir: “TAYTA DIOSPAQ SANTUMI KAYKAN”. TAYTA DIOSPA wayincho yanukunanpaq kaq mankakunapis *altarpa nawpancho kaykaq tazonkunano santumi kanqa. 21 Intëru Jerusalénchöpis y Judáchöpis lapan mankakunami lapanta mandaq TAYTA DIOSPAQ santu kanqa. Santu kaptinmi pipis adorananpaq shamur tsay mankakunawan apamushqan sacrificiuta yanukunqa. Tsay witsanmi lapanta mandaq TAYTA DIOSPA templuncho rantikuqkuna mana kanqapaqnatsu.