Juan
Qapra runata Jesús aliyätsishqan
9 Jerusaléncho Jesús purirmi rikarqan yurishqanpita patsa qapra runata. 2 Tsaymi discïpulunkuna kayno nipäkurqan: “*Rabí, ¿imanirtaq kay runa qapra yurishqa? ¿Kikinpa jutsanpitaku o mamanpa y taytanpa jutsanpitaku?”
3 Tsayno tapuptinmi Jesús kayno nirqan: “Manami kikinpa ni mamanpa ni taytanpa jutsanpitatsu kay runa qapra yurishqa, sinöqa Tayta Dios aliyätsishqanta runakuna musyananpaqmi. 4 Junaq kashqanyaq kachamaqnï munashqanta rurashun*. Tsakaypaqa manami pipis aruyta kamäpakunnatsu.* 5 Kay patsacho kashqäyaqqa atskimi kaykä”.* *
6 Tsayno nishpanmi toqayninwan mituta ruraykur tsay qapra runapa nawinta Jesús lushiparqan. 7 Nirkurmi kayno nirqan: “Siloé estanquiman aywaykur maylakamuy”.
(Siloé ninanqa kachamushqa ninanmi.)
Jesús nishqanno maylakurirnami rikaykarna kutirqan. 8 Tsaymi vecïnunkuna y payta reqiqkuna kayno nipäkurqan: “¿Manaku kay runaqa limushnata manakuq qapra runa kaykan?”
9 Wakin kayno nirqan: “Aw, paymi”.
Wakinnami kayno nirqan: “Manami paytsu. Itsanqa pay niraqmi”.
Tsayno niptinmi kikin kayno nirqan: “Noqami tsay runa kaykä”.
10 Tsawraqa tapupäkurqan kayno nir: “¿Imanöpataq nawiki aliyaykushqa?”
11 Tsaymi kayno nirqan: “Jesús jutiyuq runami mituta rurarkur nawïta lushipämashqa. Nirkurnami maylakunäpaq Siloé estanquiman kachamashqa. Nimashqanno maylakurirmi kananqa rikaykäna”.
12 Tsawraqa kayno tapupäkurqan: “¿Maychötaq tsay aliyätsishuqniki runa kaykan?”
Tsaymi kayno nirqan: “Manami musyätsu”.
Aliyashqa runata fariseukuna tapushqan
13 Tsaypitanami qapra kashqanpita aliyashqa runata *fariseukunaman pusharqan. 14 Mituta ruraykur Jesús aliyätsishqan junaqqa jamay junaqmi karqan. 15 Tsaymi imanöpa aliyashqantapis aliyaq runata fariseukuna tapupäkurqan. Paynami kayno nirqan: “Juk runami nawïta mituwan lushipämashqa. Maylakurirmi kananqa rikaykäna”.
16 Tsaymi wakin fariseukuna kayno nipäkurqan: “Tsay runaqa manami Tayta Dios kachamushqan runatsu. Tayta Dios kachamushqan runa karqa jamay junaqcho jamanmanmi”.
Wakin fariseukunanami kayno nipäkurqan: “Yarpapäkushqaykino jutsayuq karqa ¿imanöpataq aliyätsinman?”
Tsayno ninakurmi kikinpura rabyanätsinakurqan.
17 Tsaymi aliyashqa runata yapay tapupäkurqan kayno nir: “Tsay aliyätsishuqniki runa ¿pï kashqantataq qam yarpanki?”
Tsaymi kayno nirqan: “Payqa profëtami”.
18 Tsayno niptinpis Israel runakunapa autoridäninkunaqa tsay runa qapra kashqanta manami criyipäkurqantsu. Tsaymi mamanta y taytanta qayaykatsimur 19 tapupäkurqan: “¿Kay runa tsurikiku? ¿Rasunpaku qapra yurirqan? ¿Imanöpataq aliyashqa?”
20 Tsaymi maman y taytan kayno nirqan: “Aw, wamrämi. Rasunpami yurishqanpita patsa qapra kashqa. 21 Itsanqa manami musyapäkütsu imanöpa aliyashqantapis ni pï aliyätsishqantapis. Payqa awkis runanami. Kikinta tapupäkuy”.
