Salmos

89 (2) TAYTA DIOS, kuyapäkuq kashqaykipitami imaypis alabashayki.

Lapan promitishqaykita cumpliq kashqaykitami wilakushaq.

 2 (3) Noqaqa wilakushaq imaypis kuyakuq kashqaykitami.

Promitishqaykikunaqa jana patsanöpis manami trukakantsu.

 3 (4) Kaynömi nishqanki: “Akrashqä runawanmi *pactuta rurarqä.

Sirvimaqnï Davidta promitirmi kayno nirqä:

 4 (5) ‘Noqami kamakätsishaq qampita miraqkuna imayyaqpis rey kananpaq’ ”.* Selah

 5 (6) TAYTA DIOS, espantaypaq kaqkunata rurashqaykipitami jana patsacho kaykaqkunapis alabapäkushunki.

Cumpliq kashqaykipitami nawpaykicho juntaraykaq *angilkunapis adorapäkushunki.

 6 (7) QAMNÖQA manami pipis jana patsacho kantsu.

Munayniyuq karpis manami qammanqa tinkuntsu.

 7 (8) Jana patsacho angilkuna juntakashqanchöpis mantsakuypaqmi kaykanki.

Nawpaykicho kaq angilkunapitapis mas munayniyuqmi kaykanki.

 8 (9) Lapanta mandaq TAYTA DIOS, ¿piraq qammanqa tinkunman?

Qamlami lapanpaq munayniyuq kaykanki.

Promitishqaykitaqa imaypis cumplinkimi.

 9 (10) Lamar fiyupa pulchaqyaqtapis qammi michanki.

Pulchaqyar altupa sharkuptinpis qammi chawätsinki.

10 (11) Lamarcho mantsariypaq *Rahab uywatapis lapirirqaykimi.*

Munayniyuq karmi chikishuqnikikunatapis maytsaypa qarqurqayki.

11 (12) Jana patsapis y kay patsapis qampami kaykan.

Kay patsacho kaqkunatapis qammi kamashqanki.

12 (13) Qammi kamashqanki norti läduta y sur lädutapis.

Tabor puntapis y Hermón jankapis kushishqami alabashunki.*

13 (14) Lapanpaq munayniyuqmi qam kaykanki.

Alawqa kaq makilaykiwanmi lapantapis vincinki.

14 (15) Alikunata rurar y pitapis mana jananpaypa juzgarmi ali mandaq kaykanki.

Kuyakuq kashqaykita y promitir cumplishqaykitami pïmaytapis tantiyatsinki.

15 (16) Kushishqami kawapäkunqa alabashuqniki runakuna.

TAYTA DIOS, paykunaqa nawpaykichömi kawapäkun.

16 (17) Jutikita joqarirmi waran waran kushishqa kawapäkun.

Alita ruraq kashqaykipitami kushikärin.

17 (18) Kushikärinanpaqmi shumaq yanapaykanki.

Noqakunaqa yanapamaptikimi munayniyuq karkaykä.

18 (19) TAYTA DIOSMI tsapämaqnintsi escüdu kaykan.

Israel runakunapa *santu Diosninmi mandamaqnintsi rey kaykan.

19 (20) Unaymi sirvishuqniki profëtakunata revelar kayno nirqayki:

“Israel runakunapitami ali chölunninta akrashqä.

Paytami yanapashqä pïmaypis respitananpaq.

20 (21) Payqa sirvimaqnï Davidmi kaykan.

Rey kananpaqmi *sagrädu aceitita umanman winapänanpaq nirqä.*

21 (22) Mana kachaypami paytaqa imaypis yanapashaq.

Kikïmi shumaq shakyätsishaq.

22 (23) Contrankunapis manami vincinqatsu.

Fiyu runakunapis manami munayninman churanqatsu.

23 (24) Chikiqninkunataqa paypa nawpanchömi lapirishaq.

Tsay runakunataqa chipyaqmi ushakätsishaq.

24 (25) “Payta kuyashpämi lapan promitishqäta cumplishaq.

