Mateo
Paralïticu runata Jesús aliyätsishqan
9 Tsaypitanami *büquiwan tsimparkur tashqan Capernaúm markaman Jesús kutikurqan. 2 Tsaychömi paralïticu runata kirmawan Jesús kaqman apapäkurqan. Apaqkuna payman yärakushqanta musyarmi tsay qeshyaqta Jesús kayno nirqan: “Ama lakikuytsu, hïju. Lapan jutsaykikunatami perdonashqä”.
3 Tsayno niptinmi ley yachatsiqkuna yarpachakurqan kayno nir: “¡Tsayno nirqa Dios tukuykanmi!”
4 Tsayno yarparkaykashqanta musyarmi Jesús kayno nirqan: “¿Imanirtaq lutanta yarparkaykanki? 5 ¿Mayqantaq mas sasa kaykan? ¿Runapa jutsankunata perdonayku? ¿O qeshyaqta aliyätsiyku? 6 *Runapa Tsurin kay patsacho munayniyuqmi kaykan runakunata perdonananpaq. Tsaytami kanan musyatsishayki”.
Nirkurmi paralïticu runata kayno nirqan: “¡Sharkuy! Kirmaykita apakurkur wayikipa aywakuy”.
7 Tsayno niptinmi jinan höra aliyashqana sharkurkur wayinpa aywakurqan. 8 Tsayta rikaykurmi runakuna kushikushpan Tayta Diosta alabapäkurqan kayno nir: “¡Kay runataqa Tayta Diosmi munayninta qoykushqa kaykunata rurananpaq!”
Discïpulun kananpaq Mateuta Jesús qayashqan
9 Tsaypita aywakurmi Jesús rikarqan Mateo jutiyuq runa impuestuta cobrar jamaraykaqta. Tsawraqa kayno nirqan: “Qatirämay”. Tsayno niptinmi Jesúswan Mateo aywakurqan.
10 Tsaypitanami Jesústa Mateo qayatsirqan wayincho mikunanpaq. Tsaychömi impuestu cobraq runakuna y jutsasapa runakunapis Jesúswan y discïpulunkunawan mikupäkurqan. 11 Tsayta rikaykurmi *fariseukuna Jesúspa discïpulunkunata kayno nipäkurqan: “¿Imanirtaq impuestu cobraqkunawan y jutsasapa runakunawan Señorniki mikuykan?”*
12 Tsayno nishqanta mayaykurmi Jesús kayno nirqan: “Sänu kaqkunaqa manami jampikuqta munantsu, sinöqa qeshyaqkunalami. 13 Tayta Diospa palabrancho imata nishqantapis yachakäriy. Tsaychöqa kaynömi niykan: ‘Sacrificiuta rupatsishqaykipitapis mas munä kuyapäkuq kanaykitami’.* Noqa manami jutsaynaq runakunamantsu shamushqä, sinöqa [jutsankunata kacharinanpaq] jutsasapa runakunamanmi”.
Yachatsikuynin mushuq kashqanta Jesús tantiyatsishqan
14 Juk kutichömi Juanpa discïpulunkuna Jesústa tapurqan kayno nir: “Noqakunapis y *fariseukunapis cadalami ayunapäkü. Qampa discïpuluykikunaqa ¿imanirtaq mana ayunapäkuntsu?”
15 Tsayno tapuptinmi Jesús kayno nirqan: “Casaraq mözu kaykaptinqa casaray fiestaman qayatsishqan runakuna ¿lakikunmantsuraq? Casaraq mözuta wanutsiptinmi itsanqa ayunapäkunqapaq.
16 “Manami pipis makwa röpata mushuq ratashwan shilpantsu. Mushuq ratashqa qentir makwa röpata masmi rachikätsin. 17 Tsaynöpis manami pipis tsayraq rurashqa vïnuta makwa urpuman winantsu. Winaptinqa vïnu poqur pakiriykunqami. Tsawraqa vïnupis jichanqami y urpupis ushakanqami. Tsaymi tsayraq rurashqa vïnuta sänu urpuman winantsi. Tsayno ruraptintsiqa vïnupis manami jichanqatsu ni urpupis ushakanqatsu”.*
Warmita aliyätsishqan y wamrata kawaritsimushqan
18 Tsayno parlaykaptinmi *sinagögacho mandaq runa chayaykur Jesúspa nawpanman qonqurpakuykushpan kayno nirqan: “Warmi tsurïmi wanukäkushqa, tayta. Aywaykuläshun. Makikita jananman churaykuptikiqa kawariykamunqami”.
