Lucas
Qanchis chunka ishkay discïpulunkunata Jesús kachashqan
10 Tsaypitanami qanchis chunka ishkay* (72) discïpulunkunata akrarkur Señor Jesús ishkay ishkay kacharqan pay chayananpaq kaq markakunaman. 2 Kacharmi kayno nirqan: “Cosëcha shuntaypaq kaykaqnömi tsaytsika runakuna karkaykan Tayta Diospa wilakuyninta chaskikärinanpaq. Tsayno kaptinpis walkaqlami wilakuqkuna karkaykan. Tayta Diosta manakäriy wilakuqkunata kachananpaq.
3 “Kanan wilakuq aywapäkuy. *Löbukunaman uyshakunata qaykuqnömi qamkunata kachaykä. 4 Ama apapäkunkitsu qellaynikita, qepikita ni lanqikitapis. Nänicho piwanpis parlar ama täkunkitsu.
5 “Pipa wayinmanpis chayarqa kayno nipäkunki: ‘Jawka kaway qamkunacho kaykulätsun’. 6 Ali chaskishuptikiqa nishqaykinömi paypaq ali kaway kanqa. Mana chaskishuptikimi itsanqa ali kaway kanqatsu. 7 Wayin wayinqa ama puripäkunkitsu, sinöqa chaskishuqnikipa wayilancho patsarpäkunki. Qarashushqalaykita mikunki y upunki. Arupakuq runa päguta chaskinanpaq derëchun kashqannömi qamkunapapis qarashushqayki derëchuyki kaykan.
8 “May markamanpis chayapäkuptiki chaskishuptikiqa qarashushqaykita mikupäkunki. 9 Tsay markacho qeshyaykaqkunata aliyätsir kayno nipäkunki: ‘¡Tayta Dios *mandaykashqan chayamushqanami!’ 10 May markachöpis mana chaskishuptikiqa cälliman yarqurir kayno ninki: 11 ‘Jutsayuq kashqaykita musyapäkunaykipaqmi markaykikunapa polvun chakïkunacho kaykaqtapis tapshipäkü. Ima kaptinpis musyapäkuy Tayta Dios mandaykashqan chayamushqanta’.
12 “Noqa kaynömi nï: Sodoma runakunata castigashqanpitapis mas peormi juiciu final junaqcho tsay runakunata Tayta Dios castiganqapaq.*
13 “¡Wawalaw, Corazín runakuna! ¡Wawalaw, Betsaida runakuna! Markaykikunacho milagrukunata rurashqäno Tiro markacho y Sidón markacho* milagrukunata ruraptïqa maynami jutsa ruraykunata kacharishpan qachqa röpata jatikurkur uchpa janancho jamarpanman karqan. 14 Tsaymi Tiro y Sidón runakunata castigashqanpitapis mas peor juiciu finalcho Tayta Dios castigashunkipaq. 15 Capernaúm runakuna, ¿jana patsaman chayanaykipaq kashqantaku yarparkaykanki? Qamkunaqa *Hadesman qaykushqami kapäkunkipaq”.*
16 Tsayno nirkushpanmi discïpulunkunata kayno nirqan: “Qamkuna wilakushqaykita chaskikurqa noqatami chaskikaykäman. Qamkunata mana chaskishushpaykiqa noqatapis manami chaskiykämantsu. Noqata mana chaskimarqa kachamaqnïtapis manami chaskikuykantsu”.
Wilakuq aywaqkuna kutishqan
17 Qanchis chunka ishkay (72) kachashqan discïpulunkuna kushishqa kutiykur Jesústa kayno wilarqan: “Jutikicho qarquptï ¡*supaykunapis wiyakamashqami, tayta!”
18 Tsawraqa Jesús kayno nirqan: “Noqa rikashqämi jana patsapita räyunöraq *Satanás ishkimushqanta.* 19 Qamkunatami munaynïta qoshqä culebrakunata y alacrankunata jarunaykipaq y Satanás imata ruraptinpis vincinaykipaq. Satanásta ichipaptikipis manami imapis pasashunkipaqtsu. 20 Supaykuna wiyakärishushqaykipita kushikurpis mas kushikäriy jana patsacho jutikikuna qelqaraykashqanpita”.
Tayta Diosta Jesús alabashqan
21 Tsaychömi Espíritu Santupa munayninwan kushikushpan Tayta Diosta Jesús manakurqan kayno nir: “Jana patsacho y kay patsacho munayniyuq Papä, qamtami alabä. Manami yachaq tukuqkunatatsu yarpaykashqaykikunata musyatsishqanki, sinöqa wamrano kaqkunalatami tantiyatsishqanki. Tsayno kanantami munashqanki, Papä”.