Yanapaptïmi munayniyuq rikakunqa.

25 (26) Mediterráneo Lamarpita hasta Éufrates mayuyaq mandaq kananpaqmi yanapashaq.

26 (27) Paymi kayno nimanqa:

‘Papänïmi kaykanki.

Diosnïmi kaykanki.

Salvamaqnï y tsapämaqnï qaqami kaykanki’.

27 (28) “Davidta qechpa tsurï kananpaqmi churashaq.

Kay patsacho lapan reykunapitapis mas munayniyuqmi kanqa.*

28 (29) Paytaqa imaypis kuyaykäshaqmi.

Paywan pactu rurashqätaqa imaypis cumplishaqmi.

29 (30) Jana patsa imaypis kashqannömi paypita miraqkuna imaypis rey kanqapaq.

30 (31) Yachatsishqäta paykuna qonqaykuptinqa,

nishqäta mana cäsukuptinqa,

31 (32) leynïkunata mana cumpliptinqa

y mandamientükunata mana wiyakuptinqa

32 (33) wiruypami castigashaq.

Jutsata rurashqanpitami astashaq.*

33 (34) Tsayno castigarpis Davidta kuyarmi promitishqäta imaypis cumplishaq.

34 (35) Paywan pactu rurashqäta manami imaypis qonqashaqtsu.

Lapan promitishqätami cumplishaq.

35 (36) Kikïmi Davidta promitishqä.

Promitishqätaqa lapantami cumplishaq.

36 (37) Paypita miraqkunami imaypis rey kanqa.

Inti imaypis kashqannömi imaypis mandaq kanqa.

37 (38) Ciëlucho killa imaypis kashqannömi imayyaqpis mandaq kanqa”. Selah

38 (39) Tayta Dios, tsayno promitiykarpis akrashqayki rey rabyanätsishuptiki mananami yanapankinatsu.

39 (40) Sirvishuqniki Davidwan pactu rurashqaykitapis manami cumplinkinatsu.

Pïmaypis jarukunanpaq corönanta jitariqnömi rey kaykashqanpita jitarishqanki.

40 (41) Taykashqan marka murällatapis kay lädupa wak lädupami juchutsishqanki.

Amparakuna markankunatapis raqälatanami kachaykushqanki.

41 (42) Pïmaypis tsaypa pasaqkunaqa munashqantami apakärin.

Vecïnun nación runakunapis asipanmi.

42 (43) Reypa contrankunata yanapaptikimi vinciykur kushikärin.

43 (44) Vincinanpaqmi reypa soldädunkunata mantsaritsishqanki.

Pelyachöpis mananami yanapashqankinatsu.

44 (45) Munayniyuq kashqantami reyta qechushqanki.

Mandaq kashqantapis manakaqmanmi churashqanki.

45 (46) Mözularaq kaykaptinmi rey kaykashqanpita jorqushqanki.

Pasaypa penqaymanmi churashqanki.* Selah

46 (47) Tayta Dios, ¡imayyaqraq noqakunapita *pakaräkunki!

¿Imaypis rabyashqalatsuraq kakunki?

47 (48) Tayta Dios, walka watala kawanäpaq kashqanta yarpaykulay.

Kamashqayki runakunaqa yupashqa watalami kawan.

48 (49) ¿Piraq mana wanuypa kawanman?

¿Piraq wanuypita qeshpinman? Selah

49 (50) Tayta Dios, Davidta imaypis kuyapänaykipaq promitishqaykita ¿imanirtaq qonqaykushqanki?

50 (51) Qamta sirvipäkuptï noqakunata pïmaypis qayapämashqanta mayaykulay.

Maytsay nacioncho runakuna ashlipäkamashqantaqa imaypis yarparaykämi.

51 (52) TAYTA DIOS, chikishuqnikikuna achäquitami ashiparkaykäman.

Akrashqayki runakuna kaptïmi waran waran qayaparkaykäman.

52 (53) TAYTA DIOS imayyaqpis alabashqa kaykulätsun.

¡Amén! ¡Tsayno katsun!