19 Tsayno ruwakuptinmi discïpulunkunawan Jesús aywarqan. 20 Aywarkaykaptinmi chunka ishkay watana yawar apaywan qeshyaykaq warmi qepalanpa yaykuykur Jesúspa röpanpa kuchunta yataykurqan. 21 Tsayno rurarqan “Jesúspa röpanta yataylapis yataykurqa aliyäshaqmi” nir yarpashpanmi. 22 Yataykuptinmi tikraykur Jesús rikärishpan kayno nirqan: “Ama lakikuytsu, hïja. Yärakamashqaykipitami aliyashqanki”.
Tsay nishqan hörami warmi aliyarkurqan.
23 Tsaypitanami autoridäpa wayinman Jesús chayaykur tarirqan tukapakuqkuna tukarkaykaqta y runakunapis qaparayparaq waqarkaykaqta. 24 Paykunatami Jesús kayno nirqan: “Waqtapa yarqukäriy. Wamraqa manami wanushqatsu, sinöqa punuykanlami”.
Tsayno niptinmi runakuna asiparqan. 25 Yarqupäkuptinnami wamra tsutaraykashqanman Jesús yaykuykur makinpita aptarkuptin sharkamurqan. 26 Tsayno kawaritsimushqantami tsay markacho y wakin markakunachöpis musyapäkurqan.
Ishkay qaprakunata Jesús aliyätsishqan
27 Tsaypita Jesús aywakuptinmi ishkay qaprakuna paypa qepanpa aywar kayno nipäkurqan: “¡*Davidpa Tsurin Jesús, kuyapaykalämay!”
28 Wayiman Jesús yaykuptinpis tsay qaprakuna qepantami yaykapäkurqan. Tsaymi Jesús tapurqan kayno nir: “¿Qamkuna criyinkiku nawikita aliyätsinäpaq kashqanta?”
Tsayno niptin kayno nipäkurqan: “Awmi tayta, criyipäkümi”.
29 Tsayno niptinmi paykunapa nawinta yataykur Jesús kayno nirqan: “Yärakamashqaykipitami nawiki rikanqa”.
30 Tsayno niptinmi paykunapa nawin jukla aliyarqan. Tsaymi Jesús kayno nirqan: “Aliyätsishqäta pitapis ama wilapäkuytsu”.
31 Tsayno niykaptinpis yarqurilarmi Jesús aliyätsishqanta pïmaytapis wilaparqan.
Mana parlaq runata Jesús aliyätsishqan
32 Tsay aliyätsishqan qaprakuna yarqurishqalantami Jesús kaqman pusharqan parlayta mana puëdiq runata. Tsay runacho *supay kaptinmi mana parlarqantsu. 33 Tsay supayta Jesús qarquptinnami runa parlayta qalaykurqan. Tsayta rikaykurmi runakuna kushikushpan kayno nipäkurqan: “¡Manami maychöpis rikashqantsitsu kayno aliyätsiqtaqa!”
34 *Fariseukunami itsanqa kayno nipäkurqan: “Kay runaqa supaykunapa mandaqninpa munayninwanmi supaykunata qarquykan”.*
Runakunata Jesús kuyapashqan
35 Lapan markakunapa y jalqakunapa Jesús purirmi Tayta Dios *mandaykashqanpa ali wilakuyninta *sinagögakunacho yachatsirqan y tukuy niraq qeshyawan qeshyaqkunata aliyätsirqan.* 36 Tsawraqa tsaytsika runakuna Jesús kaqman juntakarqan. Mitsiqniynaq y oqrakashqa uyshakunano kaykaqta rikarmi Jesús kuyaparqan.* 37 Tsawraqa discïpulunkunata kayno nirqan: “Cosëcha shuntaypaq kaykaqnömi tsaytsika runakuna karkaykan Tayta Diospa wilakuyninta chaskikärinanpaq. Tsayno kaptinpis walkaqlami wilakuqkuna karkaykan. 38 Tayta Diosta manakäriy wilakuqkunata kachananpaq”.*