22 Tsayno nipäkurqan autoridäkunata mantsakushpanmi. Autoridäkunaqa wilanakushqanami karkaykarqan mayqanpis “Jesúsqa Tayta Dios kachamushqan Cristumi” niq kaqtaqa *sinagögapita qarqunanpaq.* 23 Tsayta mantsakurmi maman y taytan kayno nipäkurqan: “Payqa awkis runanami. Kikinta tapupäkuy”.
24 Tsawraqa qapra kashqanpita aliyashqa runata autoridäkuna yapay qayaykatsir tapupäkurqan kayno nir: “Tayta Diospa nawpanchömi nirkaykä. Rasun kaqta wilamay. Musyapäkümi tsay aliyätsishuqniki runa jutsasapa kashqanta”.
25 Tsawraqa tsay runa kayno nirqan: “Noqa manami musyätsu jutsasapa kashqanta o jutsaynaq kashqantapis. Itsanqa musyä qapra kashqäpita rikaykashqätami”.
26 Tsayno niptinmi yapay tapupäkurqan: “¿Imatataq rurashqa nawiki aliyänanpaq?”
27 Tsawraqa kayno nirqan: “Qamkunata maynami wilashqä. Wilaptïpis manami criyipäkamankitsu. ¿Imanirtaq yapay tapuykämanki? ¿Qamkunapis paypa discïpulun kaytaku munarkaykanki?”
28 Tsayno niptinmi rabyakushpan kayno nipäkurqan: “Qamchari paypa discïpulunqa kaykanki. Noqakunaqa Moiséspa discïpulunmi karkaykä. 29 Musyapäkümi Moisésta Tayta Dios parlapashqanta. Tsay aliyätsishuqniki runapaqqa manami musyapäkütsu maypita shamushqantapis”.
30 Tsayno niptinmi kayno nirqan: “Tsay runa nawïta aliyaykätsimaptinqa ¿imanirtaq mana criyipäkunkitsu Tayta Diospita shamushqanta? 31 Musyantsimi jutsasapakunataqa Tayta Dios mana cäsupashqanta. Payta mantsakur munashqanno kawaqkunatami itsanqa yanapan.* 32 Manami imaypis mayashqantsitsu yurishqanpita patsa qapra runata pipis aliyätsishqanta. 33 Tsay runa Tayta Diospita mana shamushqa karqa manami ima milagrutapis ruranmantsu”.
34 Tsayno niptinmi autoridäkuna kayno nipäkurqan: “¡Qamqa yurishqanki pasaypa jutsayuqmi! ¿Tsayno kaykarchi noqakunata yachatsimayta munaykanki?”
Tsayno nishpanmi sinagögapita tsay runata qarqurqan.
Jesústa mana chaskikur qaprano kashqan
35 Tsay aliyätsishqan runata *sinagögapita qarqushqantami Jesús musyarqan. Tsaymi tsay runawan tinkuykur kayno nirqan: “¿*Runapa Tsurinmang* criyinkiku?”
36 Niptinmi kayno nirqan: “Tayta, ¿pitaq tsay runa? Wilaykalämay payman criyinäpaq”.
37 Tsawraqa Jesús kayno nirqan: “Maynami rikashqanki. Tsay runaqa noqami kaykä”.
38 Tsayno niptinmi Jesústa adorar kayno nirqan: “Qammanmi yärakulä, Tayta”.
39 Tsayno niptinmi Jesús kayno nirqan: “Kay patsaman noqa shamushqä runakunata juzganäpami. Juzgaptïmi qaprakuna rikanqapaq y rikaqkuna qaprayanqapaq*”.*
40 Tsayno nishqanta mayashpanmi tsaycho kaykaq wakin *fariseukuna kayno nipäkurqan: “Tsayno kaptinqa ¿noqakunapis qaprachi karkaykä?”
41 Tsawraqa Jesús kayno nirqan: “Qapra kashpaykiqa manami jutsayuqtsu kapäkunkiman. Rikashqaykita nirmi jutsayuq karkaykanki”.*