Salmos
Davidta promitishqanta cumplinanpaq Tayta Diosta manakushqan
Kay salmuqa Jerusalénman aywaqkuna alabananpaqmi kaykan.
132 TAYTA DIOS, yarpaykulay David imano nakashqantapis.
2 Jacob yärakushqan TAYTA DIOS, yarpaykulay David promitishushqaykita.
3 Promitirmi kayno nishurqayki:
“Wayïchöpis manami täshaqtsu,
punuytapis manami tarishaqtsu,
4 manami yanqalapis punushaqtsu,
manami ichiklatapis qepishtarpushaqtsu
5 munayniyuq TAYTA DIOSPAQ sitiuta manaraq tarirqa
y pay tänanpaq wayita manaraq rurarqa”.
6 Efratacho kaykarmi mayapäkurqä *Pactu Babulpita parlaqta.
Jaar pampachömi babulta taripäkurqä.
7 Tsaymi wilanakärirqä kayno nir:
“¡Tayta Diospa wayinman aywashun!
¡Nawpanman qonqurpakushun!”
8 TAYTA DIOS, tänaykipaq kaqman aywaykalämuy.
Munayniyuq babulniki kashqancho taykulay.
9 Sirvishuqniki cürakunapis lapan shonqunwan sirviykuläshunki.
Munashqaykino kawaqkunapis kushishqa alabaykuläshunki.
10 Sirvishuqniki David rayku akrashqayki reyta yanapaykulay.*
11 Davidta promitishqaykitaqa imaypis cumplinkimi.
Promitirmi kayno nirqayki:
“Qampita miraqkunalami imaypis trönuykicho rey kanqapaq.*
12 Tsayno kanqa wilakuynïta y *pactu rurashqäta cumpliptinmi.
Tsaynöpami qampita miraqkuna trönuykicho imaypis rey kanqa”.
13 TAYTA DIOSMI *Sión jirkanta akrashqa.
Tsaycho tänanpaqmi akrashqa.
14 Tsaymi kayno nirqan:
“Kaychömi imaypis täshaq.
Kaycho trönü kananpaqmi akrashqä.
15 Kaycho mikuy atska kananpaqmi bendicionnïta churashaq.
Waktsakunapis saksashqanyaqmi mikupäkunqa.
16 Cürakunapis respitashqami kapäkunqa.
Cäsukamaqkunaqa kushishqami alabapäkamanqa.
17 Kaychömi Davidpita miraqkunata churashaq rey kananpaq.
Akrashqä kaptinmi yanapashaq munayniyuq kananpaq.
18 Chikiqninkunataqa penqaymanmi churashaq.
Mandaq reymi itsanqa chipchipyaykaq corönan jatishqa kanqa”.