22 Nirkurnami tsaycho kaykaq runakunata kayno nirqan: “Taytämi lapantapis munaynïman churamushqa.* Tsurin kashqäta paylami musyan. Tsaynöpis noqalami musyä Taytä kashqanta. Tsaymi noqa tantiyatsishqä runakunala Taytä imano kashqantapis musyan”.*
23 Tsaypitami discïpulunkunalata kayno nirqan: “Kanan pasaykashqankunata rikar kushishqami karkaykanki. 24 Noqa kaynömi nï: Unay profëtakunapis y reykuna rikashqaykikunata rikayta munarpis manami rikapäkurqantsu. Mayashqaykikunata mayayta munarpis manami mayapäkurqantsu”.*
Runa mayinta Samaria runa kuyapashqan
25 Juk kutichömi Jesús yachashqanta o mana yachashqantapis musyayta munar ley yachatsiq runa tapurqan kayno nir: “*Rabí, ¿imatataq ruräman *mana ushakaq kawayta tarinäpaq?”
26 Tsawraqa Jesús kayno nirqan: “¿Ima niykantaq Tayta Diospa leynincho? Liyir ¿imatataq tantiyanki?”
27 Tsay runanami kayno nirqan: “Tayta Diospa leynincho kaynömi niykan: ‘Tayta Diosta kuyanki lapan shonquykiwan, lapan voluntänikiwan, lapan kalpaykiwan y lapan yarpaynikiwan. Runa mayikitapis kikiki kuyakushqaykino kuyanki’ ”.*
28 Niptinmi Jesús kayno nirqan: “Alitami nishqanki. Tsay nishqaykita rurarqa mana ushakaq kawaytami tarinkipaq”.
29 Tsawraqa tsay runa yachaq tukushpan tapurqan kayno nir: “¿Pitaq tsay runa mayïqa?”
30 Tsayno tapuptinmi Jesús kayno wilaparqan: “Juk runashi aywaykarqan Jerusalénpita Jericó markaman. Aywaykaptinshi asaltantikuna fiyupa maqarkur qepinta y jatirashqan röpanta qechurqan. Nirkurshi wanushqatano kachaykur aywakärirqan.
31 “Tsay nänipashi juk cüra pasaykarqan. Tsay runata rikaykarpis mana rikaq tukushpanshi pasakurqan. 32 Tsaynölashi *levitapis tsay runa jitaraykashqan kaqman chayarqan. Paypis mana rikaq tukushpanshi pasakurqan.
33 “Paykunapa qepantanashi *Samaria runapis chayarqan. Payshi itsanqa jitaraykaqta tariykur kuyaparqan. 34 Tsayshi aceitiwan y vïnuwan jampirkur träpukunawan wataparqan. Nirkurnashi bürrunman muntarkatsir patsakuna wayiman apaykur shumaq jampirqan. 35 Jukaqnin junaq aywakurnashi ishkay junaq jornalpa chaninta pägar wayiyuqta kayno nirqan: ‘Qeshyaykaq runata rikapaykälanki, tayta. Masta gastaptikipis kutimurnami pägaläshaykipaq’ ”.
36 Tsayno wilaparkurmi Jesús tapurqan kayno nir: “Tsay kimsan runapita ¿mayqan kaqtaq runa mayinta kuyaparqan?”
37 Niptinmi kayno nirqan: “Samaria runami, tayta”.
Tsaynami Jesús kayno nirqan: “Kanan qampis tsay runanöla runa mayikita kuyapay”.
Martapa y Maríapa wayinman Jesús chayashqan
38 Tsaypita discïpulunkunawan Jesús aywarmi juk taksha markaman chayarqan. Tsaychömi Marta jutiyuq warmi wayinman patsatsirqan. 39 Martapa nananmi karqan María. Paymi Jesús yachatsishqanta mayar nawpancho jamararqan. 40 Martami itsanqa wayicho atska rurayninkunata ruraykarqan. Tsawraqa Jesúsman witiykur kayno nirqan: “Tayta, ¿imanirtaq nanä tsaycho jamaräkun japalä nakaykaptï? ¡Niykulay yanapamänanpaq!”
41 Tsaymi Señor Jesús kayno nirqan: “Marta, Marta, qamqa ruraynikikunalapaqmi afanädu kaykanki. 42 Lapanpitapis juklaylami mas aliqa kaykan. Tsaytami nanayki Maríaqa akrashqa. Pay yachakushqantaqa manami pipis qechunqatsu”.